親子夾 Band 反功利

Scroll Page | Stop Scrolling

Tweet

Pin it

Widgets

Keyword:美容,生活,购物

八歲的諾言仔打起鼓來，投入得嘴巴緊閉， rock味十足。爸爸常為他拍短片之餘，亦會帶他去夾 band、聽演唱會。將來回憶起來，童年除了讀書，還有一段快樂的搖滾生活。

親子夾Band　反功利

親子夾 Band　反功利

近年細路好忙，功課壓力本已爆煲，課餘時間仲要上興趣班練到「周身刀」，只為儲多樣「本錢」搏入好學校。但社工話，家長太現實只會適得其反，如果小朋友無興趣學，根本難以堅持重複性的練習，半途而廢之餘亦會破壞親子關係。
在怪獸家長冒起的時代，卻有一班家長「反潮流」，只想細路輕鬆學樂器，有個快樂的童年。今期兩位家長，一位同囝囝享受搖滾樂，一位又唱又跳陪學結他，將學樂器「去功利化」。

Keven習慣拍下囝囝打鼓的片段，放上 YouTube跟朋友分享，諾言重溫比賽片段時亦笑笑口話：「好想記番起嗰個時刻。」

熱鬧的林宅是一個搖滾小天地，事關裡面有位八歲的小鼓手諾言。他一個小 身軀坐在一大座爵士鼓前，全神貫注地跟着五月天《三個傻瓜》的旋律敲打，首歌內容正正「反潮流」，講三個只識拼命讀書向上爬的細路，為學業放棄玩樂時間， 到十九歲只換來五張證書，一轉眼光陰老去，美好的回憶沒有剩下幾多。不曉得諾言仔對歌詞的理解有多深，但他打得相當投入，認真得嘴巴緊閉，像極一個「 rock友」。

搖滾父子

爵士鼓由多種敲擊樂器組成，如小鼓、大鼓、銅鈸等，陣容龐大，諾言四歲時人仔細細，一坐在鼓前就似被重重包圍。（相片由 Keven提供）

任職警察的爸爸 Keven喜歡一路揸車一路聽 Beyond的歌，所以諾言仔自細聽 Beyond的歌長大，潛移默化之下愛上搖滾樂。他四歲開始學打鼓，當時人細鼓大，學起來有一定難度， Keven話：「諾言個子唔算高，亦唔算健碩，所以打鼓時經常俾老師話佢唔夠力。不過，爵士鼓比其他樂器有樣優勝之處，就係只要拍子啱，有時打錯咗都唔會 俾人發覺，令諾言仔打得更起勁。」
諾言亦話：「開頭爸爸叫我試吓適唔適合自己，學學吓都覺得適合，因為我自細已經鍾意喺屋企敲吓盒，整啲聲出嚟， 好似好得意咁。」頭三年，家中未買鼓，媽媽 Sammi好有心機，集齊了七八個大大小小的紙盒，根據爵士鼓不同組件的位置，砌成一個小模型，俾諾言敲打練習。後來爸爸見諾言打得有板有眼，不是三分鐘 熱度，便買了一套電子鼓給他，並將「紙盒鼓」丟掉，諾言回家見紙盒鼓不見了，非常傷心，至今一直耿耿於懷。
諾言學識打鼓令父子感情有增無減，除了 有共同偶像，更躋身爸爸的朋友圈子。「朋友有間 band房，我有時會帶諾言仔去夾 band，朋友彈結他，阿仔打鼓，我唔識玩樂器，唯有唱歌。夾 band時，阿仔忽然變咗我朋友咁，感覺好特別！我哋仲會一齊去唱 K、睇演唱會，今年先睇咗黃家強、五月天演唱會，好開心。」他亦會在教會中任「司鼓」（崇拜中的鼓樂伴奏），有很多機會實踐所學。

打鼓無助學校面試

媽媽造的「紙盒鼓」由各式各樣的紙盒砌成，還配以金屬罐、膠扇，以紙皮作踏板、紙卷作鼓棍，非常別致。（相片由 Keven提供）

最初 Keven鼓勵諾言學爵士鼓，都為求易考學校，「老實講，因為知道小學要學生『一體一藝』，所以當年想佢揀樣樂器，等佢有一技之長，有助入讀心儀學校，但知道好多小朋友都學鋼琴、吹笛等，所以揀了較冷門嘅爵士鼓，希望更突出。
「後 來去學校面試時，我個人覺得有無學樂器根本一啲幫助都無，因為最睇重係小朋友臨場表現、英文程度、由邊間幼稚園嚟。記得有次面試，係要小朋友用英文介紹一 本書，我事前同諾言仔揀咗本薄薄哋的英文書，練習了將近一個月，結果去到，見其他細路係拎住本《 Harry Potter》原著咁厚的書入去，真係好誇張！後尾考唔成，都明白咩原因。」 Keven覺得，小朋友童年好寶貴，與其逼得太緊，不如好好享受，便放棄了揀名校。
香港基督教服務處兒童之家服務總主任梁李紫薇亦同意，「學樂器 對升小學的幫助不大，反而升上中學後，學校多數鼓勵學生『一體一藝』，旨在平衡發展，免得家長只專注學業。不過好多家長本末倒置，以為學多幾樣樂器『鬥 叻』，但練習樂器過程艱苦，如小朋友無興趣，即使考到級都會半途而廢。」

