無論果酸、激光，以至打針的美容療程，均存在風險，唔想美容變毀容，做前謹記問清問楚。
醫學美容出事 留疤爛面
2012年11月15日 ~~ 第1184期 香港《壹周刊》過往因美容療程導致爛面、留疤、敏感個案可謂屢見不鮮，就算爆出 DR美容毒針殺人事件，貪靚一族仍無畏無懼，勇於嘗試。既然點都要試，就要識得選擇，盲目相信宣傳、只求結果，終令自己承受極大風險。唔想遇上「醫療事故」？等經歷無數次「白老鼠」測試的美容達人和專科醫生話你知點揀點避。終歸美麗無罪，但要緊記：愛靚，還要愛命。
美容達人 Kanix，擔任美容界 blogger三年，除整容外，激光、微針、射頻及打針等最新最 hit療程統統試過，名副其實是一隻「白老鼠」。雖然明知美容療程存在風險，但為了靚上加靚，所以都要拼死一試。無奈身經百戰的她，今年以來，已遇上了兩次「醫療事故」。
打針瘀眼被誤家暴
「其實兩次都係美容集團邀請我做 demo。」 Kanix憶述：「第一宗係由皮膚專科醫生主理，要在眼肚及面頰位置打 Sculptra（聚左旋乳酸）填補凹位幫助減退幼紋。落針前醫生已清楚講明有機會出現瘀青，加上當日整個療程都要影相，所以醫生要就住慢慢打。雖然醫生幫我塗了麻醉藥，但我完全感覺到支針在我眼袋及面頰的皮下游走，仲要聽到針刺穿肌肉膜的『噗』一聲，都咪話唔驚。做完之後，望鏡已見到眼眶同面都紅紅哋，返到屋企隻眼就已經瘀咗，好似俾人打咗一拳。翌日送阿女返幼稚園時，老師擔心地問我：『有無嘢要幫手？』佢以為我俾老公打，我笑住同佢解釋我打了美容針。」 Kanix坦言知道今次屬正常的皮下出血，事前醫生亦有詳細講解，加上對醫生有信心，所以都無咁擔心，瘀青兩星期後便自然消散。
但另一次 demo射頻療程就無咁好彩。「我的黑眼圈同眼袋問題好嚴重，美容師話想加強緊緻效果，所以做埋上額頭。做咗一陣，我同美容師講塊面好熱，對方雖即時調低能量，但我已覺得額角痛痛哋。射頻完後敷精華時，即時感到刺痛，之後照鏡發現額角『燶咗』。」 Kanix無奈表示：「其實出咗事，我都好擔心會爛面，返屋企同老公講，佢仲笑我『又整爛塊面呀！』」事後，美容院拖兩個月都無跟進， Kanix只好自費到相熟美容院以激光去印。事隔四個月後，額角疤痕已退印，但卻留下凹痕。
經歷兩次「意外」， Kanix仍然「膽生毛」，於上月底應美容院邀請接受近期最 hit的激光美容療程（ laser facial）。「我做 blogger，最鍾意試新嘢，試完同人分享好有滿足感，加上我年紀大兼有荷爾蒙斑，所以咪答應做。」不過，自從月前爆出 DR美容毒針事件後， Kanix亦不敢盲目接受療程。她坦言：「以前人哋邀請我做療程，我會盲舂舂問都唔問就走去試，風險後遺症完全唔知。而家，我會問清問楚先去做。」
DR美容針事件至今造成一人死亡，三人留院，警方正調查是否涉及嚴重疏忽或誤殺，案件暫未有人被捕。
Kanix打針打瘀眼，被女兒幼稚園老師誤以為發生家庭暴力事件。
美白慘變「斑點狗」
Kanix剛試完的 laser facial為近來最 hit的美容療程，皮膚專科醫生陳衍里坦言，此亦屬近期最多要「執手尾」的個案。陳衍里指出：「 laser facial顧名思義是以激光進行美白及護膚保養，但美容院竟每個星期替顧客進行療程，令客人皮膚受創。」他怒言：「 laser的設計唔係咁用㗎！一個月一次就無問題，但個個星期做就唔得！」他形容曾向他求助的女病人，「面頰明顯有好多白色一點點，好似斑點狗咁。」
