常餐以外
滿粥
2013年02月21日 ~~ 第1198期 香港《壹周刊》
農曆新年，開口埋口身體健康，轉頭又鯨吞蘿蔔糕年糕。過年後仍然一肚膩滯？最好趁着肚腩未現形，吃碗粥清清腸胃。好粥難求，一碗靚粥看似平平無奇，背後的學問可不少。嚴選五大粥店，由最簡單的白粥至海鮮粥，吃完，身心都滿足。
港式傳統良心價
吃早餐，你會選擇快餐店的速食，還是白粥油炸鬼？不少中環白領、街坊、幫襯了幾十年的熟客、來自各地的遊客，都喜歡到士丹利街盡頭的威記，吃一碗粥暖暖胃。開業接近 70年， 1994年由大牌檔搬入鋪，現由第二代傳人邱生接手，堅持保留着傳統味道。
做法多年不變，凌晨兩點已經開始煲粥，用新米溝舊米，加腐竹明火煲三四小時而成，粥底有濃郁米香。邱生稱：「煲粥最緊要夠火候，時間夠長，米開晒花先好食。」粥底綿香稠身，像阿媽煲出來的粥，樸實無華，吃得出啖啖心機。蘿蔔糕、即拉腸粉、油器都是每日在店內自家做，十點前可以看到師傅密密炸油條、牛脷酥，將麵團一拉一切，放入油鑊炸，吃時仍然暖身，微微香脆。一頓豐富的靚早餐，良心價$7至$16，在快餐店或連鎖粥店索價二、三十蚊一碗，難怪早上客人不絕。只希望這些歷史老店，不會接二連三地消失，變成多一間莎莎或周大福。
一天最繁忙是早餐時間，座無虛席，一碗粥、一碟腸粉，已叫白領及街坊肚皮滿足。
皮蛋瘦肉粥$16
粥底很綿，米粒全都開花，入口幼滑，瘦肉醃過帶微鹹，皮蛋選靚貨，不會帶澀味。
蘿蔔糕$9
唯靈也曾在專欄讚過，蘿蔔糕雖然沒有很多蘿蔔絲，但每口都有清甜蘿蔔味，質感軟糯。
早上六點開始密密炸至十時左右，油器用筋粉及麵粉自家製，每日製作過百條。
威記由做了多年的老師傅操刀，質素穩定，舊式味道同樣不變。
威記粥店
地址：中環士丹利街 82號地下
電話： 2551 5564
營業時間： 7am-7pm
公眾假期 7am-5:30pm
泊車：中環中心$26/小時
$170塔門海鮮粥底火鍋
靚粥工房店面其貌不揚，似一般小食店，別以為只是街坊粥店，一到晚上，客人排山倒海，都是為了鎮店的海鮮粥底火鍋而來，要訂週末枱，分分鐘要排幾個月隊！受歡迎因為抵食，火鍋四人起，包七至八款海鮮，有鮑魚、蟶子、生蠔、大蜆，以及小量肉類、菇類等配菜，每人只需$170。老闆阿喜是塔門漁民，對海鮮自然有要求。他每日親自在大埔街市搜羅，專揀時令靚貨，日日不同，熟客來幫襯往往有驚喜，他說：「有時見到花竹蝦大隻咪買囉，客人有新鮮感又食得開心！」
阿喜的父母仍然在塔門居住，有門路入到獨家海鮮，當地特產大尾魷更是店子招牌菜。大尾魷魚肉厚，肉質爽甜不韌，色澤雪白，由阿喜的母親每天釣上來，每條足一斤或以上，處理好後就送到店子。「我哋水上人的煮法簡單，輕輕一灼，已經很有鮮味。」鱆紅魚都在塔門海域出沒，魚味濃，阿喜誇口稱，冇其他粥店會像他捨得用鹹水魚！粥底加入大地魚煲成，鮮甜得不得了，珍珠米飽滿肥美，不似一般廣東粥煲至稀爛，有粒粒口感帶膠質，飽肚又好吃。散叫的粥品都有水準，馬交蝦滑是水上人家常菜，用馬交魚及蝦滑手打而成，鮮甜彈牙。店子開到凌晨兩點，是附近街坊的消夜秘點。