比賽壯膽

諾言雖然活潑開朗，但 Keven覺得他自信心不大，於是去年開始，幫囝囝報一些音樂類的兒童天才表演，讓他嘗試站在台上面對觀眾。諾言話：「第一次上台都幾緊張，爸爸教我一個 秘訣，就係望住台下評判同觀眾嘅額頭，唔望對眼就無咁驚。」結果順利邊打鼓邊唱完一首《我是憤怒》，更獲得冠軍。 Keven話，諾言自始信心大增，即使其他非音樂的活動，例如踢足球、攀石、畫畫等等，都比以前大膽參與。弟弟諾行見哥哥打得好開心，都自薦學爵士鼓。
「可惜香港無純爵士鼓比賽，最近要去到台灣先有。為咗想諾言見識一下爵士鼓的高手，今年特地帶他去台灣參加比賽，順便一家去旅行。甚至遇到街頭表演爵士鼓的高手，一大座鼓放在街上打，好震撼，我都想有一日諾言可以在香港街頭表演打鼓。」

「 We all live in a yellow submarine, a yellow submarine, yellow submarine……」九歲的匡仔只要拎起夏威夷小結他，手指就忍不住彈個不停，還樂於自彈自唱，令整個訪問穿插着他快樂的歌聲和結他聲。

彈結他減壓

全職媽媽 Mandy話，俾匡仔學樂器，純粹想囝囝開心，「我唔鍾意要佢為咗考試、攞好成績、入好學校而學樂器，亦唔係為咗要實現爸爸媽媽的夢想，而係要佢自己鍾意。當初佢自己講話想玩結他，佢玩得好開心，平時在家會一路彈一路唱歌、郁身郁勢。
「一 放學回家就彈結他，彈一陣就做功課，有時做做吓個腦諗唔到嘢又走去彈一陣輕鬆吓，我就係鍾意佢咁，如果要佢去考試、比賽，佢壓力會好大，反而未必會想成日 彈，亦彈唔番平時的水準。」匡仔插嘴：「反而彈得多俾人話呀！」媽媽答：「因為佢有時飯都唔想食，要繼續彈，呢啲時候就要限佢只准彈十分鐘。」

問匡仔平時在家如何跟媽媽 jam歌，他已立即 The Beatles上身，一腳踏上石櫈自彈自唱《 Yellow Submarine》，媽媽即在旁又唱又跳，引來途人停低睇 show。

匡仔同馬仔老師老友鬼鬼，老師仲讚匡仔記性好，彈琴時可以不用睇譜，且樂於自由發揮，建立個人風格。

教埋阿媽彈

夏威夷小結他比結他少兩條弦，加上用較軟身的纖維線，較易上手。

匡仔在家又彈又唱，令屋企充滿歡樂，話題亦多了， Mandy笑住話：「我會同佢一齊玩，兩個人傻吓傻吓喺屋企踢腳，爸爸放工返屋企都會同我哋一齊玩，佢性格比較內斂，但都會一路唱『 Hey!』搞氣氛，我就會跳埋舞。」遇到匡仔想彈的歌，就會叫媽咪上 YouTube搜尋，或者索性打俾結他老師馬仔，幫忙搵譜。
匡仔學夏威爾小 結他約一年，目前識彈的歌雖然不過十首，不過已經做埋「小老師」教人彈，學生就係 Mandy。「匡仔話如果我唔識彈，就唔明白佢學小結他嘅難度喺邊，所以就由兩個月前開始教我彈《 Twinkle Twinkle Little Star》，暫時我只識彈單音，唔似佢咁識彈 chord。首歌係由匡仔揀，佢話呢首易啲。」匡仔「招積」插嘴：「唔係易啲，直情係好易！」逗得媽媽哈哈大笑。「我無音樂底，細個時曾自學過電子琴，以 前個年代學樂器好貴，細個家境唔好，無機會學，而家叫做負擔得起，想俾匡仔自由發揮。」

學樂器錦囊

學樂器不是入好學校的「入場券」，而是可幫助小朋友培養興趣、陶冶性情、減壓、擴闊社交圈子，並因練習過程的艱苦而可訓練耐力，家長有以下須注意：

資料提供：香港基督教服務處兒童之家服務總主任梁李紫薇

帶豆丁享受音樂

十二月是普天同慶的聖誕節，陸續有不同的親子音樂活動，以下搜羅一些街頭免費活動，一於帶細路去感受音樂氣氛。

免費戶外藝術節「自由野」
日期● 12月 14及 15日，下午 3時至晚上 10時
地點●西九龍海濱長廊
節目●樂隊、街舞表演、讀書會、當代馬戲表演及工作坊、草民音樂節等節目。（由即日起接受網上登記索取門票）
網址● http://www.westkowloon.hk/tc/freespacefest

非常聖誕音樂會
日期● 12月 14日，晚上 7至 9時
地點●中環碼頭（近 10號碼頭）
節目●漢基國際學校爵士樂隊、香港國際學校弦樂四重奏、香港青少年管弦樂團等表演，參加者自攜餐盒野餐。
網址● http://www.hkgna.com

話你知

想讓小朋友認識不同敲擊樂器的音色，可瀏覽教統局設的網頁「敲擊樂器 Percussion Instruments」，內有四十多種常見樂器的資料、演奏片段及試彈遊戲。
網址： http://resources.edb.gov.hk/percuss

