社交圈
大劉晒齊人福 坐月甘比陪玩
2013年01月03日 ~~ 第1191期 香港《壹周刊》
新年倒數，富豪們例牌一家齊齊整整去 ball狂歡，今年以君悅酒店派對最有睇頭，大劉刻意晒命，先拖呂麗君入場，下半場由生仔未夠十二朝的甘比冒寒陪玩，四太梁安琪及謝玲玲孖仔女殺到；除傳統酒店 ball場，今年名人仲愛去 Sevva餐廳慶祝，搞搞新意思。
大劉 左右逢源
劉鑾雄除夕夜先同女友呂麗君到君悅除夕 ball（右圖），中場他送走呂麗君，迎接未坐完月的甘比同女兒秀樺進場。只見上月中才開完刀生龍仔的甘比一臉素顏，即使身穿厚褸，身形仍見臃腫，沒有扮靚靚的小秀樺離場時玩到皇冠都甩埋。其實甘比未坐足月已先後兩次陪大劉去福臨門飲茶，估唔到除夕夜亦未能免役。
元旦日大劉與呂麗君招呼記者在福臨門食翅講新年願望，「希望全中國、全世界嘅同胞以和為貴。」
大劉與前妻寶詠琴的大女劉秀融，散席時明顯飲多兩杯腳步浮浮，捉住嬸嬸洪文燕吹水，表情多多。
四太 仔女相伴
四太梁安琪每年都跟仔女倒數，今年由未拍拖的超欣、甩拖的猷亨陪入場，佢叫傳媒唔好亂寫猷亨戀情，「有啲係超盈嘅朋友，緣分到就有。」細仔猷君就明正言順拖實初戀混血女友 Francesca赴會（小圖），不單阿媽讚靚，情場初哥亦話女友夠靚又叻，「佢識法、德、西班牙、英文同菲律賓話。結婚？我幾多歲呀？呢啲嘢問早咗。」
傳聞由直變番攣的超盈著住 Zara$899的黑裙單拖到場。
林家倒數 獨欠岳少
林建岳的前妻謝玲玲除夕夜同三女心兒和大仔孝賢出席君悅除夕派對，剛倒數完畢，心兒已急不及待上載一家人的合照（小圖），原來孝能（左一）、二家姐愛兒（右三），同埋蜜運中的大家姐恬兒（右二）都有從秘道入場會合家人，但獨欠爹哋岳少，好明顯班仔女親媽咪多 啲。
馬清偉 遊戲人間
大生地產主席近年都會帶埋拍拖七年的女友 Winnie、跟三個子女及前妻薛芷倫一家慶祝節日，問佢幾時結婚？佢好大反應話：「唔好講呢啲！」這晚他的仔女都帶埋拖友同來倒數，呢個玩世不恭的阿爸卻表態，「朋友仔啫，玩吓啫。」反而薛芷倫大方發表自己愛情觀，「我有男伴但冇男友，男友要一齊計劃將來；我有男伴一齊開心就得啦，今晚仲有三個愛人在場內等我添。」
女兒馬桂珩孖住拖友 Bryan同來。
三太 埋年不歡
除夕晚三太陳婉珍冇倒數迎接新一年，夜晚十點幾已在置地外等司機接返歸，原來她剛與女兒何超雲食完晚飯，超雲仲即時將錫媽咪的照片放上網（小圖）；但三太走時罕有地口黑面黑，又唔肯企定影相，問超雲在哪裡？助手搶答話：「已經走咗！」
何超蓮就和友人去 咗旅行無陪阿媽。
黎姿 細佬出山
永安後人郭志怡開的 Sevva餐廳亦是名人過節熱點，黎姿就和家人及朋友在此倒數。當晚黎姿與老公先後到達，黎姿沿途只說「新年快樂，身體健康」便匆匆進場，難得她的弟弟黎嬰亦有露面（小圖），玩到凌晨一點幾才盡興離開。
于文鳳 三點盡興
一身白的星爺前度女友于文鳳，玩至凌晨三時才撤退，走時不見她的男伴，只有 Cova太子女陳漫桐繑住佢離開。
雷林靜怡 生唔出
九巴後人雷兆光夫婦及子女一家五口去了金鐘香格里拉的 FF Ball，大會主題是外太空，但一身紅當蕩的雷太和女兒都無忽貼題，佢解釋話：「 喺晒個仔度。」原來兒子 Jeremy帶了個黑武士面具。農曆新年他們會出埠滑雪，問她有什麼新年願望？「希望全家身體健康。」想不想生多個？「生唔到喇嘛！」雷太說話真風趣直接。
李依琳 唔自然
「扒王之王」太子女李依琳亦繑住男友、許晉亨姪孫 Conrad去 FF Ball，但扒女一見有記者，即刻和男友分開行，連偈都唔傾就快閃入場。
郭李天穎蒲老蘭
新鴻基地產非執行董事郭炳湘的太太郭李天穎，舊年除夕同老公一齊過，今年除夕夜郭太撇甩老公，凌晨兩點同幾位手帕交夜蒲老蘭，郭太一行人當然無特權，要同市民大眾一樣跟住警方人潮管制而行，親身感受吓普通人的逼狹除夕。
撰文、攝影：名人組
沒有留言:
張貼留言