粥底火鍋$170/位（四位起，須預訂）
淥海鮮時要不時攪拌，吃至最後，粥都吸收了海鮮精髓，泥鯭的鮮甜、蟹的膏香、生蠔的甘甜，都融在粥內。
金銀蛋馬交蝦滑粥$29
用比例為八比二的馬交魚及蝦膠手打成馬交蝦滑，質感似魚蛋般爽口鮮甜，配大地魚粥底特別夾。
白灼大尾魷$33
大尾魷魚產量不多，貴過一般魷魚一倍，除了魷魚肉餅，最原始是白灼，蘸點辣椒豉油吃，爽甜惹味。
招牌鱆紅魚片粥$29
塔門盛產鱆紅魚，冬天油分高，肉質結實，魚味不算太濃，勝在沒有鯇魚那陣草腥味。
靚粥工房
地址：佐敦上海街 24號 1A店
電話： 2377 3813
營業時間： 11am-2am（星期日休息）
泊車：香港童軍中心$22/小時
達人出馬米芝蓮靚粥
人稱粥王的景叔，來頭相當猛，曾是上環生記的開國功臣，後來自立門戶創立景記及李景粥品專家，縱橫粥品界三十多年從未間斷，絕對有資格做專家。熟客都跟住他吃勻港島九龍，甚至一家三代都來幫襯。今年已經 67歲的景叔，仍然寶刀未老，親自動手煮粥，每日至少賣二百碗。
昔日地鋪搬到甲級商業大廈，來幫襯的都是行政人員，店子整潔光猛，冷氣足，唔會食到一身汗。經驗豐富的景叔，不甘平凡，愛自創新款式，健康清淡的粟米粥、南瓜粥之外，又將艇仔粥改良成艇王粥，用上高檔的食材，更添貴氣，連雞粥都用新鮮沙薑醃雞，入口鹹香。景叔自豪地說：「我堅持不下味精，全部逐碗煮，火鴨粥下了鴨骨來煲，每碗都有不同風味。」美味的粥底，分別用豬骨湯及鯪魚湯代替清水，令粥多了一份鮮味，又用泰國及中國米兩溝，每一桶用 32斤水及 1斤 12兩米煲成，加點瑤柱及腐竹同煲，幾十年來堅守同一煮法，甚至幫襯同一供應商，保證味道沒走樣，一貫綿滑，米香濃郁。粥王再度出山，令粥麵館獲得米芝蓮車胎人推介，名人食家唯靈、馮美基都去幫襯，邊個話粥不能登上大雅之堂？
廚房設有玻璃窗，客人可以欣賞景叔落手落腳炮製粥品。
金牌鹹雞粥$45
吃過最好吃的雞粥，雞肉用新鮮沙薑磨茸醃十小時，已去皮，一點也不油膩，粥底也帶沙薑味，微鹹香口。
艇王粥$98
有帶子、鯇魚片、豬腰等十一款配料，是及第和海鮮粥的合體，下配料的次序都很講究，一大煲分量足三四人吃。
家常鹹肉粽$20
本地製造，糯米軟熟，蛋黃及肥肉夠油潤，大大隻相當足料。
涼瓜鹹排骨粥$45
坊間少有用涼瓜煮粥，對腸胃有益，入口仍帶爽脆，甘甘甜甜，配醃過夜的鹹排骨，清淡得來又有肉香。
粥麵館
地址：鰂魚涌英皇道 683號嘉里中心 1樓
電話： 2750 0208
營業時間：星期日至五 10:30am-8pm
星期六休息
泊車：嘉里中心$18/小時
即叫即做潮汕砂鍋粥
