Scroll Page | Stop Scrolling

Tweet

Pin it

Widgets

-->

眼皮跳問題困擾馮女士廿年，過去經常因雙眼太攰而「閉目養神」過馬路。

頭號健康

眼皮跳　身體警號

2013年01月03日 ~~ 第1191期 香港《壹周刊》

眼皮跳，俗稱眼眉跳，相信好多人都試過，一般數分鐘便會靜止；但你有否想過，眼皮跳竟可以跳足廿年，更可成為反映身體過累、情緒問題、眼疾、腦血管硬化甚至腦瘤腦炎的警號。
所以，眼皮跳時，別只聯想到「左吉右凶」。

六十歲的馮女士，廿年前某日起床後，感到雙眼眼皮不斷跳動，更無法自控地眨眼，即日向家庭醫生求診，但對方淡然回應：「你眼皮唔夠力，缺乏彈性，無咩問題，休息吓無事。」但休息過後，眼皮跳並無休止，更無想過，會被「眼皮跳」問題困擾足足廿年。

跳足廿年　束手無策

「每朝一起身，對眼就好緊張咁眨，根本放鬆唔到，眼又乾又怕光，真係好攰、好辛苦，行街食飯過馬路都攰到合埋對眼，有時撞人有時撞柱，仲成日仆親，連門牙都仆崩埋，在家做的車衣工作都做唔到，抱住個孫影相又擘唔大隻眼，邊度都唔想去。我先後起碼睇過五個出名的眼科醫生，另外腦科、內科、心理科、精神科、中醫、針灸同拜神咩都試過，做過晒電腦掃描、磁力共振及眼科檢查，個個醫生都話我對眼同個腦都無事，只係俾眼藥水同放鬆神經藥我，食完藥係放鬆咗少少，但藥力過後，對眼繼續不停眨、眼皮依舊跳唔停。」馮女士憶述昔日痛苦經歷，禁不住搖頭輕嘆：「鏡又唔想照，街又唔願出，我真係諗過自殺，家人更擔心我有抑鬱，呢廿幾年，睇醫生起碼用咗十幾廿萬元。」 




與眼皮跳共存廿年的馮女士，想都無想過，終在兩年前見到曙光。馮女士於一一年十月無意間收聽到由腦神經科醫生盧文偉擔任嘉賓的電台 phone-in節目，她心血來潮致電查詢，盧醫生憑馮女士的描述，初步相信她患眼皮肌肉痙孿。事後馮女士向盧醫生求診，經仔細檢查後確診眼皮肌肉痙孿外，亦發現其面及唇部亦有輕微抽搐。
馮女士憶述：「醫生幫我打肉毒桿菌針後，表明會於兩至三日後才有效果，但我當日離開診所等巴士時，已感到眼皮放鬆，終於唔使猛眨眼，我開心到不得了，即時打電話俾仔女報喜，佢哋初時唔信，阿仔仲連續問咗我四次『係咪真㗎？』。」 

休息不足　神經失控

腦神經科醫生盧文偉當日替馮女士檢查時，發現她除有眼皮跳外，嘴角和面部肌肉亦有輕微抽搐。

盧文偉醫生指出：「眼皮跳通常指一邊眼袋或眼瞼的肌肉跳，每次持續跳幾分鐘至數小時，徵狀可維持幾日至幾個月不等。眼皮跳其實相當普遍，多與疲累、壓力、緊張、焦慮、望熒光幕太久、血鈣失調、食用刺激中樞神經的藥物、哮喘藥、感冒藥、含咖啡因及酒精飲料，以及內分泌失調有關。中樞神經系統受上述因素刺激，增加神經線跳動，或刺激肌肉過度活躍甚至失控而出現眼皮跳，所以先要有充足休息、控制情緒，減少食用咖啡因及相關藥物，若情況持續未有改善，甚至面部肌肉跳動或嘴角下垂，便要求醫。」盧醫生解釋：「近年醫學界多選擇肉毒桿菌解決眼皮跳問題，因肉毒桿菌有麻痺並鬆弛肌肉的特性，微量注射可減輕肌肉痙攣，但約三個月藥力便會失效。」 

