《盛女愛作戰》Suki專訪

《盛女愛作戰》Suki專訪

人家原來神咁早, 晌拍攝中途就已經有男友啦! 死心啦!
《盛女愛作戰》 Suki擔心 Florence嫁唔出
2012年04月13日



【盛女大追捕】無綫節目《盛女愛作戰》邀請剩女尋找真愛，花了半年時間為五名參加者 Suki、 Florence、 Bonnie、 Mandy和 Gobby找伴侶，結果 28歲報稱文員的 Suki跑出，剩女搖身變盛女，結識了男友 Zion，感情穩定。該節目本周一才首播，最高收視直達 27點，吸引 173萬觀眾追看，相對過往該時段的 19點收視（約 122萬觀眾），增加了 51萬觀眾，無綫官網有得翻看，首集吸引逾 23萬次點擊。盛女王 Suki昨日出巡銅鑼灣，人氣爆燈，途人指點上前打氣，她照單全收。被網友和觀眾惡評的 39歲奄尖女 Florence， Suki也擔心她嫁唔出，勸她放下執着。
盛女 Suki專訪：最驚 Florence嫁唔出

無綫節目《盛女愛作戰》唯一覓得男友的盛女王 Suki，成功覓得愛郎 Zion，有愛情滋潤自然表現風騷，她昨日一身便服到銅鑼灣鬧巿接受本報記者專訪，雖然節目剛播出，但不少途人已認出她，大讚 Suki真人靚過上鏡，甚有觀眾緣，其間還有不同年齡的女途人上前要求握手和合照，甚至舉高拇指大讚她 No.1，令 Suki甜笑不停。
S： Suki　記：記者
記：好多人支持你。
S：冇諗過家反應咁大，節目出街好正面，我哋好需要支持，好大壓力。
記：可有看網上的討論？
S：八卦有睇啲，激進高登派就冇睇。
記：網民對你批評較少，話你係最好一個？
S：可能我未講嘢啦，都驚驚哋。
記：怕講嘢暴露缺點？
S：永遠都係講多錯多，同一句說話都有人鍾意有人唔鍾意，我聽到啲朋友話呢個女仔冇飯食呀？咁瘦咁醜樣就唔好上電視啦，咁我係瘦，冇得駁。

陳志雲與 Suki及男友 Zion、 Florence飯敍， Florence熱情搭着工作人員。

巿民紛紛支持盛女王 Suki，更力邀合照，人氣爆燈。
失戀暴瘦至 83磅

盛女 Florence嫌大學講師 CK樣子平凡，與她不合襯。電視圖片
記：因失戀而瘦？
S：一向都瘦，一般有 90幾磅，但拍攝時剛失戀，食唔到瞓唔到再瘦啲，真係恐怖，自己都覺得，得 83磅。
記：有傳五個女仔都係做媒？
S：係媒就收咗錢好耐，媒唔會做咁多，個騷係自願參加，大家付出時間俾人去指點，我哋五個女仔私下都有交流。我朋友同家人一定知我唔係媒，佢哋話你唔好咁 樣衰去獻醜，做媒梗唔係啦，但係咪完全冇人追又未至於，咁啱剛失戀跌落谷底，冇晒方向，想搵啲嘢抓住，遇到呢個騷，監製話點就拍囉。
記：節目中只得你搵到男友，係大贏家，付出終有回報？
S：冇話係贏，好似其他參賽者都有得着，只不過我好運地搵到男友，從中識到好多朋友，擴闊咗圈子，純粹咁啱遇到。
記：除咗你，邊個應該都搵到男友？
S： Bonnie同 Mandy囉， Mandy本身條件好，私下好多人追。只要佢肯放低少少，擺多少少時間喺愛情方面就 OK。 Bonnie都有叫我介紹男友，我都話有，因為我身邊有朋友話佢好夠義氣想識佢，我都會介紹，撮合佢哋。 Bonnie應係下個嫁得出，佢好開朗，我係女仔都鍾意佢。
勸 Florence放開自己
記： Florence、 Gobby搵男友或老公機會大唔大？
S：個人睇 Gobby機會大啲，雖然有個女，性格最緊要，肯唔肯放開自己，雖然 Gobby冇咁高學歷，條件差啲，但佢冇話要求多多，要有錢要靚仔要白馬王子，好簡單嘅女人仔，只要有個人錫佢，只要佢遇到就 OK。反而 Florence比 Gobby多要求，執着啲唔肯放開自己，私底下對 Gobby多啲信心。
記：大家都話 Florence好奄尖？
S：佢對自己有要求，對人又有要求，寧缺莫濫，一時三刻好難改變。
記：人生教練 Winnie教嘅嘢有冇用？
S：我接觸其他導師多啲，電視睇到佢教嘅嘢，都有佢道理，唔係個個人受用，我自己就啱聽咪聽囉。
記：節目中安排過 Speed Dating嘅男仔質素有冇嚇親你？
S：我未參加過，有少少驚，原來巿況激烈到咁， 20歲學生妹都出嚟 Speed Dating。當中三個男仔，有個外形比較注目（指頭髮稀疏的 Mickey），呢啲我都怕。
記：你係咪喺中銀同東亞銀行打過工？
S：（避談）私下話你知，我做過好多間，唔需要 mention邊間，唔想影響到人。
被爆曾穿櫃桶底
記：有人爆料你做中銀時偷過同事錢， 09年喺荃灣東亞返工又穿櫃桶底，有冇咁嘅事？
S：（有問必答的 Suki忽然收起開朗笑臉，眼神也變得閃縮，但仍強裝鎮定回答）冇，有都唔會喺呢行繼續做落去，好多嘢唔需要解釋。
記：怕唔怕人紅是非多，陸續被起底？
S：冇預料反應咁大，我會驚，自己去參加呢件事，對自己負責任，唔係要影響到身邊自己工作及同事，我唔係明星、名人，唔使呢啲知名度，我只想過簡單生活。
記：同男友拍拖半年，見過家長未？會唔會搶閘做龍年新娘？
S：大家見過，我畀男友 100分，希望佢都係畀我 100分，我哋未咁快結婚。
另外，一班《盛女》工作人員、編導岑應及構思節目的陳志雲、參賽者 Suki與男友，以及 Florence日前一起飯敍， Florence更熱情地搭着工作人員，非常進取。
採訪：汪芷寧、比華利
攝影：陳志嵐
街訪：「 Bonnie勢利港女」
盛女王 Suki昨日出巡銅鑼灣，不少 fans大讚她可愛但太瘦，也有觀眾彈 Bonnie勢利， Florence也很惡頂。