自電訊魔童王維基要進軍電視圈，由開波挖角到起廠房一直大鑼大鼓。雖然政府仲未發牌，不過信心爆棚嘅魔童一於少理，週一（30日）首日開工拍攝首套電視劇，王維基身為老闆亦御駕親征相當緊張，全程跟實。
一向出手濶綽嘅魔童，要打造電視王國，硬件器材當然唔會慳。為咗畫面效果理想，用咗1,600萬買入荷里活級數嘅ARRI ALEXA攝影機拍攝，連最近套大製作《復仇者聯盟》同《雨果之巴黎奇幻歷險》都係用佢嚟拍。用荷里活電影級數機拍港劇，王生認真落本。
王維基自宣布進軍電視後，除挖咗唔少無綫台前幕後，亦用咗6億起新廠房。雖然廣管局仲未發牌，不過王生都好有信心，冇牌照開工，週一（30日）王維基嘅電視台正式拍劇。
跟足兩場
首 套劇集《我的男友Mr.V》（暫名）週一（30日）在烏溪沙開工，老闆王維基當然緊張，朝早7點喺青衣公司舉行拜神後，突然要求隨隊出發，仲要上午去完西 貢烏溪沙，下午再到九肚山探台灣外援唐禹哲班。魔童早上到烏溪沙時，除同主角應昌佑、詩雅傾咗兩句後就行開，反而佢最關心就係兩部攝影機。未roll機時 經常走埋去望吓，又行去摸吓啲鏡頭，他說：「呢部ARRI ALEXA機嚟，我買咗8部要成1,600萬，連埋鏡頭要3、4千萬添！拍出嚟唔只靚，仲好有電影感，我對電視乜都唔識，嚟跟場學吓嘢啫！」 靚嘢幾時都要時間準備，因為ARRI ALEXA畫面細緻，連燈光亦要用更多時間準備，變相令製作成本增加。女主角詩雅首日開工，據知今次同台灣偶像唐禹哲有唔少對手戲。對於王維基用靚機拍電 視，她說：「我唔識睇呀，但望落去好似真係靚啲。（覺唔覺無綫嘅攝影機渣啲呀?）吓！冇拍TVB好耐喇，我都唔係好記得咯！」啲舊嘢，快啲洗腦囉！
荷里活神級新機
王 維基拍劇落重本，除咗高薪挖角外，亦落重本買靚攝影器材。今次用嘅ARRI ALEXA 價值2百萬一部，王維基一買8部連埋100支鏡頭，加埋成4千萬，而ARRI香港區發言人張生話：「劉偉強好鍾意用我哋嘅機，佢話用嚟拍人特別靚，荷里活 好多大片都係用我哋嘅機，我哋部機用嚟拍3D都得！」
發牌未決定
王維基未有牌就開工，不過一向愛抽水嘅蕭若元就喺電 台潑冷水。上週三（25日）人網電台節目《風也蕭蕭》就話：「……似乎唔會發牌畀3間電視台，我聽講好似中聯辦有畀壓力梁振英……因為有兩個係癲狗嚟，李 澤楷試過同梁振英作對……多咗電視台難管……」講到阿爺唔鍾意有咁多電視台，怕佢多嘢講喎。不過3間新電視只有CTI有回應，公司發言人鄭小姐表示：「王 生對發牌好有信心！」係囉，唔好再一台獨大咁悶啦！ ####
我嚟學嘢啫！真實對白
老闆王維基最緊張部攝影機，基本上一到拍攝現場就圍住部機左嵋右嵋。梗係啦，大嗱嗱1,600萬器材，唔望真啲點得
台灣外援台星唐禹哲喺劇中飾演吸血殭屍；而女主角詩雅就同唐禹哲係情侶，劇情直頭係港版《吸血新世紀》。
超八卦
王維基最緊張部攝影機，就連用嚟拍攝嘅DV帶亦甚有興趣，特登開箱嚟睇！
勁吹水
原本打算拜完神就閃，不過王維基最後都隨隊拍攝，仲同主角應昌佑、詩雅傾偈。王維基話：「今日我哋拍到夜晚11點，我會跟到尾！」認真落力。
今年2月CTI動土當日舉行記者會，亦順手晒冷，暫時最紅嘅有張可頤、黃日華、廖碧兒等。
王維基部新機連西片《復仇者聯盟》同美劇《狙魔人》都用佢，希望出嚟質素有美劇咁精采。
無綫40萬舊機 無綫用緊嘅係Sony HD camera 40萬港紙度啦，燈光要求亦冇ARRI咁麻煩，秉承無綫但求快手嘅精神。
蕭若元 似乎唔會發牌 真實對白
王維基
等消息 有線發言人岑小姐表示：「暫時未有任何消息可提供，等緊政府消息。」
冇人返工 now公關表示：「啲高層放晒假喎！要過咗星期三（2日）先答到你！」
沒有留言:
張貼留言