眼面抽搐　腦炎徵兆

馮女士曾向各科醫生求診，花費逾十多萬，這兩張九一年的眼科及神經科的覆診紀錄只屬冰山一角。

眼皮跳除上述成因外，亦有原因不明的個案，甚至有少數個案與腦腫瘤或腦炎有關。盧醫生憶述：「兩年前有一名十七歲女病人求診，她表示一邊眼袋不停跳近兩星期，我檢查時更發現其面部出現抽搐、麻痺以及嘴角下垂，經磁力共振檢查後，發現其腦部發炎，後確診為多發性硬化症。因炎症會不斷攻擊腦部及脊髓中樞神經系統，繼而影響身體各部位，所以要長期注射類固醇控制炎症，近日她因炎症攻擊眼部，令視神經發炎，視力受影響而求醫。」
除了中樞神經受刺激致眼皮跳外，原來隨着年紀增長，血管鈣化、失去彈性，亦有機會引發眼皮跳，且多見於四十至五十歲人士。現年四十九歲的士車主葉先生，兩年前某日在街頭巧遇友人，閒談期間突然左眼眼皮跳，葉先生形容：「我覺得當時的表情好唔自然，講話時都有少少尷尬，個腦即時諗到『左吉右凶』，加上只係跳咗十五分鐘，相信應與疲勞有關，所以無理到。」 

血管鈣化　觸碰神經

梁浩雲醫生每三個月替葉先生的眼及面部肌肉注射約六針肉毒桿菌。

不料，眼皮跳於一週後再次突襲，更愈跳愈嚴重，甚至影響入睡，葉先生擔心眼睛有問題而向眼科醫生求診，惟檢查後證實並非眼部問題。葉先生改向家庭醫生求醫，對方認為他屬三叉神經緊張，轉介他往腦外科跟進並照磁力共振，證實為腦血管鈣化，觸碰到面部第七條神經線引致眼皮跳。中大內科及藥物治療學系助理教授梁浩雲解釋：「腦幹附近有許多微細血管，健康及年輕人士血管充滿彈性，故血管觸碰到神經線時，亦可「吸震」減少對神經線的刺激。以葉先生為例，因年紀漸大血管鈣化缺乏彈性，硬化的血管觸碰並刺激到掌管顏面神經的第七條神經線，令眼皮跳兼面部肌肉跳動。」 


葉先生自創「按耳穴」暫時控制眼皮跳，但他笑言並非萬試萬靈。

葉先生坦言：「我定期驗身，身體狀況良好，不煙不酒亦無飲咖啡習慣，所以一聽到係腦血管病，即時好擔心，怕會中風或生腦瘤，有時駕駛期間都會突然跳，唯有按着『耳門』位置盡量止住眼皮跳。」對於葉先生的「獨門秘方」，梁浩雲醫生解釋：「集中精神按着耳門時，或會減低另一組神經線的專注力，令眼皮跳『好似』受控。」
葉先生初時服用抑制神經及含安眠成分的藥以紓緩病情，但四個月後效果欠佳，且經常「瞌眼瞓」，經考慮後，葉先生接受醫生建議注射肉毒桿菌，放鬆眼及面部肌肉，若然無法控制及嚴重影響生活，方考慮動手術。 

