雖然踩單車人數愈來愈多，但最激嘅MTB始終唔多人夠膽接觸，原因都係怕山路崎嶇易生意外。不過，最近想入門玩MTB嘅車友就有福嘞！除咗上年年尾 喺大帽山啟用嘅越野單車體驗徑可以初嘗MTB樂趣外，最近由漁護署、單車聯會及香港越野單車協進會共同開發嘅田夫仔北段越野單車徑已經啟用，聽聞仲非常啱 新手玩添！ 今期就帶各位深入呢條全新越野靚路，仲請埋專家帶踩一轉，話你知入山踩車唔係難事！
要進入呢條最新越野單車徑，其 實交通都唔算好方便，因為單車徑坐落於大帽山中，即使有馬路亦都係漁護署禁區，所以唯一進入方法，就係拎住越野單車許可證沿住原有嘅大欖郊野公園越野單車 徑進入。雖然稱之為越野單車徑，但由荃錦段踩至田夫仔段全程都只係石屎路，越野單車新手行呢度最安全。
山頂出發最輕鬆
至 於喺邊度出發最好？如果上山同落山有得揀，當然揀最慳時間、最慳力嘅落山啦！所以由大帽山頂燒烤場公眾免費停車場出發，經荃錦段單車徑落5km山最方便。 到中段玩完田夫仔北段最新單車徑後，更可順勢經田夫仔段石屎路落4km玩埋大欖桶水塘越野單車徑，長度7km比田夫仔北段難少少，不過熱晒身兼玩過田夫仔 北段新手都一定冇問題！玩完踩多少少去埋黃金海岸都係約需3個鐘，再畀約$140叫客貨車返大帽山拎車最perfect！想再慳？幾個朋友一齊share 車錢就可以慳到盡嘞！
1.免費泊車慳盡
大帽山嘅郊野公園、燒烤場都有唔少免費泊車位，建議先泊荃錦公路近大帽山郊野公園入口燒烤場嘅公眾免費停車場，約有10個不劃線車位，可以過少條多人飛車嘅荃錦公路。
2.閘口登記進入
入閘後就會先上約1.5km斜路，斜度唔會太高，慢慢上需時約20分鐘，間中都會有平路唞吓，之後落山會舒服好多。
3.落10分鐘即到
上完1.5km斜左右開始落斜，沿路都有幾個分岔位，不過跟住「大欖涌水塘」或「田夫仔」路牌行就冇問題。10分鐘左右就會見到大大支刻住「大欖越野單車徑」嘅木柱，代表已到田夫仔北段單車徑，後頁我哋會詳細介紹！ 田夫仔段 新路入口旁有塊小草地，入面有輕量級獨木橋同木條障礙，可以練平衡同車頭定力。
4.沿路落斜離開
玩完最新田夫仔北段單車徑，可經返回田夫仔段石屎路繼續落山離開，田夫仔段全長4公里左右，而且急彎比荃錦段仲要多同斜，唔使點踩一路落斜都幾似揸緊電單車。
5.玩埋環塘靚徑
由田夫仔北段落至田夫仔尾段約需20分鐘，跟住「大欖涌水塘」路牌繼續踩一小段平路就會到達一塊大草地，圖中小橋就係大欖桶水塘越野單車徑入口之一，亦即係MTB車友一定識嘅「環塘」嘞！
6.小心陰濕路段
玩完「環塘」，可以沿住馬路去屯門掃管笏，即係黃金海岸附近，當左邊經過水塘大壩後，會有路牌標示禁止踩單車，所以要落車推10分鐘車到禁區閘口先可以繼續踩至掃管笏路。 旅程接近尾聲，當然要食嘢慶祝吓！其實沿掃管笏路直踩再轉入管青路，見到右邊露天停車場入去再上斜30秒，就會見到一間叫山頂茶寮嘅食肆，內有凍飲同中、西飯麵供應，消費約$40/位，幫親仲有水喉可以洗吓單車，亦可睇住愛駒食飯，夠晒安全！
7.山中隱秘食點
山頂茶寮 電話：2452 6661 營業時間：11:00-21:00（年中無休）
8.油站上車方便
食完嘢回程可致電客貨車call台安排司機接送回大帽山頂，不過唔係每位司機都識去掃管笏，所以約喺黃金海岸斜對面嘅油站司機會較易明白，返上山頂需時20分鐘，收費約$140非常公道！
深入2km越野新路
今 次嘅主角全新田夫仔北段越野單車徑，計劃時間用咗2年，直至今年1月先由國際越野單車協會專家帶領數十名義工開掘，全長2km之前嘅比體驗徑長近6倍之 多，今次為我哋示範嘅香港越野單車協進會幹事Kenneth表示，其實呢條新路可以話係體驗徑嘅進階版。「田夫仔北段越野單車徑有70%係 offroad，路面質素同體驗徑非常相似，不過彎、上落斜都比舊有體驗徑多，而且亦比體驗徑窄。雖然對老手唔係好大挑戰，不過新手用嚟練車都幾全面，而 且只限單向行車夠晒安全，操番2、3轉肯定對操控有改善。」事不宜遲，就等Kenneth帶大家睇吓呢條新路要點！
Start 1.出發上斜熱身
單車徑入口同出口都係喺同一地點，出發直入先上800米石屎路長命斜，筆者試踩上去都幾吃力，唔知Kenneth又點睇？「斜度唔算好斜，不過都幾長吓，用低波慢慢踩上好過一次性爆上去咁浪費體力，因為呢條路只佔全條田夫仔北段30%。」
2.頭段連續快彎
上完斜見到另一條刻上「大欖越野單車徑」木柱，右面就係進入offroad路段嘅入口，先轆過幾條用嚟鞏固入口泥地嘅木條，之後就會到連續彎位。「入呢個連續彎好考線位，新手可以先扭軚熟習、老手可以駛上外彎坡瞓彎，新、老手都有嘢練㗎！」
3.崖邊靠右安全
片完彎開始會有輕微上落路段，雖然路面鋪到好平，但都要小心左邊山崖。「呢度大部分山崖都係喺左邊，靠右踩可以減少跣落去嘅機會。因為香港MTB山路大部分都係一邊山坡，另一邊係山崖，所以呢度可以令新手習慣喺山崖邊踩車感覺。」
4.髮夾窄彎落斜
踩完一段崖邊路，就會經過全段第一窄彎，筆者都要試兩次先可以成功過到。「呢個彎除咗窄之外亦都非常之急，即使老手都要收到好慢再勁扭軚先至過到，新手練好呢個位，基本上全條路啲彎位都難唔到你！」
5.路睇清防撞樹
入 得山當然有樹木，過完髮夾彎落斜，途中落斜會發現有棵樹喺路中出現！「落斜當然要睇清楚前面啦，好似呢度見到棵樹，就要睇吓左面過定右面過，好似我架車把 手長，行左邊一定撞樹，所以我會揀行右邊穩陣啲！」過咗呢個位踩多3分鐘就會到出口，完成晒大約用13分鐘，新手絕對玩得過！ ####
香港越野單車協進會幹事 Kenneth Lam
路比較窄，Kenneth話呢度用好似XC 680mm以下嘅把手就最好嘞！
出口有路牌禁止單車逆走，有良心車友記得守規則呀！
沒有留言:
張貼留言