康文署「音樂事務處」不時為有意學音樂的青少年舉辦不同免費或收費低廉的活動，如樂團音樂會、樂器工作坊，有興趣者可不時留意活動更新。
網址： http://www.lcsd.gov.hk →「文化」→「表演藝術」→「音樂事務處」

撰文：吳穎湘
攝影：吳超德、陳健邦

QR code this page

 免責聲明. 本網站所載資料只供一般參考之用。我們會竭力提供一個方便、實用而且資料豐富的網站，並確保一般的資料準確無誤。但並不對該等資料的準確性作出任何明示或隱含的保證。

大齡父母之路

Scroll Page | Stop Scrolling

Tweet

Pin it

Widgets

Keyword:美容,生活,购物

「大齡父母」總令人聯想到與體力不繼有關，但爸爸陳冠豪笑言：「我未到七老八十，都仲追到佢。」
但為切合主題，兩名演員即時扮演「老到跑唔郁」，七歲的兒子健御見狀即哈哈大笑奔跑。

大齡父母之路

現年五 十一歲的潘芳芳，是典型香港遲婚女士，年輕時為事業拼搏，四十二歲才與任職電台 DJ的丈夫陳冠豪結婚，翌年誕下兒子健御，笑問是否婚後急急密謀造人大計，她即哈哈大笑：「其實嫁得出，我阿媽都已經好開心！我哋覺得二人世界好舒服，所 以一直無諗過生小孩，大家都好熱愛工作，亦覺得人生有個相知的伴侶已經好完美，加上我結婚時都年過四十，心理同生理上都覺得唔會有得生。」怎料，在無心插 柳下，小生命已悄悄孕育，面對兩代的年齡鴻溝，她自有一套方法應付。

潘芳芳雖屬高齡孕婦，但並未受懷孕不適影響，舞台劇照演，司儀工作照接，儘管忙碌，但仍未見疲態。

「我以前都試過經期唔準，所以婚後兩、三個月無來經，都不以為意，有晚 同老公提起，佢即時問我『係咪有咗』，我個心都覺得應該唔係，姑且去驗孕，醫生笑笑口恭喜我時，我都唔信，即刻搵另一個醫生再驗，結果都係有喜，我當時真 係呆咗足足一個星期，個腦不停諗：『未來半年的工作都排到密麻麻，拍劇、電台主持、司儀工作，仲要做舞台劇女主角，大住個肚點做？』」
雖然明知高 齡產婦風險高，但夫婦二人深信孩子為上天的禮物，所以決定生下孩子，亦無特別惡補高齡產婦懷孕須知，只如普通孕婦一樣，進行常規的產前檢查。猶幸，芳芳得 天獨厚，孕吐、水腫等不適問題從未在她身上出現，懷孕期間的工作亦能順利完成，連舞台劇導演亦特地加入女主角懷孕的元素，她笑言：「佗仔的過程尚算輕鬆， 可能因為我事無大小例如餵奶、做司儀，都會同肚裡嘅 BB講定，佢真係好似聽到咁，唔會踢我影響到我的工作，加上胃口亦無問題，丈夫亦照顧周到，整個孕期都好開心好順利，所以擔憂都少咗。」
夫婦原先 選擇順產，以秉承順應自然的風格，但在最後一次產檢時因產道出血，為保母子平安，所以在醫生建議下剖腹生產。親歷孩子出生的陳冠豪，坦言當時又緊張又興 奮，「我望住個仔出世，真係好感動，佢填補咗我人生中『下一代』嗰塊拼圖，雖然我都擔心過年紀有番咁上下，會唔夠力照顧，唔夠氣力同佢玩，所以食煙飲酒應 酬免得就免，不過，我又唔係老到七、八十歲，而家同佢鬥跑都仲追到佢。」

接受事實　活在當下

數數手指，十年後健御只有十七歲，大學都未畢業，但夫婦二人早已步入花 甲之年。潘芳芳坦言：「我當然有諗過與囝囝年紀相差大的問題，亦好希望有機會睇到三代同堂，但這始終係事實，我只可以接受，其實人生無常，你根本唔知自己 幾時會唔喺度，所以驚咁多都無用，唯一可以做，就係要活在當下，同埋訓練佢獨立和成熟處事，當佢大人咁同佢傾偈同講道理，盡量安排相處的時間，我有時會帶 他返工，一齊參與配音、播歌，冠豪亦會帶囝囝彩排舞台劇，讓他了解我們的工作，開拓眼界，最重要係增加溝通的機會。」
除此以外，這對工作時間並不 穩定的父母，卻未有聘用全職家傭照顧孩子，目的只為做好親子工作。「我哋屋企唔大，又唔想住多個陌生人，所以只請兼職姐姐做家務、煮飯及接放學，我哋咁難 得先做到父母，真係唔想見到個仔攬住姐姐唔要我，所以無論幾忙幾趕，我哋都會夾好工作時間，盡量返屋企晚飯，我亦會講古仔哄佢瞓覺。」健御即時舉手搶答： 「媽咪晚晚都會講古仔我聽，若果我見佢好攰，都會叫佢講個短啲嘅古仔，因為我想佢早啲瞓覺，唔夠精神做嘢會做得唔好，仲會遲到添！」
記者所見，將升讀二年級的健御並無「港孩特徵」，他會自己用筷子食壽司，父母專心做訪問時，會在旁細心聆聽，不會打擾之餘亦無取出智能電話自顧自打機，面對陌生的記者亦毫不怯場，經常搶答問題之餘，更主動分享早前「便便唔同咗」的生活趣事，令在場人士笑不攏嘴。

