每次 shopping， Alex都會 check番邊張信用卡最多優惠，實行賺得幾多得幾多。
CLOSE-UP
上網搵着數
2013年01月10日 ~~ 第1192期 香港《壹周刊》
講慳錢，邊個唔想？上網搵優惠，就更加你同我都日日做，拎張 e-coupon又好，抽獎搏贏禮物都好，唔使錢點解唔做？上網搵優惠途徑何其多，只要識得搵，每個月慳番一千幾百，絕對唔難。
慳錢達人
Alex 七十後 IT人
行過銀行會自動波望吓有冇最新優惠， Alex話已經習慣成自然。
小心着數
搵着數搵 咗幾年， Alex換過幾部電視、家庭電器兼無數 coupon，計計數，平均每年慳到成萬蚊，不過 Alex警告貪心得 嚟要識保障自己。「好似上年有間證券行新開張，開戶送八隻美股，計落價值接近兩千蚊，但要先用一萬港元開戶，都會擔心唔穩陣，所以會先去證監查吓間證券行有冇註冊。」確認冇問題，先介紹俾網友，「最終教網友點拎完美股，再拎番一萬蚊全身而退，賺到盡。」
為求拎盡各種信用卡優惠， Alex嘅「藏卡量」多達四十幾張。
近期 Alex最愛百佳 app嘅紅酒 e-coupon，買六百蚊酒平八十蚊。
團購沒落
前年先出現的團購，過去兩年被熱炒，最初發展順風順水，本地薑 ubuyibuy被美國團購龍頭 Groupon收購，連雅虎都加入分一杯羮，但正因愈搞愈多團購網站，質素開始變差，例如優惠長期爆滿無法預約，或者商戶將貨就價，消費者去到先知服務未達預期水平，甚至團購價與實際 walk in價錢相差唔遠，難怪 Groupon股價一年間蒸發逾八成，市值縮水超過 100億美元。
團購 out，不如轉玩 e-coupon，當中以 Apple iOS 6提供嘅「 Passbook」功能最人性化，下載 coupon後不單會提示優惠券將要到期，真正到期時，部分商戶更會再 send新 coupon，確保用得到。
科技配合
睇網頁同埋安裝着數 apps，只屬基本玩法，世界各地食腦人士已將科技同着數結合，玩法多籮籮。不過，唔係種種新玩法都有前景。
反向團購
SoRewarding網站反傳統由買家自定想用幾多錢買邊樣貨品， post上 Facebook或 Twitter後集齊十個朋友，就可透過網站搵商戶認頭，不過網站只做中間人，商戶要主動睇到你個 post，先會考慮提唔提供優惠俾你，唔多實際。
虛擬超市
直接將成間超市「印」落南韓地鐵站，行過用 smartphone影一影件貨下面 嘅 QR code，輸入信用卡同埋地址資料，就有專人送貨上門，因為慳 咗鋪租成本，超市貨品先賣得夠平。
愈 tweet愈平
Uniqlo之前 喺英國推出 Lucky Counter，每星期精選十款衫褲，俾網友用 Twitter投票，愈多人 tweets，售價就愈平，大玩集體殺價，截票日就會抽出幸運網友，可以用最後定價買到心頭好。
着數生活
識得用手機上網或者裝免費 apps，就可以即時掌握日常生活各種着數，慳得更多。
識飲識食
出街搵食，貪平可以先 search「香港飲食優惠」，有齊《大家樂》、《吉野家》等飲食集團 嘅最新優惠。識食 嘅用家就要睇「《飲食男女》最識食」，提供唔少網友勁 Like嘅餐廳 e-coupon之外，近排仲有超筍特價優惠，好似之前試過一蚊買加拿大亞麻籽燕麥（ 1.35kg），出 咗唔夠一個鐘就賣清，每日必追。
香港飲食優惠
對應機款： iOS、 Android
《飲食男女》最識食
對應機款： iOS、 Android
賺盡銀行
開信用卡易，享用發卡銀行 嘅優惠難，其中一個原因係資訊不足，例如好多人雖然知道上年 Citibank信用卡有現金回贈同三十倍積分優惠，但就冇諗過原來去超市買現金券都計。想知信用卡優惠情報，一定要參考「 HongKongCard.com」網站或 app，會詳細分析賺盡銀行 嘅心得。
