潮鋪月賺10萬 Bob密食開鋪養全家

Tweet

Widgets

主持《兄弟幫》、《登登登對》、又撈埋電影《神獸巴打》的阿Bob（林盛斌），最近撈過界做埋老闆，除了先前在油麻地開鋪賣潮貨外，下月更有意進軍首飾市場，實行將生意發大嚟搞。
百足咁多爪，全因Bob要養老婆同分別4歲及6個月大囡囡。上週記者發現他更落鋪跪地sell客，Bob事後話：「我要揹起頭家嘛，每月都賺到10萬㗎！」爛做又密食，Bob生多幾件都養得起啦。

光頭Bob（林盛斌）在無綫主持兩年《兄弟幫》後，成為各大小騷司儀，年頭更由J2台攻入無綫黃金檔，與曾華倩主持《登登登對》，密密食成功入屋。
肉緊sell客
半年前Bob老婆誕下細女熹熹，連同專心湊女的太太和4歲大的霏霏，Bob要養活一家四口確實要有膊頭有腰骨。去年他已入股朋友在油麻地港鐵站對出的潮服店Popcorn，實行撈多瓣搵多啲。
上週日（22日）記者發現Bob親自落鋪sell客，有男客人想試鞋，Bob即唔理身世跪低替客人穿鞋，且落足嘴頭介紹貨品是限量版，非常落力。 關店前Bob又好關心生意，走到電腦前check數，覺得生意額未如理想，即刻同拍檔改動貨品擺放位置，更躁爆地向拍檔說：「啲牛仔褲擺呢度死梗啦，擺嗰 邊吖嘛！」
Bob當日留守至收鋪，他說：「做得生意梗係緊張啲，不過我要做主持同拍戲，每個禮拜先落嚟一次。搞生意係因為我要揹起頭家嘛，每月都賺到10萬㗎，旺季月賺10幾萬，靠我個嘜頭當係宣傳囉，多謝TVB令咁多觀眾識得我啫！」
有生意自然想添食，Bob下月將在大埔超級城開新鋪賣首飾。「係特許經營權，叫NATKIEL（英國首飾品牌）呀！投資十幾萬；我仲投資緊寫字樓同車位，唔諗辦法搵多啲錢，點養成家人呀？」養兩個女要800萬，頂硬上啦！
身兼四職
勁入屋 Bob除在新城做DJ外，他主持的無綫J2台節目《兄弟幫》亦一向受歡迎，今年初更舉行500集特輯，Bob說：「真係要多謝TVB，呢個節目令更多人識我，之後喺TVB同外面都接到好多job，我好感激！」

3萬MC價 Bob每月接到8至10單司儀job，每單酬勞約3萬好襟計，早前英皇70周年活動（左）Bob亦擔任司儀。據知情人士透露，是楊受成及吳雨親自點名，Bob則回應：「係咩？好多謝佢哋咁睇得起小弟喎！」

撈埋電影 正在拍攝電影《神獸巴打》的Bob在戲中飾演警察，跟黃宗澤同陳小春有好多對手戲。

Bob與杜浚斌（中）、范振鋒於03年在新城電台主持《新香蕉俱樂部》而為人熟悉，即使Bob忙於TVB工作，亦未想過離開電台。
等換豪宅
Bob一家四口現住油麻地廣華街682呎單位，又擁有一寫字樓物業作為出租用途，閒閒地都叫有兩個物業揸手，Bob仲話想賺錢換個大單位，一家人住得舒服啲。 ####

Bob的潮鋪專賣Levi's、Dickies和Stussy等男裝，他會主動向客人推銷，似乎對各品牌好熟悉。

5月開新鋪
Bob取得英國品牌NATKIEL的特許經營權，首飾店下月在大埔超級城開張，但他說：「我邊有咁叻請明星嚟剪綵吖，到時叫啲熟啲嘅嚟幫襯吓囉。」

去年投資10萬入股位於油麻地碧街的地鋪Popcorn，Bob運用他的名氣在微博和facebook宣傳，很快已有錢賺。

跪地試鞋
男客人要試波鞋，Bob即跪低幫客人穿鞋及綁鞋帶。

Bob在電腦查閱生意額時有點不滿，負責看鋪的拍檔奇寶（左）反駁：「你多啲落嚟幫吓手啦，掛住拍戲！」Bob卻轉移視線：「不如將啲好賣嘅擺得顯眼啲啦！」一副老細格。







近來經常大晒幸福，Bob上週更帶埋太太同大女霏霏出席活動，證明自己係顧家好男人。


Bob現擁有油麻地廣華街一物業自住，他揚言要買入更多物業及寫字樓等，出租投資。