餐廳筷子較長，健御因未能適應而夾散兩件壽司，父母見狀並無出手「相餵」，即場教他「揸低啲」對筷子，練習兩次，即可穩陣夾蛋。

訪問當日烈日當空，細心的健御除準備
乾濕紙巾用作抹汗及進食前抹手外，亦帶備太陽眼鏡護目，另外，更帶同媽咪
最愛的山楂餅作小食。

老來得子　怕縱壞

這對熱愛工作、享受自由的父母，在孩子出生後謝絕所有不必要的應酬，只要有時間，都要陪着孩子。

芳芳坦言曾經擔心會因過分愛錫而將兒子「縱壞」，所以想出一套理論： 「小朋友總有許多『想要』、『想做』的事，若盲目滿足，就會養出過分自我，不懂為人設想的孩子；但要求次次被否決，亦會影響孩子情緒，所以我會先理解他 『想』的原因，例如他想買玩具，就要提他『屋企都有好多玩具，你真係唔夠玩﹖』當每件事都與孩子有商有量，讓他明白被拒絕的理由是合理時，孩子便會學懂尊 重，所以我地咁着重與健御溝通。」
對於囝囝的懂事，冠豪笑言：「好彩我哋年紀大少少先做父母，因為我哋相對成熟，接受事物的能力亦較高，就算佢扭 計時，我都唔會亂向佢發脾氣，有耐性教佢同講道理，若果我仲後生，就會去追求自己的理想同事業，無可能抽到時間陪個仔成長，但呢一刻，我幾乎咩工作都試 過，而家最想就係做個好爸爸，對我而言，作為父親係一個新的挑戰和責任，令我的家庭觀念重咗。」
由原本無計劃生，至現時母愛洋溢的潘芳芳甜甜笑道：「雖然我年紀真係唔細，但我仍然好想生多個，讓健御有個伴，唔會咁孤單，因為始終世事難料，他日我哋兩個『走咗』，佢都有兄弟姊妹分擔吓，不過始終只係希望，我哋都唔會刻意追求，一切順其自然啦！」

正面解釋　年齡優勢

健御嬰孩時期，芳芳無論行出房間、餵奶等等動作都會通知他，視他如「小大人」般溝通。

聖雅各福群會中環樂寧兒童發展中心註冊社工梁翠雲表示：「同十年前相比，真係見多咗好多四字頭才生第一胎的父母，但當然，最重要係要有做父母的準備。」
正 常而言，高齡夫婦無論心理、處理情緒和壓力都會較成熟，起碼不會在「人有我有」的心態下懷孕，加上事業和財政都有一定的基礎，可較輕鬆地為孩子將來籌謀， 就算體力欠佳照顧孩子較為吃力，都有能力聘請工人協助。梁翠雲坦言：「其實當孩子懂性後，父母年齡秘密之門會慢慢打開，因為孩子可能看到你證件的出生日 期，又或家長日看到其他同學的父母很年輕時，便會問你尷尬問題。這個時候，父母應向孩子解釋，每個人都有不同的人生階段，只是爸媽年輕時選擇努力工作，當 生活穩定後才生孩子，所以會看來較成熟。」

成熟與老　只差一線

無論任何年紀的父母，都會想多陪孩子一點時間，芳芳認為：「人生無常，只要能活在當下，何須為未來擔憂太多。」

其實，當父母讓子女了解何為成熟時，除了口講，亦必須以行動配合。梁翠 雲憶述：「有一次，一名經常在中心玩耍的女孩，拖着一名白髮斑斑的男士，我問小女孩：『佢係咪爺爺呢？』詎料小女孩回應：『佢係我爹哋！』男士腼腆一笑， 我當時尷尬到不得了，亦感受到小女孩因而不開心。所以就算年紀大，家長們都不要任由老態浮現，要有『成熟』的外觀。」她補充。另外，當孩子知道父母的年齡 後，可能又會將「老」聯想到「死亡」，所以家長要在適當時候向孩子灌輸生死教育，讓他明白生老病死是人生必經階段，而且意外未知何時發生，所以要珍惜相處 的機會。
其實，對所有大齡家長而言，最擔心的事，莫過於孩子還未大學畢業，自己已達退休之齡。曾有家長因此耿耿於懷同孩子表示：「對你唔住，咁遲 才生你，要你照顧番我哋！」，但亦有家長常將「我哋就退休，等你養我」掛在口邊。梁翠雲認為：「大齡家長處理年老退休問題時要態度正面，亦不應將照顧父母 的重擔交予子女，因為『養兒防老』的心態已相當過時，試問一個剛畢業的大學生如何養家？所以應自小向孩子灌輸儲蓄習慣，讓他早為自己將來打算。」

