Scroll Page | Stop Scrolling

Tweet

Pin it

Widgets

Keyword:美容,生活,购物

在哥哥 Matthew（右）的薰陶下，妹妹 Maia（左）同樣情迷劍擊，兩兄妹學得認真，每日投放不少時間在家中練習。 

親壹親

唔做虎爸媽　教出自信兒

香港家庭教育學院上月進行調查，發現不少時下家長以取得一紙證書的功利心態，狂谷子女參加興趣班，但「虎爸媽」的苛刻要求，不單無助提升孩子興趣的培養，分分鐘打擊了他們的自信心，削弱抗逆能力。
本刊今期找來兩位有實戰經驗的爸媽，分享栽培子女的方法。一個從錯誤中得到啟發，明白因時制宜，尊重孩子的學習意願最重要；另一個則從一次驚險的行山經歷，發現每日的生活，其實都可以成為孩子抗逆解難一課。

興趣篇
從抗拒到願意

同是任職酒店業的 Michael和 Mandy，育有一子一女，長子 Matthew六歲升小一，幼女 Maia四歲升 K3。夫婦自言沒有上過什麼父母速成班，如何教兒育女，也是摸着石頭過河，當然他們亦試過碰壁，譬如兩人便曾一度跌入「早教」的迷思。
「而家人人都講『一生一體藝』，我哋都曾經好心急，希望個仔喺升小一之前，學識游水。四歲嗰年，囝囝第一次學游水，但原來佢好怕水，結果學唔識。」 Michael坦言，當時也有過一絲失望，不過，他害怕夾硬來，只會毀了兒子對學游泳的動力和信心。
於是他改變策略，用了兩個夏季，每逢星期日，帶兒子去西貢三星灣、半月灣的岸邊踢水、捉蟹、堆沙，希望幫助他克服畏水的心理，兩父子亦經常結伴到西貢海下灣玩浮潛，接觸美麗的海洋世界。
結果，父親的苦心並沒有白費，今個暑假， Matthew終於主動提出要重新學習游泳！「今次，佢學得好認真，上晝去完習泳班，夜晚仲叫我再帶佢去游夜水。早幾日，仲話要表演唔用浮板游水俾我睇。」雖然並非什麼大事，但看見兒子由抗拒、放棄，到兩年後願意再次嘗試和突破， Michael十分感動，也叫他明白到，小朋友學東西原來「唔急得」， timing很重要。

Matthew曾因畏水而不敢學游泳，爸爸 Michael（左）想盡辦法幫他克服，包括兩年來的夏天，經常帶他去沙灘堆沙、玩水，接觸海洋。 

Matthew今個暑假鼓起勇氣和 Maia再次學習游泳，並初嘗不用借助浮板暢泳的滋味。 

學習劍擊兩年的 Matthew，今年勇奪香港兒童劍擊錦標賽六歲組冠軍。

投入才留低

Mandy（右）雖然對鋼琴一竅不通，但為了表達對兒子的支持和鼓勵，她也特意請教老師怎樣數拍子，好陪伴 Matthew練琴。 

為了發掘子女的興趣， Michael和 Mandy讓他們報讀過不少興趣班，例如繪畫、跆拳、溜冰、冰球、劍擊等，但夫婦卻暗自有一套標準，決定哪些興趣活動可以留低，哪些要被叮走。
Michael表示︰「其實細路仔有得玩梗係開心，因為而家上興趣班，多數都係用玩嘅形式。所以，我係會用佢哋返到屋企，願唔願意再花時間練習，去衡量佢哋究竟係咪真係有興趣。
「我規定每項活動，佢哋每日都要抽時間練習，譬如 Matthew學跆拳，我要求佢每日拉筋十五分鐘，但佢唔願意做，所以我就無俾佢繼續學；相反，佢學劍擊就好投入，練習完全係自動波！」
採訪當日，兩兄妹便興致勃勃，嚷着要在記者面前示範表演，齊齊換上劍擊衫、戴着面罩，不斷作弓步、防守與進攻的戰術，來來回回也有百幾下，雖則大汗疊細汗，但還是沒有停下來的意圖。
「從 Matthew嘅學習態度，我哋睇得出佢真係有興趣。而家佢已經學咗兩年，最近仲攞咗香港兒童劍擊錦標賽六歲組冠軍。」

父母同行

假日就是他們的家庭日， Michael和 Mandy愛帶子女接觸大自然世界。 

相對於發掘，怎樣進一步栽培，往往更加困難。不少父母都以為，學東西是孩子自己的事，所以繑埋手督促他們練習就可以。但 Mandy卻不認同，她認為「同行」很重要。
「細路仔喺練習嘅過程之中，可能會遇着樽頸位，令佢哋感到有阻力，甚至想放棄。如果父母無嗰份同理心，又或者自己根本都唔識，只一味逼佢哋練習，最後可能只會搞到小朋友連興趣都無埋。」因此完全不懂得彈琴、節奏感欠奉的 Mandy，為了陪伴一對子女練琴，也特意請教老師如何數拍子。
「哈，原來彈一首歌，要數啱晒所有拍子都唔容易。所以我會更加體諒佢哋，尤其 Matthew節奏感比較弱，每次佢能夠流暢地完成一首樂曲，我都會戥佢好開心。」