眼皮跳未必醫一世

眼前的葉先生，於個半月前注射第二次肉毒桿菌，雖然他形容：「現時已好咗好多。」但不難察覺其左眼不時跳動，左邊面頰肌肉相對繃緊，嘴角亦見下垂。眼皮跳無法治癒，而針藥未計醫生費每三個月一次要二、三千元，難道要打足一世？葉先生笑言：「都無辦法㗎！」梁醫生表示：「鈣化血管浸在腦水中，有機會移離受影響的神經線，我曾有病人不藥而癒，所以病人毋須太絕望。」
雖然上述三宗個案都屬腦神經科範疇，但眼科專科醫生周伯展認為，眼皮跳亦屬眼敏感及眼發炎的常見病徵，因眼皮受到致敏原或炎症刺激而不受控地跳動。若問題源自眼敏感或眼發炎，通常會伴隨眼部紅腫、疼痛、痕癢、流眼水、眼乾或分泌增加等病徵，若情況嚴重，面部神經亦會受到刺激，患者半邊面會出現抽搐。一般而言，滴處方眼藥水、塗藥膏以及服藥治癒眼部問題後，眼皮跳亦會同時解決。

話你知

缺乏鈣質除會影響骨骼及牙齒發展外，亦會令神經傳導興奮引致肌肉收縮痙攣，所以要吸收足夠鈣質。想知鈣質何處尋，可瀏覽 衞生署學生健康服務網頁： http://www.studenthealth.gov.hk
keyword：健康資訊>飲食與營養>鈣質知多少

眼皮跳　睇眼科，還是腦神經科？

眼皮跳屬於神經眼科（ Neuro-ophthalmology）範疇，眼科及腦神經科醫生均會涉及。眼科專科醫生周伯展認為，一般的眼皮跳多數與眼敏感、眼發炎或睫毛倒生有關，若發現眼皮跳已持續一至兩日，便應先向眼科醫生求診，由眼的表面至眼底全面檢查視力、眼壓及眼部結構，若仍未能找出問題源頭，便要進一步照電腦掃描及磁力共振，排除眼皮跳非屬眼科問題後，便要轉介腦神經科醫生。

眼皮跳　點算好？

眼皮跳的成因眾多，甚至可以毫無原因，是否一出現眼皮跳，就要即時睇醫生呢？盧文偉醫生認為，患者可先觀察情況，若屬休息不足或咖啡因問題，多數可不藥而癒，但若伴隨其他病徵或對生活造成困擾，便應求醫。




過量飲用咖啡因飲品有機會引致眼皮跳。

話你知

人體感官訊息、肌肉及內臟器官的控制，都由十二對腦神經掌管。想知道各組腦神經線的名稱及功能，兼試玩腦神經小測試，請瀏覽以下網站： http://www.dls.ym.edu.tw/neuroscience/cranial_c.htm 

撰文：陳美莉
攝影：陳健邦
插圖：祝健中

Scroll Page | Stop Scrolling

Tweet

Pin it

Widgets

-->

類固醇藥物須由醫生處方，但記者隨便抄低藥名攞去藥房配，無醫生紙都輕易買到類固醇眼藥水、藥膏等。專家提醒，長期亂用類固醇有機會患青光眼、皮膚變薄等。

頭號健康

亂用膽固醇　靈丹變毒藥

2012年12月06日 ~~ 第1187期 香港《壹周刊》
早前有無良中醫被揭發暗中在用藥及針灸期間，加入高劑量類固醇，令病人臉圓、背厚、毛髮增多，甚至影響小朋友發育，一時間，類固醇令人聞風色變，有病都唔敢用。醫生呼籲，類固醇對治療免疫系統失調引起的敏感症非常有效，是眼科、耳鼻喉科、皮膚科常用的抗炎藥。除長期使用治療嚴重病情的口服、針劑類外，其餘局部性類固醇藥物如眼藥水、藥膏，只要跟足醫生指引，相當安全，毋須過分憂慮。