現場直擊

當芳芳《恬淡情懷》節目開始後，陪伴在側的囝囝不時提醒媽咪歌曲播畢時間。

潘芳芳與丈夫經常帶囝囝一齊開工，為測試「寓親子於工作」的方法是否奏效，記者先考驗健御自行執拾出街隨身物品，再直擊他隨媽咪到電台開工的過程，睇吓佢係咪咁成熟先。
芳 芳帶我們進入直播室準備時，因現場正進行上一個直播節目，健御即打手勢提示記者不要作聲，亦不時從旁協助媽咪。因得知健御曾在新年時向聽眾講恭賀說話，故 記者建議他再度開腔，芳芳為免影響節目，考慮後讓健御向聽眾講「拜拜」，健御即趁播歌空檔興奮地練習，但媽咪播出最後一首歌前竟忘記讓囝囝「開咪」，健御 即失望嗚咽，媽咪笑笑口問：「你想講又唔提我？」健御扁嘴道：「我無諗過你會唔記得我！」芳芳即哈哈大笑：「下星期你陪我做節目時提我啦！」

QR code this page

 免責聲明. 本網站所載資料只供一般參考之用。我們會竭力提供一個方便、實用而且資料豐富的網站，並確保一般的資料準確無誤。但並不對該等資料的準確性作出任何明示或隱含的保證。

Scroll Page | Stop Scrolling

Tweet

Pin it

Widgets

Keyword:美容,生活,购物

在哥哥 Matthew（右）的薰陶下，妹妹 Maia（左）同樣情迷劍擊，兩兄妹學得認真，每日投放不少時間在家中練習。 

親壹親

唔做虎爸媽　教出自信兒

香港家庭教育學院上月進行調查，發現不少時下家長以取得一紙證書的功利心態，狂谷子女參加興趣班，但「虎爸媽」的苛刻要求，不單無助提升孩子興趣的培養，分分鐘打擊了他們的自信心，削弱抗逆能力。
本刊今期找來兩位有實戰經驗的爸媽，分享栽培子女的方法。一個從錯誤中得到啟發，明白因時制宜，尊重孩子的學習意願最重要；另一個則從一次驚險的行山經歷，發現每日的生活，其實都可以成為孩子抗逆解難一課。

興趣篇
從抗拒到願意

同是任職酒店業的 Michael和 Mandy，育有一子一女，長子 Matthew六歲升小一，幼女 Maia四歲升 K3。夫婦自言沒有上過什麼父母速成班，如何教兒育女，也是摸着石頭過河，當然他們亦試過碰壁，譬如兩人便曾一度跌入「早教」的迷思。
「而家人人都講『一生一體藝』，我哋都曾經好心急，希望個仔喺升小一之前，學識游水。四歲嗰年，囝囝第一次學游水，但原來佢好怕水，結果學唔識。」 Michael坦言，當時也有過一絲失望，不過，他害怕夾硬來，只會毀了兒子對學游泳的動力和信心。
於是他改變策略，用了兩個夏季，每逢星期日，帶兒子去西貢三星灣、半月灣的岸邊踢水、捉蟹、堆沙，希望幫助他克服畏水的心理，兩父子亦經常結伴到西貢海下灣玩浮潛，接觸美麗的海洋世界。
結果，父親的苦心並沒有白費，今個暑假， Matthew終於主動提出要重新學習游泳！「今次，佢學得好認真，上晝去完習泳班，夜晚仲叫我再帶佢去游夜水。早幾日，仲話要表演唔用浮板游水俾我睇。」雖然並非什麼大事，但看見兒子由抗拒、放棄，到兩年後願意再次嘗試和突破， Michael十分感動，也叫他明白到，小朋友學東西原來「唔急得」， timing很重要。

Matthew曾因畏水而不敢學游泳，爸爸 Michael（左）想盡辦法幫他克服，包括兩年來的夏天，經常帶他去沙灘堆沙、玩水，接觸海洋。 

Matthew今個暑假鼓起勇氣和 Maia再次學習游泳，並初嘗不用借助浮板暢泳的滋味。 

學習劍擊兩年的 Matthew，今年勇奪香港兒童劍擊錦標賽六歲組冠軍。

投入才留低

Mandy（右）雖然對鋼琴一竅不通，但為了表達對兒子的支持和鼓勵，她也特意請教老師怎樣數拍子，好陪伴 Matthew練琴。 

為了發掘子女的興趣， Michael和 Mandy讓他們報讀過不少興趣班，例如繪畫、跆拳、溜冰、冰球、劍擊等，但夫婦卻暗自有一套標準，決定哪些興趣活動可以留低，哪些要被叮走。
Michael表示︰「其實細路仔有得玩梗係開心，因為而家上興趣班，多數都係用玩嘅形式。所以，我係會用佢哋返到屋企，願唔願意再花時間練習，去衡量佢哋究竟係咪真係有興趣。
「我規定每項活動，佢哋每日都要抽時間練習，譬如 Matthew學跆拳，我要求佢每日拉筋十五分鐘，但佢唔願意做，所以我就無俾佢繼續學；相反，佢學劍擊就好投入，練習完全係自動波！」
採訪當日，兩兄妹便興致勃勃，嚷着要在記者面前示範表演，齊齊換上劍擊衫、戴着面罩，不斷作弓步、防守與進攻的戰術，來來回回也有百幾下，雖則大汗疊細汗，但還是沒有停下來的意圖。
「從 Matthew嘅學習態度，我哋睇得出佢真係有興趣。而家佢已經學咗兩年，最近仲攞咗香港兒童劍擊錦標賽六歲組冠軍。」