生滾粥吃得多，在元朗一家茶餐廳，竟有即叫即煲的砂鍋粥作招徠？老闆是廚師出身，曾在挪威當中廚及開餐館，愛吃的他曾在大陸吃過砂鍋粥，嫌太多味精，於是決定以無添加砂鍋粥作主打。為了證明絕無欺場，餐廳內有電視拉闊直擊整個煲粥過程，拍心口保證廚房冇煲定粥底，全部有柯打先開始滾水煲粥。砂鍋粥多用海鮮作配料，全部都是流浮山即日鮮，有花甲、肉蟹、膏蟹、蝦及九孔鮑等任你配搭，蝦配蟹最鮮甜，鮑魚則可煲雞粥，在魚缸揀啱，再以斤兩計價錢。另一特色是粥底加入花生醬、魚露提鮮，又加少許花雕酒及薑辟走腥味，另有菜頭及香菇等配菜，用明火逼出鮮味，精華都融入整個鍋中，粥底香甜，珍珠米剛開花，帶黏性。煲粥需時三十分鐘，只於晚市供應，原個砂鍋上枱，吃到尾時仍然熱辣辣，不少街坊鍾意連煲外賣。
鮑魚雞粥（三位用）鮑魚每兩$15、半隻雞$88，粥底每位$10，約$208
這煲有六隻鮮鮑魚，火候剛好，肉質腍滑不韌，粥底有雞油香，入口鮮美，似潮州粥般見到米粒。
海蝦肉蟹粥（三位用）海蝦每兩$20、肉蟹每兩$13，粥底每位$10，約$290
每日都有九款海鮮選擇，蝦可選基圍蝦及海蝦，想更鮮甜可配膏蟹，價錢較貴，但蟹膏更加甘香。
花甲田雞粥（三位用）花甲及田雞每兩$5，粥底每位$10，約$120
花甲味道較淡，很百搭，配海鮮及肉類亦可，這個配搭較清甜，價錢亦相對便宜。
八斗砂鍋粥茶餐廳
地址：元朗鳳琴街 22號
金龍樓地鋪 16號
電話： 2442 9001/ 2442 9987
營業時間： 6:30am-1am
泊車：鳳群街咪錶位$8/小時
懷舊巷仔夜粥
蒲完尖沙咀，突然想吃消夜，地頭蟲都識得鑽進小巷，十點半準時等詹伯推着木頭車開檔，為了這碗豬骨粥。這裡從來沒有店名，由樂道經營至今已有四十多年，認住堪富利士道的眼鏡鋪，每晚都會見到滿座的熱鬧情景，有一家大細、遊客、街坊，就是貪這裡開得夜，夠地道。詹伯說：「八十年代這裡是不夜天，好旺，要排隊食㗎，就算客人要企喺度食都唔介意，每晚做唔停手！而家，要叫賣先有客！」
他煮的豬骨粥真材實料，新鮮肉排、豬肋骨、尾骨洗走血水，醃足四五小時再啤水，熬起豬骨湯，加入富膠質的百搭米，大火煲兩小時，而且要不停攪拌，少點心機都唔得。一斤米下了五斤豬骨，很入味，一碗有四五件，肉不多，但肉質鬆軟腍滑，陣陣骨香，而且完全沒有肥膏。年事已高的詹伯，只於週末才現身，由兩個女兒接手，才能繼續下去，這種街頭風味，還能維持幾耐？
巷仔尚算乾淨企理，放了五張枱都不逼狹，久違的街頭風味，柴魚花生豬骨粥每碗$25，豉油皇招牌炒麵$15亦炒得香口乾身。
爽滑腸粉$12
雖不是自家製，質感軟滑，麻醬甜醬下得重手，夠惹味。
詹伯相當精神，不時有熟客找他聊天問候，很有人情味。
用的是豬湯骨，豬肉不算多，不會煲至碎爛，骨香都滲進粥內。
巷仔豬骨粥
地址：尖沙咀堪富利士道 9號（昌明眼鏡側）
電話：從缺
營業時間： 10:30pm-3:30am（星期日休息）
泊車：堪富利士道咪錶位$8/小時
撰文：張頌婷
攝影：譚旭堯、胡春輝
攝影：譚旭堯、胡春輝
沒有留言:
張貼留言