想搵超低息稅貸，上「 MoneyMoneyHome」網站就幫到手，詳列大部分銀行 嘅稅貸利息及優惠回贈，一 search就搵到「永亨信用財務」稅貸最抵。
HongKongCard.com
對應機款： iOS
Money Money Home
http://www.mmhome.com
行住慳
港鐵新增第二程九折優惠，未算最抵，配合埋「拍卡優惠站」就可以每程慳多一兩蚊。 iPhone「喪慳搭港鐵」 app詳列全港三十一個優惠站位置，仲有路線地圖教你點去，超貼心。揸車人士就要裝「泊車易」同埋「中國石油香港加油站」 apps，前者有齊全港幾十個商場泊車優惠情報，例如每個月都會轉條款 嘅鑽石山荷里活商場， update得快；後者只要玩遊戲就可以拎到入油優惠（至少每公升減$2.15），玩得愈叻慳得愈多。
喪慳搭港鐵
對應機款： iOS、 Android
泊車易
對應機款： iOS、 Android
中國石油香港加油站
對應機款： iOS、 Android
格盡超市
話明日用品，消耗大，每次慳幾蚊一年隨時變幾百。想快速格價，就要睇靠網民報料 嘅「師奶網」，格盡各大超市及唔同地區士多、藥房價，可以跨區買平貨。如果純粹去超市買，亦可安裝免費 app「慳番 D」，有齊日用品例如即食麵、汽水、啤酒價錢，俾超市霸權壓搾都可以慳多少少。
慳番 D
對應機款： iOS、 Android
師奶網
http://www.c9web.com
慳錢情報
化妝品、衫褲鞋襪品牌間中會搞減價優惠，不過資訊太散，好難第一時間搶購。「 Get Jetso著數網」就最齊全，由電子產品、化妝品到旅行 嘅優惠情報都有。如果想知附近邊 啲商戶做緊優惠，可以裝「講數佬——流動著數地圖」手機 app，識得讀取 GPS位置，再顯示附近 嘅優惠，行到邊慳到邊。
講數佬——流動著數地圖
對應機款： iOS、 Android
Get Jetso著數網
http://www.getjetso.com
電子扱印仔
以前買 嘢要享用優惠，除 咗用 coupon，仲有儲印仔卡，除非你唔介意塞到荷包爆棚，否則好難用到優惠。三個八十後上年四月就研發出手機 app「 StampUp」，將印仔卡電子化，找數 嗰陣只要用手機嘟單上 嘅 QR code，就可以儲到印仔。 StampUp創辦人 Jonathan話，新玩法唔單只可以解決荷包「腫脹」問題，仲方便到用家隨時翻查手上所有優惠，實行着數使到盡，「好多時消費者袋住張卡都未必記得用，呢個 app就可以隨時翻查，結合 GPS定位，一開 app就知身邊有乜優惠可以用，同埋幾時到期。最大好處係所有虛擬印仔都可以共用，好似上年十一月我 哋就聯合五十間店鋪，無論 喺邊間消費，只要儲夠指定印仔，就可以喺其中一間換優惠，消費者嘅選擇大好多。」
左起： Jacky， Wendy
右： Jonathan
三位創辦人話，日後手機扱印仔 app愈做愈大，參與客戶愈來愈多，朋友飯局 嗰陣可能會爭嘟印仔多過爭埋單。
打開 app就可以即時顯示有幾多個印仔同有乜優惠，唔使左摷右摷搵 coupon。
留到舊客
印仔換 coupon另一好處係優惠可以隨時更改，較有彈性。
有份同 StampUp合作 嘅聯邦酒樓集團客戶關係副經理 Sam，都大讚印仔 app比起團購、 e-coupon更易吸到「翻頭客」，「搞過團購，又搞過 e-coupon，不過，客人次次用完優惠就冇回頭。呢個 app嘅用法係客人要先幫襯，下次再享用優惠，真正幫到生意。而且改優惠內容只須 click幾 click，唔似傳統 coupon一早印好指定優惠，如果之後發現優惠原來唔多吸引，就可以即時改同俾客人知道。」 StampUp另一創辦人 Wendy認同 app優惠折頭雖然點都唔夠團購抵，「但班客用過後，就話 app優惠限期冇咁短，又易用得到，約朋友食飯前都會先睇吓我 哋個 app。」
沒有留言:
張貼留言