上禮拜奧瑪花曼着泳衣幸福晒巨肚，睇到好多媽咪級讀者好開心。事實上，大肚真係開心事嘛，開心自然就要分享。不過美國天后Jessica Simpson就冇咁好彩。 早前佢為時裝雜誌《Elle》拍攝全裸大肚照，諗住留個美好回憶，點知遭到「封肚」。原來美國亞利桑那州一間超市，接到幾個街坊投訴，指封面太暴露喎。咁 店長為免順得哥情失嫂意，就搵塊紙皮遮實住，費事眼寃。不過講時講呀，啲模特兒泳衣照分分鐘仲暴露啦，呢一鑊Jessica認真無辜。
雜誌封面上（左），Jessica一手護胸一手攬巨肚，標準孕婦裸照甫士。點知俾幾個多事師奶投訴，好哋哋一個靚封面慘被遮實（右），上面仲叫人唔好拎開紙板，保守得可以。
裸得有道理
其實大肚影裸照，平常不過嘅事。自狄美摩亞早年開創「裸肚潮」開始，呢股風氣一直hit到今時今日，好多女星逢大肚必影，一影仲影幾輯，留住美麗同時宣揚母愛偉大。 ####
大肚婆都唔俾面㗎！(設計對白) 懷孕近8個月嘅Jessica自爆肥咗50磅，身形勁脹肚又巨，被網友懷疑佢懷孖胎，不過早前佢已經否認。
裸肚教祖 就係狄美1991年呢個大肚雜誌封面，令各界讚好，其後個個跟住仿效。
夫妻齊裸 2011年，懷雙胞胎嘅樂壇天后Mariah Carey，夾埋老公Nick Cannon一齊影相，老公雙手遮住天后胸部，又恩愛又性感。
模仿狄美 超模歌迪亞施花於2010年為時裝雜誌《VOGUE》拍裸肚照，其甫士跟狄美如出一轍。
勝在高貴 Britney Spears 2006年以鑽飾、皮草影裸肚照，比平日癲雞形象高貴好多。
瞓身全裸 2008年1月，天后Christina Aguilera誕下男B，不過就喺之前，曾全裸瞓身為《Marie Claire》影相。
刊於871期《忽然1周》
沒有留言:
張貼留言