阿爺唔想流選要計數 唐唐有勝算

首跑馬仔已到尾段，仲有幾日就過終點，但到呢個時候，鹿死誰手仍然好難睇，聽講澳門有人開賭盤，買唐唐一賠一，買振英哥一賠○點四，暫時一號馬熱少少，但莊家冇政治內幕消息，可能受某方放煙幕影響，只係估估吓，大家千祈唔好咁快落注。

上星期辯論擂台開打，唐唐出其不意向振英哥掟出兩個震撼彈，即時引起哄動，泛民已聲言緊急行動窮追猛打，公眾亦多咗人將信將疑，殺傷力勢於未來數日擴大，直接衝擊振英哥民望，亦影響阿爺嘅最後傾向。

阿爺極唔想流選發生，假如吹雞投振英哥，佢都未必夠六百票，可能流選收場，唐唐支持者冇動搖，鐵票多好多，只要多百幾票就可勝出，唔使流選。

政壇高人分析唐梁勝算，認為唐唐雖處民意下風，但贏出機會正在回升。條數點計？佢話，振英哥獲三百一十票提名，現時未表態嘅選委三百幾個，其中估計約一半投畀佢，加埋都只係四百五十票左右，贏唔贏就睇另外一半點決定，以及泛民同唐營有冇票過畀佢。

高人指，由於唐營嘅四百鐵票至今仍然好穩，一批未表態嘅商界選委亦傾向唐，泛民二百票則大部分投白票或投仁哥，唔會畀梁，就算有都只係少數，假如阿 爺最後揀梁，吹雞號召選委投去振英哥嗰邊，佢最多亦只可以多一百零票，加加埋埋都過唔到六百票，結果係流選收場，重新洗牌，兩個月後再選過。
坊間的確唔少人買流選，但阿爺絕對唔想發生，必定出盡最大力度阻止。高人分析，今次選舉搞出個大頭佛，阿爺已經煩到死，如果最後冇人跑出，要再選一 次，必有更多各方神聖爭相入閘，加入呢場遊戲，例如葉劉同曾鈺成表示過會參賽，范太分分鐘捲土重來，振英哥同唐唐亦唔會罷休再入場玩過，結果七國咁亂，嘩 鬼滿場飛，到時阿爺就更難控制。對阿爺嚟講，流選唔可以解決亂局，只會繼續添煩添亂，永無寧日。須知七．一就到，中共十八大又將於稍後舉行，阿爺梗係想快 啲搞掂香港檔攤，唔想多個難題兼顧。

如果阿爺要確定唔出現流選，較佳選擇反而係唐唐。現時唐營仍穩握近四百鐵票，大部分人冇動搖過，對手好難撬得甩，至今未表態嘅選委，亦有一定人數會 挺唐，加埋已超過五百票，若然阿爺吹雞撐唐唐，佢再多百幾票（包括左派及部分原本挺梁嘅選委）應冇問題，咁就可勝出，唔使流選。

假如唐唐當選，社會必然有反彈，輿論亦會嘈到拆天，泛民更加趁機狂砌小圈子選舉，打擊政府威信，但高人認為阿爺應該盤算到，寧願咁樣亂一輪，好過選舉亂局沒完沒了，搞到香港嚴重撕裂，內耗不斷，結果只會更大鑊。

高人仲指出，阿爺亦會考慮如果振英哥贏咗，工商界好難同佢合作，特區政府若得唔到工商界支持，以後施政都幾惡搞，對經濟肯定有衝擊，阿爺對此絕唔會低估。