奧海城加盟店的老闆彭先生指，糖百府提供的食材又酸又臭。
新聞耳目
糖百府財困 加盟商陪葬
2012年11月08日 ~~ 第1183期 香港《壹周刊》人氣甜品店糖百府○八年憑台式雪花冰打響名堂，全盛時期以特許經營模式，在本港開逾十二間分店，更發展至內地及馬來西亞；不過，風光背後原來運作一團糟。有加盟店向本刊力數糖百府既提供發臭食材、又指總公司竟以加盟店名義向外借錢，更私自推出團購優惠吸金。
本刊找到連月龜縮的糖百府創辦人李文斌，他承認因經營不善，已經「乜都蝕晒」，更在加盟店老闆不知情下，私自將名下的分店賣盤給債權人。
「當初就係無乜經驗搞食肆，先諗住搵糖百府搞特許經營。」彭先生和楊先生去年一心想着創業，以為以特許經營方式做生意可以彌補經驗不足，於是分別投資了逾一百萬元，加盟糖百府，分別在奧海城和尖沙咀 The ONE開設分店，殊不知開業僅一年，二人都已先後蝕到「渣都冇」，只剩下一肚火：「根本就好似個局咁，氹你投資，之後就攞你啲錢去幫自己還債！」他們向記者大數糖百府三宗罪。
李文斌一直避見各「債主」，記者在大埔找到他，他直認經營不善，要賣盤還債，更反指一眾加盟商輸打贏要。（廖雁雄攝）
糖百府曾是本港人氣甜品店，每晚都有客人於門外大排長龍。（《飲食男女》圖片）
一、食材發臭
彭先生投資的奧海城分店在去年七月開張，但開業不夠三個月，問題即浮現，「當初簽約，合約寫明總公司會供應食材，再喺每月營業額抽番 24%當做食材費用，但佢哋可以一個禮拜斷幾次貨，連棉花冰、心太軟、焦糖燉蛋呢啲主打嘢都成日冇貨。去到後期啲食材更加來歷不明，就咁求其搵個膠袋封住就算。試過成包芝麻糊，無生產日期，又酸又臭，最後惟有自己出錢搵供應商買，食材錢佢就照攞，貨就永遠都唔齊！」
二、以分店名義借錢
彭先生愈說愈氣憤，直指總公司連三萬元的出牌費亦「落格」，「一早傾好百三萬包晒加盟費、出牌（食肆牌）同裝修，點知到開張嗰日先知間鋪裝修唔合規格，冇可能出到牌！最慘係叫極佢哋都唔整，拖足大半年都冇聲氣，逼住要自己出錢再搵裝修師傅搞番掂，咁先出到牌。」
他更指，總公司在毫無通知下，擅自以其分店的名義，以「未來所收卡數」做抵押，向一間叫「預資有限公司」的財務公司借貸一百萬元，「突然收到律師信，先知佢攞咗我間鋪去同間貸款公司預支咗一百萬現金，拖咗幾個月都冇還！當初我都覺得奇怪，做嗰幾十蚊生意，使乜申請 Visa？原來係借我間鋪過橋再同人借錢，好彩我冇用過部 Visa機咋。」彭先生指，總公司突然在其分店加設了 Visa機，原來總公司的貸款，是每月以 Visa機的收入自動轉賬去清還，換言之，若彭先生以 Visa機收錢，變相是為總公司還錢。
三、私推團購吸金十萬無分錢
The ONE分店的老闆楊先生，亦同樣被總公司揸乾。 The ONE分店的租約是由總公司簽訂，而每月他會向總公司繳付租金。「我試過明明交晒租，但佢哋冇幫我交俾商場，搞到商場追我數，都唔知佢哋攞咗我啲錢去做咩！」
不過，最令他氣憤是，總公司竟忽然搞團購，更以團購名義擸取了近十萬元現金，「失驚無神話搞團購，佢同 Groupon（團購網站）分咗錢之後，一路冇分番錢俾我，幾千張 coupon，差唔多有十萬蚊。」原來總公司與團購網站推出優惠，以二十元購買面值四十五元的優惠券，但優惠券的收入卻沒有與分店攤分，楊先生指其近月只能做蝕本生意，「個個客拎張 coupon嚟，唔通我話唔收咩？惟有蝕住幫佢做！」
「團購啲錢都未拆番賬俾我就失咗蹤！」糖百府搞團購，但卻未有將錢分給 The ONE加盟店楊先生，令他大為氣結。
朱師傅自Ｏ八年起便跟糖百府合作，先後負責十多間分店的裝修工程，但自去年起，該公司不斷拖欠工程費，更以空頭支票找數。
欠稅欠租 無牌經營