亂滴眼藥水　險惹青光眼

眼科檢查發現陳小姐眼角膜布滿斑點，正是由於嚴重眼敏感，誘發眼角膜發炎。

「我受爸爸遺傳，自細有嚴重鼻敏感，十年前左右更有埋眼敏感。每逢轉季，我對眼會發炎，又痕又腫，眼皮內有種俾針㓤的感覺，眼頭眼尾更不時分泌奶白色、好似眼屎的分泌物，搞到我成日捽眼，對眼愈捽愈紅，好唔舒服！」二十五歲的陳小姐（化名）做文職，不時要對住電腦、文件，坦言眼敏感好影響工作，但滴過眼科醫生處方的類固醇眼藥水後，敏感徵狀大為減低。「我唔清楚這種眼藥水的副作用，用過覺得好用，就攞住支藥水去藥房配，雖然話要醫生處方，但都好順利買到，自此眼敏感一發作就自己滴，唔使睇醫生。」眼科專科醫生饒文杰指：「類固醇眼藥水好似萬能藥水，滴完對眼好涼爽好舒服，可以迅速消紅筋、止痛、止痕，病人咪會偷雞去配藥，配開仲會上癮咁不停用。但此藥有法例規管，無醫生處方無可能買到，但每個月總遇到一兩個病人係因為自己買來亂滴，搞到眼壓升高，然後出事。」記者在港、九、新界多間藥房放蛇，發現大部分藥房都不用出示醫生紙，就輕易出售類固醇藥物，包括眼藥水、噴鼻劑和藥膏。

萬能藥滴上癮

饒文杰醫生指，由類固醇引起的白內障（右），沉澱物聚於正中，光線較難通過，比一般白內障（左）對視力影響更大。

陳小姐在六至八年間斷斷續續自己配類固醇眼藥水，幾乎滴出青光眼。「我對眼紅到再滴嗰支藥水已經無用，即刻走去睇急症，再轉介我去眼科。檢查發現我眼壓超標，情況好嚴重，當時醫生話我眼壓高過三十（正常為十至廿一），好易有青光眼，好彩及時發現。」大步𨂾過，陳小姐以後寧願每月捱貴醫生費睇專科，都無再自己去藥房亂配藥。饒文杰醫生認為，亂配藥絕對是危險動作，「眼壓升高，毫無跡象，病人不會察覺，往往自己發現時，視神經已經受損，返唔到轉頭。如果病人在醫生監察下用類固醇眼藥水，一旦眼壓升高，則可暫停用藥，令眼壓在一、兩個月內回復正常，再嘗試換藥及調節劑量。」

醫生調校安全劑量

亂滴藥三大陷阱

誤用好危險，但使用得當，類固醇其實是治病靈藥。二十七歲、患嚴重眼敏感的崔先生須長期滴類固醇眼藥水，一旦停藥則情況惡化，影響生活。「我無驚過類固醇的副作用，因為我無得揀唔用。有段時間，對眼好乾、痕同腫得好緊要，我不停捽眼，捽到眼皮同眼角膜都損晒，直情開唔到眼、睇唔到嘢，每隔兩三日就要覆診，根本無可能返工。持續睇眼科好幾年，近年病情總算好轉。」雖然崔先生對眼要長期滴住類固醇，但眼壓卻能保持於安全水平，未見明顯副作用，饒文杰醫生解釋：「好似崔先生這類棘手個案，除了同時要用副作用較低的新型類固醇，亦要配合其他輔助藥物如降眼壓藥水、免疫力抑制劑、非類固醇藥物，以調低類固醇的劑量。只要在醫生監察下，用類固醇可以好安全。」

類固醇係乜？

類固醇是抗敏感藥的一種，能幫助抑制免疫系統失調引起的過敏反應，功效廣泛，是各科常用藥物。
雖然類固醇有一些令人聞風色變的副作用，令人產生恐懼及抗拒。但實質上類固醇藥物眾多，不同劑型有不同程度的副作用，而大部分情況下只要正確使用，以日及星期計，短期使用相當安全：