 

當社工的 Connie堪稱「多產」，她有四名兒子，一對孖仔今年十四歲、三子十一歲、孻仔希希則剛滿六歲。講起各種各樣的興趣班，她有一套見解。「我從來唔反對家長安排仔女參加興趣班，即使我幾個細路都有報唔同嘅課程。但我就認為，唔少家長將太多心思放喺呢啲乜班物班上，反而忽略咗平日嘅生活。其實好多做人處事嘅解難能力，甚至而家好流行嘅所謂多元智能，家長只要透過生活實例，都可以讓小朋友領悟得到。」
像逢星期日的親子行山活動，就是 Connie刻意安排的「學堂」。「呢十幾年來，喺我哋屋企，星期日一定冇興趣班呢回事，我同老公多數會帶四個仔去行山，喺過程之中，大家各自分享吓對大自然嘅好奇、欣賞，呢啲咪專家口中所講嘅『自然探索智能』囉！」

解難篇
行山迷途　考驗應變

希希早前與家人雖經歷行山遇險，被困山頭一夜，但小伙子仍然處變不驚，最終獲救。（希希母親 Connie提供圖片） 

這些年來， Connie和丈夫率領兒子們征服過不少山峰，包括鳳凰山、大東山、大帽山等，但一家人亦試過兩次遇險，最新鮮熱辣的，就發生在上月尾，最終更要出動消防員拯救。
當日他們由大帽山經四方山往大埔小庵村，由於不慎迷路，導致晚上九時仍然在溪澗的下游摸索前行。為防意外發生，夫婦決定報警求助。
「當時我哋教小朋友最重要係冷靜，同時搵一個安全嘅地方歇息，再想辦法為自己保暖。雖然希希第一次遇險，但佢都好乖，冇扭計慌張，亦聽話無四圍走，後來仲瞓着咗。而三個哥哥亦好照顧細佬，打開晒啲遮幫佢擋風保暖，亦用背囊圍住佢，驚細佬喺睡夢中碌落水澗。
「等到凌晨兩點，終於有直升機在空中盤旋搜救，可惜地勢唔適合，降落唔到。我哋唯有再等，直到凌晨四點，攀山隊及消防員分別從水、陸兩邊營救，最後我哋喺消防員嘅帶領之下，終於喺清晨六點平安脫險。」或許，在別人眼中，這次的經歷太過驚險，但在 Connie看來，卻為孩子在逆境及應變能力上，上了寶貴的一課。
除了行山，還有「家務特訓」。已連續第四年的暑假， Connie刻意「送走」傭人，寧願讓她離港放一個月有薪假期，也要逼四名兒子吃吃苦頭，學習自理。「平日有姐姐照顧周到，佢哋永遠唔會做家務。但呢個月姐姐放假，連我都要落手落腳，佢哋就冇藉口唔幫手，總之人人有份，就算最細嘅希希都要做。」

家務特訓　強化智能

她笑言，做家務不單訓練到孩子的「肢體動覺智能」，提升四肢的靈敏度，亦因為四兄弟經常為家務問題擦出「火花」，透過溝通協商，亦有助加強他們的「人際關係智能」！
她舉例︰「最初抹枱、拖地係分開由唔同人處理，但後來發現唔 work，因為抹枱嘅，總係會粗心大意將垃圾掃落地，為拖地嘅製造麻煩。於是，四兄弟最後達成共識，嗰日輪到邊個負責抹枱，就要同時負責拖地。」
事實上，這個「家務特訓」安排， Connie認為讓孩子學懂煮飯、拖地、洗廁所等技能還是其次，最重要是讓他們學曉彼此體諒。「大家都輪流做過唔同嘅崗位，明白到清潔嘅質素、食物嘅水準，未必可以次次做到一百分，會少咗挑剔對方。另外，經過呢幾年嘅特訓，佢哋對工人姐姐嘅態度亦好咗，體諒到人哋嘅工作都好忙碌、好辛苦。」

由於暑假家傭放假，連六歲的希希都要負起做家務的責任。 

Connie（左）重視親子時間多於興趣班，她認為，家長就是孩子最佳的啟蒙老師。 

話你知

想拓闊孩子的眼界，不一定要報齊所有的興趣班，假日多帶他們外出走走，同樣可增廣見聞。香港教育城有很多親子活動好去處的推介，並附設交通、景點及美食貼士，資料實用。網頁︰ http://www.hkedcity.net 


為幫家長發掘子女的潛能和興趣，香港家庭教育學院在今個暑假，為香港挪亞方舟設計了一系列多元智能啟迪活動，讓小朋友寓學習於遊戲。活動由即日起至九月一日期間，逢星期六及日舉行。詳情請瀏覽網頁︰ http://www.noahsark.com.hk 

撰文：沈雅詩
攝影：許朝暉、吳卓凡

QR code this page

 免責聲明. 本網站所載資料只供一般參考之用。我們會竭力提供一個方便、實用而且資料豐富的網站，並確保一般的資料準確無誤。但並不對該等資料的準確性作出任何明示或隱含的保證。