淘騙局貨到付款照呃你

冇耐前大陸搗破i走私集團，報道話佢哋過去經淘寶賣咗價值成5億嘅iPhone同iPad，但最得人驚係有唔少係舊機充新機賣，搞到好多人都再度關 注喺淘寶可能買到假貨、次貨嘅危險性。事實近排的確多咗奸商喺淘寶搵食嘅消息傳出，網上都成日有人話中過招。其中最hit嘅一招，就係靠「貨到付款」嚟呃 人，睇落好似好有保障，但實情係一個局，執平貨時記緊要提防！
基本奸招 賣家扮速遞
淘寶容許買賣雙方協議之後選擇「貨到付款」，即係件貨由速遞送到香港買家手上，買家即場畀現金速遞，再轉交畀賣家。睇落呢個制 度幾有保障，件貨唔對路，買家都可經淘寶向賣家要求退錢，之不過大前提係交易每個步驟都要喺淘寶規定下進行，而且要使用淘寶認可嘅速遞，咁先夠證據退錢。 估唔到奸商出到蠱惑嘅位，就喺速遞上，佢哋會專登揀未經淘寶認可嘅速遞公司送貨，甚至有case係奸商自己扮速遞去送。到上門後，就一口咬定話公司唔畀買 家驗貨，要買家立刻簽收畀錢。買家喺收貨後先有機會發現件貨係老翻或損毀，到時想上淘寶提出退貨，就因速遞公司冇淘寶認證，而證據不足，追數失敗！

進階奸招

 1. 請君入甕再取消
奸商開頭話買家可經信用咭或支付寶畀錢，後來老吹冇貨等原因，叫買家退錢先，再close個交易。但隔一陣又話可由廠方直接發貨，但要改為「貨到付款」，買家照買就會中招。

2. 虛假賬戶冇得追
奸 商仲可以開兩個賣家賬戶，買家向賬戶A落單，奸商就用番買家姓名同地址，自己假扮買家向賬戶B再落單，然後由賬戶B送假貨畀買家。但淘寶嘅紀錄，就只係買 家同賬戶A交易，而且因賬戶A從未送出過貨，所以交易狀態仍維持喺「等待賣家發貨中」，即係交易未完成，就算買家「貨到付款」後發現唔妥，都冇得追！

淘寶防騙策略
1 無論賣家講乜都好，點都企硬拒絕「貨到付款」，永遠用支付寶、信用咭或去7仔充值淘點嚟付款。

2 盡量要求賣家用順豐等淘寶認證嘅速遞送貨。雖然順豐官方話容許買家收貨時先驗貨，但有好多網友都話試過被速遞員拒絕，遇到呢個情況應拒絕收貨。



騙案重演

淘寶提供「貨到付款」服務，本來係想人網購貴重貨品時更安心，點知反而俾奸商有機可乘。

能夠「貨到付款」嘅貨物，會寫明喺貨物簡介頁上，但交易時記住同賣家講唔用「貨到付款」。

港人較少上淘寶買手機、相機，「貨到付款」陷阱通常係買名牌相機袋、手袋同衣飾時買錯老翻，或買其他gadget時遇到次貨。

因交易已關閉，淘寶直頭當呢單買賣冇發生過，買家畀錢收貨後發現有咩問題，淘寶係完全唔會負責。


3 核對送貨單上嘅賣家姓名同訂單編號等資料，睇吓係咪同淘寶上顯示一樣，唔係的話應拒收。

4 儲低阿里旺旺嘅聊天紀錄，拗數時可用作證據，唔好經電郵或其他淘寶唔認可嘅通訊方式交談。