檸檬酒雞仔蛋糕

一連四日復活節假期，陪囝囝囡囡一齊做應節甜品，其實係最好親子節目。畫畫復活蛋圖案太單調喇，發現四季酒店餅房主廚Chef Gregoire最新創作的雞仔蛋糕、兔仔耳macaroon、紅蘿蔔cupcake，造型可愛感覺開心，當然要他公開做法，教教大家做公仔蛋糕技巧︰ 「這款Limoncello Chicks（檸檬酒雞仔），我們暱稱Happy Birds，復活節應該是色彩繽紛的，春天嘛，甜品都要紅橙黃夠colorful，小朋友睇見會好開心。」大廚仲講笑話靈感來自近期熱爆apps界的 Angry Birds！

做法不複雜，最緊要肯花心機︰「弄碎蛋糕加酒和butter cream，濕濕哋就可以搓形，隨便一個海綿蛋糕，甚至吃剩的蛋糕也可以用。腳、翼、嘴巴等是上了色的杏仁膏，記住逐少用掌心搓成粒粒，再輕輕搓出尖端， 就可以砌形，一兩個鐘待風乾就可以了。完成後不要放入雪櫃，太凍杏仁膏反而會溶。」每隻腳趾、翼上每條紋都要手做，可以想像完成一隻雞仔有幾花時間，大廚 卻打算將雞仔放在The Lounge復活節自助餐桌上，即係，一日要做幾百隻！確實佩服他的認真和一絲不苟。 

這種態度，不只在廚藝方面︰「我十六歲已經學廚，發現管理層和廚師總有爭拗，很想親身經歷一下，了解對方難處，所以前幾年去了修讀酒店管理，畢業 後去酒店做餐廳經理。不過始終最愛整甜品，最後還是做回廚師。」來港後出過三本食譜，第一本賣光，出版社問他要不要稍稍修改再出版，結果？「我什麼都想 改，最後出一本新的！」由一隻復活節雞仔蛋糕、一本食譜，以至事業工作，全部充滿熱誠，今次學到的，不只做蛋糕。
材料
海綿蛋糕：210克 檸檬酒（Limoncello）：200毫升 牛油：30克 糖霜：15克 檸檬：1個 杏仁膏（marzipan）：適量 食用色素（紅、黃）：適量 白朱古力、菜油：適量
步驟
1. 牛油及糖霜攪勻成軟牛油。捏碎海綿蛋糕，放入大碗中，加入軟牛油及檸檬酒，再削小量檸檬皮及搾檸檬汁，拌勻。
 2. 放入雪櫃雪半小時後，取適量，以手掌心搓成蛋形作雞仔身體。
 3. 放入冰格冷藏15分鐘，同時間，將白朱古力、小量菜油及黃色食用色素放入微波爐加熱至溶，拌勻顏色。
 4. 取出蛋形蛋糕，以竹籤刺入蛋的頂部，趁蛋糕仍冷時蘸入暖的朱古力漿中，隨即取出，讓蛋外包上一層薄薄的黃色朱古力。輕輕轉動取出竹籤。
 5. 杏仁膏以紅色及黃色色素，調成紅、橙及黃色三種杏仁膏備用。
 6. 橙色杏仁膏做嘴及腳︰取小量，以手心搓成粒狀，再搓長條及兩端尖端，成一隻腳趾，重複六次，砌成兩隻腳。另一支做雞嘴。
 7. 紅色杏仁膏︰以相同方法搓長條五條，砌成雞冠造型。
 8. 黃色杏仁膏︰壓扁，用模輔助切出兩隻翼，幾條痕。
 9. 黃色朱古力漿用作黏合，先塗小量於翼背，黏於雞身上。輕輕按扁雞腳後方，另替雞嘴造型，黏於雞身上。
 10. 塗小量朱古力於蛋糕頂的竹籤洞位，黏上雞冠，最後用朱古力點上眼睛。

Gregoire Michaud 閔言樂
來自瑞士，16歲入廚藝學院修讀4年課程，99年來港於前麗晶酒店當餅廚，其後加入四季酒店，於馬爾代夫及愛爾蘭任職，05年香港四季酒店開幕時再來港，現為餅房主廚。曾出版《麵包教室》、《法式甜品教室》、《芝味甜品》三本食譜。