阿 Joe現在可隨意在深井新居光明正大地放狗，每次出街，兩隻狗都表現興奮。
壹些事壹些情
要狗唔要樓
2012年11月29日 ~~ 第1186期 香港《壹周刊》「住洋樓、養番狗」是不少香港人的奮鬥目標。
奮鬥過後，阿 Joe買到洋樓了，卻發現今時今日的洋樓，沒有養狗的自由。
平凡狗主不甘心，告上法庭為小狗爭居留權，折騰三年，散財百多萬。結果︰輸了。
他舉家搬走，索性「要狗唔要樓」，還甘之如飴：「狗係我嘅親人，就算破產都好，我唔會後悔！」
阿 Joe的「狗官司」源於美孚。○八年美孚業主曾志明指大廈公契未有列明「嚴禁養狗」，控告業主立案法團及管理公司禁止住戶養狗，結果獲判勝訴，鼓舞了阿 Joe開始為愛犬 Whiskey爭取居留權。
「嗰時睇報紙見到有人得咗，我就想搵曾生。我當時住喺荃灣韻濤居，買嗰時問咗經紀，話屋苑係可以養狗，只要無人投訴就得，公契就只係寫住有業主立案法團 written consent（書面同意）就養得。我成家住咗三、四年都無事，屋苑亦有好多人養緊，但後來法團換咗主席，主席個太太好驚狗，後尾又傳有人被狗嚇到入醫院，於是突然一刀切唔可以養。」
買個安樂窩，卻容不下一隻小小的史納莎，阿 Joe說：「法團權力大到你唔信，佢話俾養就俾，唔俾就十四日內要移走啲狗，至於點樣決定俾唔俾養，佢又唔會話俾你知。我哋同法團乜嘢提議都傾過，所有提議佢哋都反對，覺得自己高高在上。如果要改公契改到養得狗，就要成個屋苑百分之百嘅住戶同意先得，好難搞！除咗打官司，我哋已經無選擇，一定要 fight。」
香港雖然愈來愈多人養狗，但可以讓狗隻進入的商場卻不多。（李育明攝）
阿 Joe入住荃灣韻濤居四年後才突然被法團勒令禁止養狗，最後他選擇搬走。
我不入地獄誰入地獄
自稱生意人的阿 Joe，說話語調平靜，表現理性，千叮萬囑記者要提醒讀者「養狗前要諗清楚」。他不是狗癡，但卻為狗付出很多，包括人生首次上法庭。
打官司如燒銀紙，小業主挑戰法團，實力大有距離，壓力自然不小。○八年，他與屋苑其他十三名養狗業主組成「韻濤居養狗權益會」，正式與法團對簿公堂。戰幔一拉開，屋苑氣氛即陷入緊張狀態，連帶附近幾個屋苑一樣高度注視，因為幾個樓齡相近的屋苑，公契幾乎搬字過紙倒模一般，只要阿 Joe官司一輸，分分鐘累街坊無得「偷雞」，方圓十里之內屋苑都會白紙黑字不准住戶養狗。
「壓力真係有，我係抱住我不入地獄誰入地獄嘅心態去做，未打（官司）之前已經深思熟慮，想嘗試去做一個案例，萬一輸咗，都清清楚楚俾狗主知道。要樓定要狗，一定要諗清楚。」
當年誤打誤撞開的寵物美容店，今天成為他的惟一事業：「本身只係想有個地方俾狗友聚吓、為狗做啲嘢，無心插柳一開就到依家，如果無今次官司，我都唔會入呢行。」
當年美孚「狗官司」勝訴引發幾個屋苑的業主挑戰法團，惟全都敗陣而回。
狗係親人 唔係公仔
阿 Joe說：「我細細個就養狗，狗係我嘅親人、屋企人，唔係公仔，唔可以話唔養得就唔要佢，連屋企人都受我感染好鍾意狗，到問題發生時（屋苑禁止養狗），我成家人甚至係工人都好支持我打官司，只要唔係殺人放火，我一定會盡力去保護啲狗。」
當年美孚狗官司「一石激起千重浪」，不少私樓、居屋業主都盡力爭取愛犬居留權，於是一班互不相識的人聚在美孚茶餐廳向曾志明取經，又一起研究大廈公契和法律知識，漸成好友。由於在法庭判決下，美孚新邨已講到明可以養狗，眼見有需求兼且為了開會聚首，阿 Joe與「狗友」更合資在美孚開設寵物美容店，又在官司期間再養一隻史納莎 Kahlua。