父母同行

假日就是他們的家庭日， Michael和 Mandy愛帶子女接觸大自然世界。 

相對於發掘，怎樣進一步栽培，往往更加困難。不少父母都以為，學東西是孩子自己的事，所以繑埋手督促他們練習就可以。但 Mandy卻不認同，她認為「同行」很重要。
「細路仔喺練習嘅過程之中，可能會遇着樽頸位，令佢哋感到有阻力，甚至想放棄。如果父母無嗰份同理心，又或者自己根本都唔識，只一味逼佢哋練習，最後可能只會搞到小朋友連興趣都無埋。」因此完全不懂得彈琴、節奏感欠奉的 Mandy，為了陪伴一對子女練琴，也特意請教老師如何數拍子。
「哈，原來彈一首歌，要數啱晒所有拍子都唔容易。所以我會更加體諒佢哋，尤其 Matthew節奏感比較弱，每次佢能夠流暢地完成一首樂曲，我都會戥佢好開心。」

 

當社工的 Connie堪稱「多產」，她有四名兒子，一對孖仔今年十四歲、三子十一歲、孻仔希希則剛滿六歲。講起各種各樣的興趣班，她有一套見解。「我從來唔反對家長安排仔女參加興趣班，即使我幾個細路都有報唔同嘅課程。但我就認為，唔少家長將太多心思放喺呢啲乜班物班上，反而忽略咗平日嘅生活。其實好多做人處事嘅解難能力，甚至而家好流行嘅所謂多元智能，家長只要透過生活實例，都可以讓小朋友領悟得到。」
像逢星期日的親子行山活動，就是 Connie刻意安排的「學堂」。「呢十幾年來，喺我哋屋企，星期日一定冇興趣班呢回事，我同老公多數會帶四個仔去行山，喺過程之中，大家各自分享吓對大自然嘅好奇、欣賞，呢啲咪專家口中所講嘅『自然探索智能』囉！」

解難篇
行山迷途　考驗應變

希希早前與家人雖經歷行山遇險，被困山頭一夜，但小伙子仍然處變不驚，最終獲救。（希希母親 Connie提供圖片） 

這些年來， Connie和丈夫率領兒子們征服過不少山峰，包括鳳凰山、大東山、大帽山等，但一家人亦試過兩次遇險，最新鮮熱辣的，就發生在上月尾，最終更要出動消防員拯救。
當日他們由大帽山經四方山往大埔小庵村，由於不慎迷路，導致晚上九時仍然在溪澗的下游摸索前行。為防意外發生，夫婦決定報警求助。
「當時我哋教小朋友最重要係冷靜，同時搵一個安全嘅地方歇息，再想辦法為自己保暖。雖然希希第一次遇險，但佢都好乖，冇扭計慌張，亦聽話無四圍走，後來仲瞓着咗。而三個哥哥亦好照顧細佬，打開晒啲遮幫佢擋風保暖，亦用背囊圍住佢，驚細佬喺睡夢中碌落水澗。
「等到凌晨兩點，終於有直升機在空中盤旋搜救，可惜地勢唔適合，降落唔到。我哋唯有再等，直到凌晨四點，攀山隊及消防員分別從水、陸兩邊營救，最後我哋喺消防員嘅帶領之下，終於喺清晨六點平安脫險。」或許，在別人眼中，這次的經歷太過驚險，但在 Connie看來，卻為孩子在逆境及應變能力上，上了寶貴的一課。
除了行山，還有「家務特訓」。已連續第四年的暑假， Connie刻意「送走」傭人，寧願讓她離港放一個月有薪假期，也要逼四名兒子吃吃苦頭，學習自理。「平日有姐姐照顧周到，佢哋永遠唔會做家務。但呢個月姐姐放假，連我都要落手落腳，佢哋就冇藉口唔幫手，總之人人有份，就算最細嘅希希都要做。」

家務特訓　強化智能

她笑言，做家務不單訓練到孩子的「肢體動覺智能」，提升四肢的靈敏度，亦因為四兄弟經常為家務問題擦出「火花」，透過溝通協商，亦有助加強他們的「人際關係智能」！
她舉例︰「最初抹枱、拖地係分開由唔同人處理，但後來發現唔 work，因為抹枱嘅，總係會粗心大意將垃圾掃落地，為拖地嘅製造麻煩。於是，四兄弟最後達成共識，嗰日輪到邊個負責抹枱，就要同時負責拖地。」
事實上，這個「家務特訓」安排， Connie認為讓孩子學懂煮飯、拖地、洗廁所等技能還是其次，最重要是讓他們學曉彼此體諒。「大家都輪流做過唔同嘅崗位，明白到清潔嘅質素、食物嘅水準，未必可以次次做到一百分，會少咗挑剔對方。另外，經過呢幾年嘅特訓，佢哋對工人姐姐嘅態度亦好咗，體諒到人哋嘅工作都好忙碌、好辛苦。」

由於暑假家傭放假，連六歲的希希都要負起做家務的責任。 

Connie（左）重視親子時間多於興趣班，她認為，家長就是孩子最佳的啟蒙老師。 

話你知

想拓闊孩子的眼界，不一定要報齊所有的興趣班，假日多帶他們外出走走，同樣可增廣見聞。香港教育城有很多親子活動好去處的推介，並附設交通、景點及美食貼士，資料實用。網頁︰ http://www.hkedcity.net 