除加盟店外，供應商及裝修師傅亦數臭糖百府。○八年開始幫糖百府各分店裝修的朱師傅，拿着大疊支票向記者咆哮，「上年開始，佢哋俾親我嘅支票全部都彈票，前前後後欠落六十四萬！到近呢幾個月，佢哋直頭失蹤埋，完全搵唔到佢哋！」
另外，涼粉供應商 Billy亦指糖百府「個朵臭晒」：「成行都知佢哋最叻拖數！正常食肆一般都係拖一至兩個月，但佢兩兄弟可以拖足半年，而家欠我六萬蚊仲未還！」
本刊翻查法庭記錄，糖百府近一年已多次因欠租欠稅等問題而被告上法庭。上月初，稅務局便入稟追討糖百府近四年的利得稅近九十萬。本年初，糖百府亦分別有三間分店因欠租而被入稟法庭。另外，今年三月，糖百府在旺角黑布街總店因多次無牌經營及無牌製造甜品雪花冰，被食環署票控，法庭當時指其已有三次無牌經營的前科，故重罰一萬元。
李文斌（右）和李文浩（左）兩兄弟在Ｏ八年金融風暴時成功憑糖百府殺出血路，但不到五年，兩兄弟的甜品王國夢已告幻滅。（《蘋果日報》圖片）
李文斌現寄住於母親的公屋單位，自稱只靠做散工維生，記者連日來亦發現他足不出戶，只間中下樓買飯，非常兜踎。（翁少陽攝）
「而家蝕晒㗎喇！」
糖百府在○八年由李文斌、李文浩兩兄弟創辦，各債主及加盟店都指兩兄弟近月避債失蹤，亦拒絕接聽電話。本刊追尋月餘，終於在大埔太和邨找到兄長李文斌。曾經風光一時的李文斌，現在寄住於母親的太和邨公屋單位內，記者問他關於糖百府欠債及經營不善等問題，他竟直指：「而家蝕晒㗎喇！」
面對加盟者指控他未有協助申領牌照，以及以分店名義借錢，他竟賴皮回應：「（無牌經營）到而家 so far都冇罰過錢。至於借錢問題，由始至終都冇要佢哋還錢，係我用糖百府名義借錢咋嘛，條數都唔使佢哋孭；至於團購條數，就係因為未計清楚啫，計完就會俾番錢佢哋！」
他又自稱現在失業，只能靠打散工維生，又謂已盡最大努力還債，指自己早前跌了電話，所以債主找不到他，並非刻意失蹤，「你睇到欠個數都唔係大㗎，全部都係幾十萬，加埋都係百零萬。我而家搵緊工，如果佢哋連我搵緊工都仲唔體諒，咁我都冇辦法。」他更發晦氣指︰「我如果清盤，佢哋一早連渣都冇晒呀！」
名下分店已賣盤
至於失敗原因，他推說是由於這兩年發展過急，流動資金不足下，仍急於到內地開分店，結果周轉不靈，被迫賣盤還債。他指，目前他名下五間糖百府，包括當初發跡的旺角黑布街總店，都已轉名給債權人，「香港租金太貴，加親租都四、五成，根本就好難做。諗住返大陸開拓新市場，點知資金周轉唔到，每個月蝕幾十萬！」根據資料，旺角三間糖百府分店、西貢及 The ONE分店，在今年八月轉由瑞生投資有限公司持有。
李文斌早年經營家族珠寶生意，惟○八年不敵金融風暴，他與弟弟李文浩當時以僅餘資產搏一鋪，轉搞甜品店，結果成功憑台式雪花冰殺出血路，令糖百府成為人氣甜品店，風頭一時無兩。
兩兄弟翻身成功後，大搞特許經營，擴充業務，曾經在兩個月內增開八間分店，高峰期在港有逾十二間分店，內地有近十間分店，遠至上海、深圳、廣州、成都、貴陽、廈門等地，又以高價把馬來西亞的經營權賣斷予當地公司。李文斌去年初接受報章訪問時更雄心萬丈地表示：「因為做生意要講 noise，所以搵人加盟。」
不過加盟者卻踩入了這個無底深潭，奧海城分店在上月結業， The ONE分店由於商業登記是由總公司持有，所以亦由債權人接手，債權人要求該分店的加盟者楊先生重新簽訂合作協議及再繳交加盟費，故楊先生已退出經營，百多萬投資化為烏有。律師伍家賢提醒，特許經營加盟者在跟總店簽訂合約時，應清楚列明權責，「一早寫定租約、食材、商業登記由邊個負責，咁萬一總店出事，加盟商所受嘅影響都少啲。」
當年糖百府從台灣引入雪花冰，成功打響名堂。（《飲食男女》圖片）
糖百府現於內地仍有近十間分店，但位於深圳寶安機場的分店卻生意冷清。
沒有留言:
張貼留言