單車零件王 Shimano

一架汽車嘅組成，未必全由車廠一手一腳打造，即使係一部看似簡單嘅單車亦都一樣，就算車架漆上車廠大名，但當中大部分零部件好似迫力、變速系統、腳 踏、車軨……等其實都係由其仔他單車零件牌子供應，就好似單車友一定識嘅Shimano，就係市場上最大嘅單車零件生產商之一！
適逢今年係Shimano 90周年，今期除咗會解構吓Shimano究竟有幾威外，更會介紹最新2012年車件，聽代理講今年中價車件都有唔少大變身，值得留意！

唔 識Shimano呢個牌子就話對單車有研究，呢條友九成九係吹水王！咁究竟有幾勁大家又知唔知？其實Shimano唔只係一間日本上市公司，世界各地好似 美國、英國、意大利、馬來西亞及中國都有其子公司，業務包括單車零件、釣魚用具、甚至划艇用品都有，不過最勁都係單車零件方面，市場佔有率喺現今已穩佔 50%以上，可以玩到咁大主要係因為Shimano推出嘅產品由低至地獄價入門級到頂級專業都照顧到，而且仲有唔少分支品牌推出其他單車相關 accessories，可能車友踩車望吓自己身上都會搵到出品嚟自Shimano嘅出品！
成功因上進
其實呢間幾乎 壟斷單車零件市場嘅日本跨國大廠，最初只係獨沽一味生產單車飛輪，不過咪睇小當時Shimano只出飛輪好似好dry，廠方記載喺1939年飛輪每月產量 就已經超過10萬數字，而且更出口至世界各地供應單車廠商。 真正開始發展其他單車部件都係由1956件開始，直到80年代石油危機時北美單車需求暴增，歐洲單車廠產量已飽和嘅時間，Shimano不但冇一窩蜂踩場 分一杯更只睇住同鄉對手有接唔完嘅訂單，反而自己就不斷開發新產品，好似家常用勁似汽車加減波嘅轉波系統就係由Shimano發明，當時呢套 Shimano Index System系統唔單只解決轉波跳鏈問題，而且反應更快更清脆，首次推出已經屈晒機，係Shimano現今發展嘅重要事跡。
造件發展一覽

電子轉波平民化
由 Shimano首自發表嘅road bike電子轉波系統（Di2），推出至今就只有最專業嘅Dura-ACE型號，其放棄傳統鋼線式轉波改用步進式摩打控制，消除鋼線經長時間拉放改變長度 而出現偏差，加上前波撥可因應後變速走位而改變位置減少發生磨擦機會，暫時傳統冇一隻系統可以做到呢個效果。 不過一套Dura-ACE Di2售價起碼要$30,000，一啲都唔平民化，即使好處多都唔係好多人可以見識得到！不過繼意大利零件商都推出電子轉波後，Shimano今年終於都 推出一套售價較平民化嘅Ultegra Di2，代理話呢套會比Dura ACE Di2平3分1價錢嘅平版電子轉波，主要用料比Dura-ACE版重，好似前波撥已比頂級版重38g，而且在使用相同電池下，行走距離較Dura-ACE 版本嘅1,100km少約300km，不過功能上跟Dura-ACE Di2一樣，叫做可以平買貴用。（售價待定） 查詢：鎮洋兄為單車（2668 1183）
專家講電轉趨勢
其實呢套Ultegra Di2喺之前9月19日已由代理舉行發布會，當日更有日本Shimano專員解構，我哋梗係問吓佢哋點睇電子轉波嘅市場。「嚟緊road bike都係電子轉波嘅世界，好似家已經有我哋Shimano都幫緊7隊環法車隊都用緊我哋套Dura-ACE Di2，而且都有好嘅feedback，車隊未來都會繼續用！」不過再問MTB會唔會都開發一套電子轉波？Katsuhiro就話因為MTB行嘅地方非常 極端，唔太適合用電子系統，所以Shimano暫時都唔會有計劃開發，亦都唔建議用Di2玩山！
激變迫力皮散熱
要數 單車迫力中擁有最強制動力，當然係現代MTB常用嘅油壓碟剎，不過有時玩山落長命斜，因迫力皮跟迫力碟產生過量磨擦，唔係用靚料嘅中低品未必有足夠抗熱能 力，好大機會減弱制動能力及發生「 脹掣」情況，所以Shimano今年發表嘅中價Deore XT 套件中，迫力部分便作出改良，首創喺迫力皮上加上類似電腦CPU散熱片設計，而且更伸延至卡鉗外，利用行車時空氣於散熱片上流動嘅方法帶走熱力，令即使中 價嘅XT迫力都有更耐久嘅迫力效果，唔一定要下下追求頂級。（$2,980/套）
鎖死腳踏偷輕小改
經Shimano 發揚光大後嘅lock踏SPD系統，成個形式都冇特別大改就知有幾成功，今年兩款中價road bike 及MTB款式嘅Shimano SPD腳踏都有少改，好似Ultegra SPD road bike lock踏今年新加更輕碳纖款式，一對已經比鋁合金版本輕57g，愛偷輕車友必buy；而今年Deore XT嘅M785 MTB lock踏就加上黑色鋁合金外框，方便意外甩踏時亦可以暫時踩住用，令覺得踩山用SPD lock踏危險嘅車友，都可以放心試用。（$980/對 Deore XTM785、$1,980/對 Ultegra PD-6700-C） ####