為幫家長發掘子女的潛能和興趣，香港家庭教育學院在今個暑假，為香港挪亞方舟設計了一系列多元智能啟迪活動，讓小朋友寓學習於遊戲。活動由即日起至九月一日期間，逢星期六及日舉行。詳情請瀏覽網頁︰ http://www.noahsark.com.hk 

撰文：沈雅詩
攝影：許朝暉、吳卓凡

QR code this page

 免責聲明. 本網站所載資料只供一般參考之用。我們會竭力提供一個方便、實用而且資料豐富的網站，並確保一般的資料準確無誤。但並不對該等資料的準確性作出任何明示或隱含的保證。

Scroll Page | Stop Scrolling

Tweet

Pin it

Widgets

-->

Keyword:美容,生活,购物

打機有種魔力，不單只虛擬遊戲刺激，要攞分數過關亦比讀書考試易好多， Michael曾經俾爸爸逼得太緊，通宵流連網吧逃避現實。 

親壹親

解救機迷阿仔

中學生為打機同父母嗌交、引起家暴甚至弒親的新聞，常見於港聞版。社工發現，家長普遍覺得仔女打機影響學業成績，如用鎖機、拔插頭等高壓手段，反令矛盾更深。
今次個案的爸爸 Patrick都曾用高壓手段，卒之阿仔絕地反擊，幾個月通宵流連網吧。爸爸深刻體會：「就算你覺得電腦同智能產品係魔鬼，但因為呢啲係社會發展嘅洪流，我哋絕對鬥佢唔過，只能接受。網絡世界有無限資訊值得學習，倒不如想辦法同個仔扭轉關係，教佢好好利用。」

 

網絡世代出生的九十後，一機在手已掌握不同資訊，有獨立思想、不盲從權威，四十多歲的爸爸 Patrick親身體會到當中辛酸，風趣地說：「老婆喺產房生阿仔出來時，無生埋本說明書，只能參照番細個時阿媽點教。但上兩代都未有電腦，在刻苦的環境下長大，從來唔會因為上網、打機而起衝突，呢個係呢一代新起的問題，上一代高壓的教法已經唔適合。」

直升機爸爸

Patrick過往為 Michael安排的暑假時間表，除了充斥不同補習、興趣班及做功課時間，仲連梳洗、食飯、自由時間、瞓覺都要依足指示，慘過返學。 

Patrick自嘲為「直升機爸爸」， Michael是獨子，所以特別緊張，「過往一直監視住一舉一動，由佢出世開始，我已經有個劇本俾佢跟住行，頭十年喺我嚴密監控之下都相安無事，每日放學由我接佢放學，揸車『押』返屋企，再補習、做功課。」爸爸從事客戶服務工作，工作時間比較彈性。讀中二的 Michael忍不住插嘴：「我其實想放學有自由時間同同學吹水，曾以留校溫書為藉口，想自己返屋企，以為可蒙混過關，點知放學要打俾佢，搭火車差不多個個站要打去報平安。
「我自細無娛樂，生活就係返學、返屋企、補習，電視又俾佢鎖住，電腦又有『家長監控』程式唔俾玩，佢未返屋企就會不斷打電話嚟，遲咗聽就會問『做咩咁耐先聽？又去咗玩呀？』真係好大壓力。」 Patrick雖不算精於電腦，但原來當時為管住阿仔，會刻意研究，「做父母如果唔想仔女做一件事，一定會千方百計令佢做唔到。」回想以前的暑假， Michael就講到好勞氣，「我好憎暑假，佢編好晒每日時間表，一起身就要對住本書，所以每朝都去廁所扮『爆石』，實質想挨住牆瞓多一陣，但去耐咗佢就會好大聲敲門問『點呀？屙完未呀？』代表我快樂的休息時間完畢。」

打機起革命

當年效法北京奧運倒數， Patrick自製大考倒數日期表，貼在阿仔床尾，倒數日子每日更新，阿仔一起身充滿壓力。今日 Patrick回想，覺得自己做法好傻。（相片由 Patrick提供） 

逼得太緊，抑壓已久的 Michael，到了青春期終於識反抗。前年暑假， Patrick如常為 Michael編好時間表，兼且因為成績退步禁止打機，兩父子初則口角，繼而「肢體衝撞」，最終 Michael跑出屋門，拒絕再受監管。
初初撞口撞面都會鬧交，但後來阿仔直情當老豆透明，鬧就當耳邊風，打電話嚟亦唔接， Patrick完全掌握不到阿仔行蹤，無晒辦法。 Michael過了超過三個月「甩繩馬騮」日子，「放學返屋企執幾件衫就去網吧打機，打到通宵，第二朝喺網吧廁所換衫返學，上堂時瞓覺，放學又再打過，一日打五至十個鐘。其實打機真係好開心，因為玩得多易上手，身邊朋友又愈來愈勁，有競爭之下就好刺激。我鍾意玩射擊類遊戲，成功射低個人，『擊殺數』會上升。」
Patrick六神無主，唯有向社工求助，「當時學校社工省咗我一鑊。我話想同個仔保持朋友關係，佢反問我『你會限制你朋友幾點起身、食飯、去廁所㗎？』卒之鬧醒我，出發點為佢好但方法錯誤，等於好心做壞事。