局部性類固醇藥物有不同劑型，目的是讓藥物針對性地停留在患處，減低入血量。


崔先生患嚴重眼敏感，結膜不斷分泌有毒物質引致角膜發炎，無法斷尾，須長期用藥控制。

話你知

滴類固醇眼藥水，藥水會沿住淚腺管道直通鼻腔、喉嚨，繼而進入血管。想減少身體吸收類固醇，記得滴後壓緊眼頭與鼻樑間位置三至五分鐘，令藥只停留在眼球表面。

濕疹膏　類固醇含量低

除治療眼敏感外，類固醇亦常用來醫濕疹。翁先生的三歲囝囝晉晉，睇落皮光肉滑，但原來兩個月大時，都有過一段濕疹辛酸史。「可能受我遺傳，晉晉好細個時試過成身都係濕疹，塊面尤其嚴重，試過紅到似燒傷，又流膿，佢覺得痕時，都會不自覺捽幾捽。」兒科醫生為晉晉處方外用類固醇藥膏，翁先生初時都幾抗拒，「聽講搽得多會有副作用，皮膚會變薄，所以初時都有猶豫過用唔用。後來我上網搵資料，發覺藥膏含類固醇的分量好低，加上醫生話只要跟足指示適量地搽，無乜副作用，所以都安心搽。」除藥膏外，翁先生定時定候幫晉晉搽潤膚膏，注意補濕，又轉飲低敏奶粉，雙管齊下，濕疹在一個月內已大致康復，轉季或乾燥時才偶有輕微翻發。


晉晉兩三個月大時，曾經俾濕疹搞到爛面，好彩爸爸及時求醫，適當使用類固醇藥膏，控制病情。


陳熠醫生解釋，類固醇噴鼻劑可直接噴入鼻黏膜內，有效抑制發炎細胞。鼻腔結構複雜，通道狹窄彎曲，藥物大部分黏在鼻黏膜內，甚少會吸進身體。


針對市民濫用或抗拒使用類固醇的極端情況，香港醫學專科學院最近召開記者會，請來各科醫生講解如何正確使用類固醇。

兒科專科醫生蘇傑榮指， BB免疫系統發展未成熟，患濕疹乃常見現象，而使用類固醇藥膏時，家長無須過慮。「開俾 BB的類固醇藥膏，強度和劑量都最低，而且只須薄薄一層搽於患處，副作用低。好多家長對類固類的理解好片面，只記住副作用，卻不接受它在治療上帶來的好處，好難搞。」皮膚科專科醫生陳珮瑤亦同意，「若家長堅決不讓小朋友搽類固醇藥膏，情況等同想醫好病但唔食藥，最終未能控制病情時，濕疹惡化會引致皮膚變厚、色素變深及因抓損而易受感染。」

搽藥膏法則

雖然外用類固醇藥膏副作用低，但長期亂用，會引致皮膚變薄、色素變淡等問題，因此勿犯以下大忌：
勿自行停藥，或斷續用藥，否則容易翻發，應按醫生指示用藥。
勿胡亂增加搽藥次數，須按醫生指引定時使用。
勿搽太厚，薄薄一層搽勻於患處即可，分量太多會增加身體對類固醇的吸收。
勿自行塗於臉部、眼皮、腋下、下體等皮膚較薄的位置，會增加身體吸收類固醇的分量。
勿在患處康復後繼續長期使用。
資料提供：皮膚科專科醫生陳珮瑤

噴鼻劑副作用低

類固醇噴鼻劑屬局部性類固醇藥物，大部分只在鼻內吸收，因此相當安全，香港浸信會醫院耳鼻喉科中心顧問醫生陳熠指：「曾有謬誤指多用類固醇噴鼻劑會令鼻黏膜變薄，但有醫學研究證實，病人持續噴半年甚至五年，鼻黏膜厚度及結構都沒有明顯變化。」

注意以下安全使用建議：
持續使用一至兩星期，直至敏感症狀消失。
敏感症狀消失後，可跟醫生指示調節用量。
避免讓噴嘴打直或向鼻中隔方向噴，應朝鼻翼方向打斜噴，可避免鼻中隔受傷流血。

話你知

想瞭解類固醇噴鼻劑、吸劑、眼藥水的安全使用技巧，可瀏覽香港醫院藥劑師學會設立的「藥物教育資源中心視頻」，提供教學示範短片，值得參考。
網址： http://www.youitv.com/partner/derc
撰文：吳穎湘
攝影：吳卓凡