Scroll Page | Stop Scrolling

Tweet

Pin it

Widgets

Keyword:美容,生活,购物

上級豚肉鐵板鍋$112豬腩肉堆到成座山咁高，裏頭是芽菜，其他材料包括甘筍、椰菜等，最特別是有豬腸，吸盡帶辣韓風湯汁之後變得超入味， yummy！ 

潮𡃁便當

熱鍋上的冬日

上週大隻朋友突然短 tee轉長褸，舌頭如避雷針般即過電，心動不如馬上行動，即 check市面上各種鍋物，橫掃豚肉火鍋、魚湯烏冬、石鍋飯以至石鍋菜，實行過一個熱鍋上的冬日！

豚豚到肉飛碟鍋

9月入主雅蘭中心大和豚總本店，顧名思義以「豚肉」為主打，豚肉乃來自丹麥的穀飼豬， order時想知叫緊豬的什麼部位， menu上一目了然。走日韓 combine路線，食物種類包括石窩飯、拉麵、壽司、韓國年糕、炸豬扒和炸串等等，應有盡有。當中必推要數鍋物，其中豚肉野菜飛魚鍋，由 Shabu Shabu演變，食材放歸一側，方便推入鍋中，選用肥瘦兼備的豬腩肉包裹蔬菜，奉行健康原則，而大部分鍋物，都附送 50g骨膠原一杯或以骨膠原入饌，食完漿住嘴仔又美顏，女士們梗 like！

豚肉野菜飛魚鍋$118兩邊放有共 16片豚肉，內包有甘筍、水菜、旺菜、京蔥好健康，而鍋底以飛魚乾、豬骨及醬油熬製 8小時而成，濃郁鮮味。進食時，通常先待水滾，然後放入骨膠原，再放年糕及豆腐，最後才放肉。 

黃金串串大和豚$78表面看是味道相同的炸串，原來串內分別是三文魚、車厘茄、豬柳及雞肉，靈感來自東京串揚料理，一口一啖食落好方便。 

十勝豚石鍋飯$108用豬背肉入饌，貪其表面肉身肥美，底層較瘦，肉身以秘製十勝汁醃過，日式燒汁的進化版。 

大和豚辣辣石窩飯$88用上指天椒入饌，熱辣石鍋配火辣醬汁，幾寒底的你都熱到手心出汗啦！ 

 

食客 Serene文職
同幾個朋友嚟食，見到隔籬枱有座肉山，湯汁少少辣，充滿豬肉香，菜夠多感覺健康，加上熱辣辣，冬天最啱食！

 

大和豚總本店
旺角雅蘭中心 1樓 101-102號鋪
2391 2112
營業時間： 12nn-11pm

老中青石鍋菜

同成日旨意你拍板的父母輩 family day最怕唔知食乜？尖沙咀帝苑酒店的帝苑軒今年就首次推出，將中式煲仔菜結合韓式石鍋的一系列石鍋菜。石鍋每天由師傅放入 200度焗爐中預熱 1小時，當材料準備好之時即放入石鍋中，雙重熱力一齊迫，所有食物乖乖熱入心。共有 16款菜式包括糯米蟹、廣島蠔、鮑汁鱆魚、羊腩煲等等，用料上乘不在講，口味老中青通殺！

石窩薑蔥廣島蠔$188起碼放咗 10隻肥美廣島蠔，走油後令蠔身外邊微脆惹味，中心肉嫩，熱度夠勁，嘴仔要小心，伴菜的中國玉蔥吸盡蠔汁，不能放過。 

何師傅每天都會將約 10至 20個石鍋預熱 1小時，溫度有成 200度㗎！ 

石窩香芹圍蝦嫩豆腐$188圍蝦及豆腐以上湯炆浸過，味道鮮香，最緊要豆腐滑到阿婆都食得，唔怕老人家陪坐。

石窩鮑汁鱆魚飯$148烹調過程中巧妙保留鱆魚汁，鱆魚更要蒸上 6小時，難怪肉身腍軟。雞粒則以上等鮑汁炆煮，杰稠汁水鎖晒入米飯之中。 

石窩沙薑紅蔥排骨$128用上近腰間、帶着小骨頭的三度排排骨，加入切片鮮沙薑同炒，更惹味。 

 

食客 Dorothy飲食
我好鍾意食蠔，但冬天又唔想食生蠔，呢度有蠔鍋熱辣辣，即時再嚟 encore。

 

帝苑軒
尖沙咀麼地道 69號帝苑酒店 B2層
2724 2666
營業時間：星期一至六： 11:30am-3:00pm； 6pm-11pm、星期日： 10am-3pm； 6pm-11pm

石燒咖啡室

位於朗豪坊 10樓的 ishiyaki+Cafe，開業 1個月多，店名 ishiyaki即日文「石燒」之意，所以主打石燒飯無可厚非，由蒲燒鰻魚、泡菜、牛肉、三文魚等多款口味都有。+cafe意味石燒店亦行 cafe般休閒路線， hea住食最啱，所以店內食物亦包括一系列甜品及小食，另有意粉及魚生刺身，全個全日 menu大部分不超過$100，在商場食肆來說價錢算是相宜。