老豆也打機

Michael升上中學，緊張的 Patrick依然定時定候去接放學，原意想阿仔早些返屋企，補習前有得抖一抖，點知變相令阿仔失去課後自由時間及社交生活。 

「我去網絡沉溺輔導中心參加家長組，識咗好多同路人，第一堂聽到不同家長分享，俾我好大衝擊。有啲細路打機打到自閉，成一兩年無出過門口，甚至發生家暴，原來我個仔已經算輕微。諗深一層，佢行為唔係太過火，只係無跟我個劇本去行，佢想打機啫，又唔係打劫做犯法事。加上當時我睇好多研究青少年心理的書，發現青春期的細路會受荷爾蒙影響，令佢產生冒險情緒，打機只係催化劑，問題關鍵在於家長接受唔到仔女的轉變而引起誤會。」香港基督教服務處「網開一面──網絡沉溺輔導中心」主任李展熙同意，「青春期是青少年建立自我形象、學做大人的階段，他們會逐漸不須依賴父母，容易令父母因失去控制權而感到不安，因此易起衝突。建議父母逐步放手，下放權力，讓青少年藉成長體驗學習獨立和責任感。」
為了解阿仔點解咁鍾意打機， Patrick嘗試打埋一份。「我發覺打機唔能夠一下子停低，因為佢可能在線上同人比緊賽或者建立緊成就，如果就咁拔插頭、熄機，佢未儲存進度就會前功盡廢，佢會覺得係一種挑釁行為，等同大人打緊麻雀你要佢即刻停，即係搞亂檔。」

握手言和

卒之有一日， Patrick主動踏出第一步同 Michael握手言和，「我同佢講 sorry，之前唔開心的事由得佢過去，我哋向前望。好多父母基於尊卑、階級觀念，即使自己失誤都唔出聲。但我希望做個榜樣，佢將來亦唔會怕道歉和承擔責任。」 Michael就話：「咁就算啦，雖然當時積住的怨恨都幾多，不過開始有自由制度，佢亦終於信任我。」 Patrick話：「我哋而家相處係基於尊重、合理的原則，我尊重番佢係一個獨立個體，可以決定自己的生活。相處間少咗壓力，有衝突發生時，佢就唔會刻意搞對抗。」
道歉者不一定是輸家， Patrick這一仗，不僅挽回一段父子關係，亦有意想不到的收穫。 Michael課餘時間回復自由，得閒同朋友食飯、踢波，選擇多了，反而少去網吧，「其實打打吓都會厭，可能之前連續幾個月日日打。而家屋企無再限制打機，都無必要去網吧。讀書方面都有進步，可能人大咗，慢慢覺得成績太差會唔好意思，就識發奮。」中心主任李展熙指：「大部分處理網絡沉溺個案的成功關鍵，取決於家庭關係能否修補，因此家長不宜急進，或執着於縮短仔女打機鐘數，個案須維持數月甚至一、兩年才解決也不出奇。」

既然阿仔鍾意打機， Patrick索性藉打機教仔，「讀書要認真讀，打機要認真打」，買埋攻略俾阿仔諗橋過關。 

兩父子關係改善，由面左左變成有傾有講，更不時透過 WhatsApp溝通， Patrick更在阿仔手機發現自己被稱為「大佬」，話關係可以用「 friend過打 band」來形容。 

Patrick主動向阿仔伸出友誼之手，專誠請阿仔的朋友去食大餐，以行動證明不再干預阿仔的私生活，亦順便認識阿仔的朋友。（相片由 Patrick提供）

話你知

爸爸 Patrick推介《家長抗「逆」手冊—— 365天了解少年心》（作者：香港青少年服務處外展社工，出版：星島）教家長面對仔女夜歸、煲電話粥、誤交網友等處境時的應對招數，定價$48。

打機打過火？

長對電腦、手機不離手，已經成為普遍社會現象。究竟點至係「網絡沉溺」？除了時間長，最重要的影響是生活失衡。

上網時間過長，一星期超過四十小時（工作、學業需要例外）
為了上網令家庭關係惡化
除上網之外沒有其他生活樂趣
為了上網令學業成績日差
只能透過網上生活建立自信及成功感

資料提供：香港基督教服務處「網開一面──網絡沉溺輔導中心」中心主任李展熙

話你知

家長想了解 Online Game的種類、術語、網上陷阱、沉迷上網指數測驗及預防方法，可瀏覽香港明愛青少年及社區服務「解開迷網網迷開解」網頁。
網址： http://ycs.caritas.org.hk/online_web 

點避免衝突？

仔女愈大，同家長話題愈少，如果家長一開口就問成績、鬧打機，好易起衝突。所以專家教路，同仔女溝通要有技巧。

不要對電腦存偏見，仔女成績不好不一定同電腦有關，可能有其他因素影響，如上堂聽唔明，所以要搵出問題根源。
話題不要只局限於學業和打機，如一開口就問：「讀書讀成點？」「你打完機未呀？」宜關心其他方面的需要或閒話家常，如問「今日學校有無咩無聊事？」「點解最近好似少咗踢波？」等，容易打開話匣子，令溝通融洽。
不要睇低仔女的能力，即使事情做得不好，仔女都想得到父母信任和支持。
不要妄加意見，如仔女主動向你表達負面情緒，父母只須做聆聽者和支持者，避免講「你應該……」否則似是命令。

資料提供：香港基督教服務處「網開一面──網絡沉溺輔導中心」中心主任李展熙

撰文：吳穎湘
攝影：許朝暉
插圖：祝健中