陳解釋：「激光打得過多，會令皮膚內黑色素細胞受損，形成白點，要重新令膚色均勻，真係好難。」加上早前舉行的醫學美容及抗衰老整形國際會議（ IMCAS）上，披露一名在內地進行注射透明質酸療程時，被注入不知名的物質令面部變形的個案。所以，進行任何療程前，必先要清楚當中的風險，亦要小心選擇提供服務人士是否擁有專科資格及經驗。若市民不懂分辨，怎辦？陳坦言：「好簡單，最好唔好做，因這只是美容手術，可做可唔做，否則，便應詳細問清楚醫生。」
另外，激光脫毛都「好易出事」。皮膚專科醫生陳厚毅提及一個激光脫腳毛受傷個案，「女病人脫毛期間已經投訴好痛，但美容師竟然無停手，做到兩邊大腿滿布水泡紅印。病人幾日後求診，要不斷搽去印膏，仲要做果酸淡化紅印。」他指着受傷照片批評：「你睇吓，根本打（激光）得太疏，隻右腳仲睇得出佢（美容師）開始亂打！」陳厚毅強調：「做激光要好小心，要逐格逐格咁按部就班做，若同一個位重複打激光，就好易燒傷。」他續指：「其實激光機的操作並不困難，但要有嚴格訓練，大家都係咁做，但點解有啲做完會受傷或者效果唔好，主要係訓練與專業知識不足。」
DR事件後， Kanix坦言獲邀試美容療程前，都會問清楚風險及後遺症。
五旬貪靚婦為清除荷爾蒙斑，到美容院進行了五十次密集式 laser facial，終令皮膚深層受損形成白點，猶如「斑點狗」。
專業診斷對症下藥
陳厚毅醫生認為：「了解病人體質、病歷、有無敏感及懷孕等，對做任何療程都相當重要。以激光為例，不同波段的激光可分別用於美白、脫毛、去斑、去微絲血管兼嫩膚療程，而每個病人的膚質及病歷亦會影響治療成效，故醫生進行療程前，必須詳細問症，以決定病人是否適合療程，並提醒療程前後要注意的事項。」他解釋：「若果病人要處理暗瘡印而唔係斑，狂做激光都無效，因激光無去印作用；若然面頰好闊與腮骨大有關，咁猛打肉毒桿菌都無法瘦面。所以，唔係話懂得操作激光機就可以幫人做，必須對症下藥，先會最安全兼有最好效果。」
自 DR美容毒針殺人事件後，政府成立私營醫療機構規管檢討督導委員會，並於本月初成立小組，參考外國案例以區分美容與醫學療程，並會表列出美容院禁做事項，預計最快半年後定出指引，讓執法時有所依據。陳衍里醫生認為法例未作任何監管前，市民應理性選擇美容療程，並緊記要了解療程的效果和風險。
注射透明質酸前，必須清楚若誤打入血管，會有組織缺血壞死風險。
少女為脫毛而慘被激光「燒燶」，大腿滿布水泡及紅印。
醫學美容知多啲
醫學美容療程多不勝數，各種療程的效用和風險你又知幾多？唔想盲舂舂誤墮美容陷阱，就必須「知己知彼」，認清自己所需，兼了解療程前後基本應注意事項。
話你知
皮膚專科醫生是曾經接受專業培訓治療兒童及成人皮膚、頭髮及指甲問題的專科醫生，而市面上許多自稱擁有皮膚學碩士、皮膚學文憑的醫生，是否真正的皮膚專科醫生？想分清真假，可瀏覽香港醫務委員會網站。網址： http://www.mchk.org.hk/doctor/Specialist/15.pdf
想知多啲由皮膚專科醫生提供的正確護膚及醫學美容療程資訊，可瀏覽香港皮膚科醫學院網站。網址： http://www.hkcderm.org
沒有留言:
張貼留言