自從鏞記掌舵人甘健成月初去世，甘老太（左）一直鬱鬱不歡，至今心情才剛平復，上週六，她與甘健成太太（中）及
孫兒甘崇轅（右）一起接受本刊訪問。坐在她奶奶及老爺的
相片面前，再說起家變及兒子，甘老太又再哭起來。
鏞記爭產 甘老太喊寃：佢哋逼死大哥
2012年10月25日 ~~ 第1181期 香港《壹周刊》「佢係被人逼死㗎！」
鏞記甘老太呼天搶地道。其大仔甘健成，本月初突然猝死，令這個月尾判決的鏞記清盤案，留下一條不明朗的伏線。上週六，甘老太首度向本刊開腔回應，一提起大仔甘健成便哭崩人前，「我趕到醫院，佢隻手仲暖㗎！」但提到二仔甘琨禮，她與甘健成遺孀，都拍枱激動道：「甘健成係被佢哋（甘琨禮一家）逼死㗎！呢三年佢人生過得最痛苦！」
八十三歲的甘老太，十年內喪夫又喪兩子，唯一仍在生的兒子琨禮又已反目成仇，同樣痛苦萬分，但她仍要走出來替已去世的大仔討回公道。她咬牙切齒喊着：「我信天有眼！」屹立中環七十年、以秘製燒鵝馳名的鏞記，弄至現今局面，不免令人唏噓。
上週六，甘老太在銅鑼灣家中接受本刊訪問，其孫兒甘崇轅說，嫲嫲的心情才剛回復過來。甘老太回憶道：「嗰個星期四（十月四日），健成仲打俾我，問：『媽，我而家去鏞記喇，你去唔去呀？』我話我今日唔得閒，第二日先啦。點知，第二日佢已經……」訪問開始，甘老太最初還強忍淚水，但回憶起兒子臨走當日的片段，很快便悽然淚下：「星期五嗰日，我趕到醫院，佢已經走咗，我摸吓佢，佢隻手仲暖，個人仲係腍㗎。我到而家都唔相信佢走咗。」
甘健成享壽六十六歲，甘老太指他一向身體健康，甘健成遺孀亦指丈夫在去年十二月，才剛做了一次身體檢查，報告合格。於九月底，甘健成臨死前約一星期，本刊拍得他到養和看病，甘太解釋只是氣管發炎，並非外間所傳死於肺癌。甘健成的二子甘崇轅說：「之後嗰幾日我哋仲一家人一齊食飯，佢死前兩日仲有返鏞記㗎。星期五佢喺屋企瞓覺，一睡不醒，好彩嘅係，爸爸走得好舒服。」他說，死亡證上的死因是「死於自然」。這時，甘老太突然拍枱激動地說：「佢係被佢哋逼死㗎！」
記者早前找過甘蕎因，她含淚表示一家人都很傷心，亦想跟嫲嫲破冰，只是至今仍未有行動。（于港民攝）
甘穗輝（右二）在生時，與三名兒子健成、琨禮及琨岐（右一、左二及左一）一齊打天下，可是他與其中兩名兒子先後離世，此情不再。
三年受盡委屈
「我先生同我講，呢三年係佢人生過得最痛苦嗰三年。」甘健成遺孀亦同哭。她說很痛心，甘健成這三年來受盡委屈，她舉例說：「老爺（鏞記創辦人甘穗輝）喺度，一直都安排司機用私家車載我先生返鋪頭，兩年前開始，司機打俾我先生，話琨禮安排架私家車去車貨，我先生要坐，就只可坐五點五噸嘅貨車返工，好屈辱！」甘崇轅亦表示，於鏞記開員工大會，其叔甘琨禮及其兒子甘連宏，常咄咄逼人。「每次有咩要傾，就話董事會就係 head。」事實是，董事會只有甘健成、甘琨禮及其兒子甘連宏，每次都是兩票對一票。他父親雖然是鏞記董事，但權力處處被削，令有感大半生都貢獻鏞記的甘健成很傷心。
八十三歲的甘老太，說到在醫院見兒子最後一面時，忍不住灑淚。（嚴寶權攝）
甘老太說，三年前她生日，二子琨禮竟託人送上一個白色信封，雖然夾了一些金錢當利是，但上款尊稱她為「甘夫人」而不叫媽媽，令她非常傷心。
罵大伯係狗
他拿出一次開會的錄音片段予記者聽，事緣一向代表鏞記接受訪問的甘健成，在沒有通知其弟琨禮的情況下接受訪問，因而激怒琨禮兩父子，甘崇轅說：「嗰次本來開員工大會，佢哋突然就呢件事召開董事會，叫我阿爸以後唔好再未經董事局同意，私下接受訪問。」
錄音片段中聽到甘連宏向大伯甘健成開火，「我而家叫你（甘健成）唔好掂公司啲嘢，你都唔高興，唔係叫你做嘢喎……」接着又說，「我對隻狗講嘢呀……係呀，我傻㗎，我有病㗎……你唔可以再掂 marketing啲嘢……指你咪指你囉！」甘琨禮亦說：「總之董事局就係阿 head。」錄音中，甘健成想反駁，但聲線微弱，每次開聲說話，都被連宏的聲音蓋過。