寧願搬走都唔分開
一○年，第一輪官司輸了，有狗友退出，當日十四人聯合打官司，只餘下三人再上訴，無奈最後官司還是輸了。「我自己使咗百幾萬，本來仲想上訴去終審庭，但再打就會超出能力範圍。」官司輸了，他家中的工人哭得很慘，以為再不能與家中的小狗生活，小狗該會遷到美容店去了吧？但阿 Joe全家卻捨易取難，於是在法庭判決後兩星期，頭也不回地搬走：「我再留低都唔會住得開心，我寧願搬走都唔會同啲狗分開。」
舉家搬遷，搵屋首要條件是要給兩隻愛犬合法居留權：「唔再信經紀講喇，我自己上網搵啲屋苑公契，有啲新屋苑公契真係有幾十頁，要逐頁慢慢睇，嗰刻屋苑環境已經唔再係最重要，搵樓第一件事就要睇公契養唔養得狗。」
搵樓期間，他發現新屋苑為了方便管理會於大廈公契列明禁止住戶養狗，或寫得含糊，總之就沒有幾個列明可以養狗，原來「住洋樓養番狗」已不合時宜，「所以真係唔可以心存僥倖，以為有人養緊就可以養。有啲屋苑寫得模稜兩可，話有人投訴就唔養得，又要睇吓個環境係咪歡迎狗，有啲屋苑你拖狗入電梯，住客會好大反應好唔鍾意，咁都唔會養得耐……總之，要養狗其實要諗好多嘢！」
四年前美孚新邨住客曾志明（右）為了愛犬 Boy Boy，控告業主立案法團及管理公司，結果獲勝訴。
除私人屋苑外，公屋及居屋住戶亦不時上街抗議，爭取寵物居住權。（《蘋果日報》圖片）
「我賺咗好多」
狗官司令阿 Joe搬離舊居，搬到深井浪翠園，可以光明正大地養狗，這屋苑的公契寫明︰「若有兩戶以上投訴，住戶便不能養狗。」阿 Joe終於為兩隻小狗找到安樂窩，他養的兩隻史納莎都是細狗，出奇地安靜，只有套上頸繩準備散步時偶然興奮得發出嗚嗚的聲音，不會是「嚇到人入醫院」的麻煩狗，走進電梯遇上住客，表現也相當「克制」，反倒是住客主動逗玩，人狗相處和諧愉快。「大嗰隻係 Whiskey，係 cool啲，好定；細嗰隻就係 Kahlua，佢係妹妹，小霸王嚟㗎！有時我摸哥哥（ Whiskey），佢會呷醋，逼個頭埋我隻手度嗲我，哥哥通常會讓妹妹，其實 Kahlua好熱情但又細膽……」一講狗經，阿 Joe便滔滔不絕。
一場官司令他投身寵物行業，他開設的寵物店業務已上軌道，更準備開設狗會所︰「其他人覺得我為隻狗犧牲咗好多，其實我係賺咗朋友，亦都賺咗間鋪，以前做生意好現實，投資同回報睇得好重，同而家係兩碼子嘅事，間鋪成七萬蚊一個月租㗎！鋪頭嘢又困身，平時要睇好多資料，付出都好多，不過我好 enjoy而家嘅生活，呢啲唔係用錢衡量。就算用錢衡量其實我都係賺咗，我賣咗韻濤居，都賺咗唔少……」原來，當日他為官司留守韻濤居，樓價亦由買入時的百多萬元，升到放售時的五百多萬元，大賺幾倍！
打官司耗費百多萬元，最後仍被逼遷，但今日回望，阿 Joe明言沒有後悔。
當年韻濤居小業主們打官司，不時聚首研究複雜的法律文件和大廈公契，絕非易事。
公契點寫？
舊式大廈的公契，未必會列明住戶能否養狗；但本刊翻查不同樓宇的公契，發現近年落成的屋苑，對於能否養狗，有不同條文規定。
1業主未有管理人之書面同意前，不可在單位內飼養寵物（例子︰荃灣韻濤居）
2住戶可養狗，但若法團收到兩戶或以上投訴，住戶即要移走狗隻（例子︰西灣河嘉亨灣、將軍澳東港城、深井浪翠園）
3公契列明禁止住戶養狗（例子︰太古城、沙田第一城）
撰文：陳凱敏
攝影：江永健
沒有留言:
張貼留言