Shimano創辦人Shozaburo Shimano

Shimano喺2009年先至開始划艇用品業務，而第一件出品就係圖中參考咗Shimano SPD單車鞋設計嘅SRD600划艇鞋及腳架。

除咗單車部件響晒朵，原來Shimano釣魚用品喺釣魚界一樣有名，而聽筆者身邊有玩開釣魚嘅朋友講，成套中級Shimano魚竿都要成萬蚊，唔係嘢小㗎！

1931
Shimano由1921年造O.E.M單車飛輪起家，直至1931年先有第一個自家品牌單車飛輪3.3.3。

1956
講到Shimano最架勢當然係發明咗精準嘅單車加減波Shimano Index System（SIS），而第一套應用SIS就係1984年推出嘅road bike頂級部件Dura-ACE中。

1984
講到Shimano最架勢當然係發明咗精準嘅單車加減波Shimano Index System（SIS），而第一套應用SIS就係1984年推出　road bike頂級部件Dura-ACE中。

1990
單車lock踏早於1971年已推出，當時單車鞋鞋底須裝上大嚿鎖碼先用到，令落車行路非常不便，直至90年發表Shimano Pedaling System（SPD），其細小鎖碼令鞋底凸出面積大幅降低，令車手落車行路更輕鬆。

2003
2000年起MTB興起，Shimano就以road bike迫力轉波一體系統為基礎，發展咗一套Dual Control系統供MTB使用，不過因MTB市場唔太接受要局限於使用Shimano迫力，所以07年放棄繼續生產。

2009
繼SIS之後，Shimano再次發表革命性轉波系統Di2，全新系統由傳統純機械轉為電子化，首套Di2跟25年前SIS一樣都係喺Dura-ACE出現，而且仲供應唔同職業車隊使用，成為另一傳奇。


尾波腳設有保險裝置，若受強大撞擊會停止運作，防止內部零件受損。

前波撥可為後波腳移動位置作出微調，令所有波擋可暢順運作。

電池為防水設計，市面上已有車架於車底加上Di2專用孔位安裝電池。

轉波掣按下觸感跟機械式冇分別。

車頭上安裝咗電池計，只要輕按上按鈕，就可以用顯示燈顯示電量情況。

接駁電腦後除可多做各項微調外，更可以好似打機set joystick咁，鍾意咩掣上波落波都得，比舊式機械更彈性。

只要用編號為sm-pcel嘅接駁線，就可以用PC接上Di2方便做setting，而且定時仲有firmware更新，勁cyber！

鋰電池與Dura-ACE共用，只需90 mins充電即可充滿，壽命達500次以上充電次數。


Shimano市場部助理經理林克洋（Hayashi Katsuhiro）


手掣款式改為跟上年新款XTR一樣嘅外表。

新款迫力皮不能用於舊款迫力卡鉗上，換迫力皮要留意。


新嘅碳纖款式成個外框底殼都由碳纖製造，所以碰撞要盡量避免。

改款前XT Lock踏（右）就係少咗新款M785（左）鋁製外框。