蒲燒鰻魚石燒飯$72鰻魚飯之下還有冬菇、露筍及甘筍，顏色方面已經超班！ 

日式三文魚蟹子石燒炒飯$72三文魚切粒後不減鮮味，香氣走勻全個飯。 

 

食客 Binlo& Dicky文職及醫療
行開街見到呢度開咗一間新店，覺得佢餐廳又有沙律又有魚生，好健康。

 

ishiyaki+Cafe
旺角朗豪坊 10樓 19&20號鋪
3514 9131
營業時間： 11:30am-10:30pm

魚湯膠原烏冬

旺角勝利道總店的鳴門，先後在西環、荔枝角開分店， 8月在銅鑼灣再下一城。以骨膠原重、有美顏功效的鮟鱇魚湯鍋烏冬為主打，香港較少地方食到。選用讚岐烏冬，粗身彈牙，湯底以 30斤鮟鱇熬製，伴以石鍋齊上，滾起的魚湯鮮香隨輕煙飄來，口水直流！可選鮟鱇魚肉、牛肉、黑豚、海鮮等配料，湯底分面亦可選咖喱、番茄、地獄辛辣或豬骨等 4個口味。不吃烏冬者，亦可選脆脆米鍋，煮飯時以少水去煮，經風乾、油炸等步驟而成，光是烘米都起碼 1天，試得過的心機貨。

石鍋鮟鱇魚湯烏冬$88鮟鱇魚肉實結中帶嚼勁，同煙韌烏冬一拼，是對雙生兒！ 

石鍋番茄牛肉烏冬$58冇胃口者一試酸酸甜甜番茄湯，必定食慾大振。安格斯肥牛食完更是成身暖笠笠，寒風中也熱暖。 

石鍋海鮮脆脆米$78脆脆米香到入心，和湯吃令脆米不至過分乾身熱氣，就似食脆口泡飯，推介！

 

食客 Kanny、 Elva& Pea售貨員
聽同事介紹過嚟，湯底好正、好夠鮮，烏冬又彈牙，加上價錢都合理，下次會再嚟。

 

鳴門魚湯麵亭
銅鑼灣軒尼詩道 489號銅鑼灣廣場一期 201號鋪
2891 6800
營業時間： 12nn-11pm

潮食皮革雪糕

食完熱辣辣鍋物，愛吃雪糕讓口腔過冷河吧！本地時裝店 initial 11月中在尖沙咀金馬倫店推出皮革味及北海道牛奶 2款雪糕，時裝店食雪糕，仲唔係非尋常體驗？最令人好奇是皮革雪糕究竟係咩味？似食 earl grey tea有淡淡茶香，烘香的焦糖化身黑色 scone，配熨面 initial銀字黑色雪糕紙，貫徹搭配至上時裝原則。仲每 2個月換一次口味，潮人必試！

皮革之戀雪糕$10（圖右）北海道牛奶雪糕$10（圖左） 

店鋪一角變成雪糕 corner，潮店員落手唧雪糕。 

 

initial
尖沙咀金馬倫道 48號地下 B店
2311 4223
營業時間： 12:30pm-9:30pm

荃灣新派越泰菜　冰鎮芥末芥蘭夠醒胃

越式鮮蝦蓮藕苗沙律$68用上蓮藕苗口感更幼細，吸盡秘製越式醬料夠醒胃！ 

在沙田、屯門提供越南泰國菜的西貢星，新店 9月在荃灣眾安街登陸，門面光鮮白淨，店名以醒神綠黃配，室內以白色為主，牆上點綴有綠色植物裝飾，走簡約年輕路線。食材定期購自當地，請來具創意的地道泰國廚師主理食物，地道之中別於以往兩間分店，獨有港人較少接觸、以蓮藕入饌的越式鮮蝦蓮藕苗沙律，以及大膽用上冰鎮方法處理芥蘭的泰式冰鎮芥蘭鮮魷沙律等，新手法拍住新鮮菜蔬烹調食物，有新鮮感之餘等客人食得更加健康！粉麵方面，除了一般生牛河、越式豬扒湯檬、香茅豬扒之類，更有富特色越式海鮮蟹膏湯粉、順化豬手牛肉湯檬，另類食材搭配越南菜，隨時都有 surprise啦！

 

西貢星
荃灣眾安街 108號
2426 8288
營業時間:早上 11:00–晚上 11:00

撰文：梁智欣
攝影：謝耀恆、黃家活
美術：林宜德

QR code this page

 免責聲明. 本網站所載資料只供一般參考之用。我們會竭力提供一個方便、實用而且資料豐富的網站，並確保一般的資料準確無誤。但並不對該等資料的準確性作出任何明示或隱含的保證。