原來甘老太也是第一次聽這段錄音，聽罷她又哭着說：「佢哋一家人呢幾年嚟，根本無尊重過呢個大佬。」甘崇轅亦說：「阿爸每日返工，都係走向一個令佢唔開心嘅地方。」有醫生向本刊指，雖然負面情緒不至於令人生病，但卻會令已有重病纏身的病人加速惡化。甘老太其後拿着本刊於甘健成死後、有關琨禮女兒甘蕎因的訪問，憤怒地說：「想破冰？呢個女，好奸㗎，佢係假㗎！個報導出咗，我喺撞到佢，佢又扮講電話。無叫過我一句。」甘老太與已經反目的甘蕎因，諷刺地仍住在同一座大廈，她說甘健成死後至今，琨禮亦沒有問候過她，早幾天她拖着曾孫仔在住所口碰到他們一家人，他們只顧眈天望地，「我真係好心痛。」
甘老太（左）為甘穗輝三太，她自說最得丈夫寵愛。婚後生了三子兩女，唯丈夫、幼子琨岐、幼女潔玲及長子健成已先後離世。
訪問期間，甘老太說起健成愈說愈激動，愈說愈大聲，要長孫甘崇軒（右一）示意她停止。（關永浩攝）
甘老太自言個個都錫，她的屋內仍放了二子甘琨禮女兒蕎因及其兒子連宏的畢業照。（關永浩攝）
甘老太住所內布置整齊，正中間有一座關公像，卻未能「鎮住」子孫。
甘家部分資產
一切皆因錢作怪
甘健成將於本週四出殯，本刊查詢甘琨禮一方，他們表示一家都會出席其喪禮，並指，「大哥死咗，點都要去喪禮，到時甘老太要鬧我哋，我哋只會逆來順受。其他嘢，喺呢個悲傷時間，唔再講喇，免得對死者不敬。」相信屆時將會激到甘老太生蝦咁跳，上演六國大封相。後來琨禮一家又致電補充：「我哋無逼過佢（甘健成），鏞記七十周年慶典，佢話請邊個就請邊個，大部分都係佢啲 friend嚟㗎，全部請晒㗎！」鏞記弄致如斯局面，一切皆因錢作怪，現時鏞記自置的中環威靈頓街鋪位連寫字樓物業，連同鏞記品牌及現金，市值近三十億元。創辦人甘穗輝○四年離世時，將鏞記交給甘健成及甘琨禮兩兄弟拍住上，當時兩人各持有鏞記百分之三十五股份，其餘則由幼子琨岐、女兒美玲及甘老太各持一成。
甘老太說過去兩兄弟一直有傾有講，但兩年多前，一次甘琨禮突然向甘老太提出欲把鏞記賣盤，被她反對，「我話有錢賺做咩要賣，你想點就同你阿哥商量啦。」她說因意見分歧，一家人關係開始轉差，「呢個仔真係好小氣！」記者表示問過蕎因有否想過賣盤，但她否認，甘老太對此激動地說：「我向天發誓，琨禮有講過！」
○七年，甘老太的幼子甘琨岐因食道癌去世，把手頭一成股權留給二哥，令琨禮手持鏞記四成五股份，壓倒大哥，成為轉捩點。
一名不願透露姓名的鏞記老員工說：「琨岐生前喺鏞記做經理，份人好純，成日被琨禮鬧，我哋好心幫佢關房門，免得被人聽到，琨禮走去開番道門，就係想全世界人聽到。但直至琨岐病咗，佢就開始對呢個細佬好好。」甘老太說：「琨岐臨終前將股份俾咗琨禮，我就將我手頭一成股份俾健成，就係想做番佢哋老豆原意要公平。」不過，其後住在美國的女兒美玲，又把手頭股份給予琨禮，再次壓倒大哥，變成甘健成持股四成半，而甘琨禮則持股五成五。
甘健成熱愛運動，除精通武術、打拳外，其乒乓球球藝亦有職業水準。（何少忠攝）
甘健成（左）負責設計鏞記菜式，他亦四處搜羅刁鑽食材，如這塊大龍躉皮。
（《飲食男女》圖片）
鏞記家族表
❶鏞記酒家創辦人， 04年 12月去世，享年 96歲。
❷人稱甘老太，甘穗輝的三房太太，婚後與丈夫共同創立鏞記，生意愈做愈旺，雖後來再有四太太，但仍是最得寵的一個。她最錫大仔健成。
❸鏞記董事，自小跟隨父親在鏞記打天下，負責樓面、採購、菜式設計及推廣等工作，於本年 10月 5日病逝，享年 66歲。
❹鏞記董事，負責管理公司的運作。
❺鏞記董事，負責燒味部，於 07年 12月因食道癌去世。
❻在外國居住。
❼早年在外國因交通意外去世。
❽鏞記 Personal Assistant
❾鏞記 Assistant to Director
❿在外國居住
⓫鏞記財務總監
⓬鏞記董事
為鏞記捱生捱死
兩年多前，甘琨禮以大股東名義跟甘健成說，從此鏞記要以公司法運作，亦引入其子甘連宏做董事。同一時間，原本做會計的甘蕎因悄悄坐上「財務總監」一職，掌握鏞記的財政大權，甘崇轅說：「佢本來幫公司一個月做兩日會計，但後來有一日有食客問我阿爸：『咩你有個女做咗財務總監咩？』爸爸看蕎因卡片才知。」甘老太曾提出要加入董事局，琨禮叫她向董事會申請，但結果當然遭他們的兩票反對。
甘琨禮一直怨恨母親偏心大哥，○九年還寫了一封信給甘老太，指「你只寵愛甘健成，為了他你不顧毀滅我們母子之間的親情，我福薄。」但甘老太不認同自己偏心，「當年琨禮個仔要買樓俾首期，我都俾咗二百萬佢，無要佢還。」她還說手頭的先能公司，持有她部分資產，她自己佔有七成股份，另外三成則由健成、琨禮及琨岐平均分配。「我喺美國間屋，都俾咗美玲，到而家我都唔明美玲做咩要咁對我。」
兩兄弟已不能好好合作，健成曾提出退出鏞記，但被琨禮反對，於是才想到向法庭提出清盤，由法庭裁定鏞記下場。一直在家做家庭主婦，以往鮮有對外發言的甘健成遺孀，首度開腔亦哭着說：「我老公十幾歲已經喺鏞記做嘢，佢清盤唔係想為咩，只係想取番個公道，佢呢幾年真係過得好慘……」甘太哽咽，再說不下去。這時甘老太反過來安慰家嫂：「健成有個好老婆、有好仔、好孫，佢去得安詳，我哋唔好太過傷心，天有眼㗎！」甘健成出殯，甘老太亦不理白頭人送黑頭人的禁忌，堅持出席。說到這裡，本來停了的淚水又再湧上來，她哭着說：「我一定要見我個仔最後一面。」
一九七○年甘健成（左）與甘琨禮（右）仍然和洽，同遊日本萬國博覽會。（《鏞記走過六十年》圖片）
鏞記在戰後由永樂街搬至石板街，圖為石板街鏞記外貌。（《鏞記走過六十年》圖片）
鏞記曾出現一圍紅豆沙叫價五千元故事，皆因當中所用為千年陳皮。
鏞記有「名人飯堂」之名，前港督彭定康亦是座上常客。
甘健成菜式建功勞
說到尾，甘健成對鏞記的貢獻極大。鏞記曾在○九至一一年獲得米芝蓮一星評級，但今年被「搣星」。早於七八年，甘穗輝因身體健康問題「封刀」，把生意交予健成及琨禮；健成負責菜式設計，並積極參與比賽，琨禮負責採購及鋪面裝修，一個主外，一個主內。甘健成平時沒有時間吃飯，隨便煮個蝦子麵，再加一兩滴燒鵝油，撈兩撈而食，就成為後來餐牌上的「太子撈麵」。
早年他將金庸筆下的刁鑽菜式搬上餐枱面，成為「射鵰英雄宴」。二千年又與國泰航空編製飛機餐，設計出「飛天燒鵝」。「鏞記有九成菜式都係健成哥諗出來，佢成日鼓勵啲廚房師傅，無鬧過佢哋㗎。」一名鏞記資深員工說，甘健成對研製新菜式有種能人所不能的天分。而招呼食客的責任，亦落在甘健成身上。
琨禮負責把關
甘健成與食家蔡瀾、唯靈，飲食業行家黃家和及楊貫一等份屬好友。本週四出殯，蔡瀾及前經濟發展及勞工局局長葉澍堃亦會扶靈。多年來，都是由甘健成出面接受傳媒訪問，儼然成為鏞記代言人，外人對甘琨禮所知不多。時裝設計師鄧達智，與甘家這兩兄弟相識二十多年，他認為有今日的鏞記，兄弟兩人其實都有功勞：「成哥負責門面，禮哥會負責背後嘅管理工作，好似財務、請人同埋食材採購，因為佢性格嚴謹，負責品質把關，但就比較低調。」
鏞記這個招牌，是兩兄弟的心血。但近年飽受家族爭拗困擾，已不斷有食客不滿水準下降，剛在鏞記吃完午飯的陳太說：「呢年食物水平同服務質素都差咗。啲員工轉晒，有員工漏落單，嗰部長當住客人嘅面鬧人，以前邊會咁㗎！」死者已矣，相信甘穗輝與甘健成的願望，都是鏞記這塊金漆招牌，最終能保得住流傳下去。
後記
本週一記者買來一隻鏞記燒鵝拍照，事後一眾同事，滿心期待將這隻賣四百八十元的馳名燒鵝「分食」。怎知一放落口，大家不滿之聲此起彼落：「好 嚡呀！」「隻鵝咁老嘅！」「好油。」「嗰間海港酒樓仲好食喎！」大家對鏞記燒鵝的好奇及期望，隨之幻滅。
撰文：梁佩均、黃秋娥
資料：黃翠蓮
沒有留言:
張貼留言