跑車一向是速度嘅象徵，不過因為需要強大輸出，所以9成9跑車都用大c.c.引擎，完全同時下提倡嘅環保理論相反，只有少部分如Tesla Roadster運用電能推動做出零排放，似乎環保跑車在汽車舞台上仍不是主流角色！ 相反現時潮玩嘅單車就環保得多，即使最講速度嘅road bike都一律以人力推動，絕對百分百環保！今期將以3款2012新road bike為主角，更邀請亞洲獲獎無數嘅前港隊車手何兆麟（何Sir）作專業測試，熱愛速度的單車友絕對不能不看！
Tesla Roadster Sport Spec.
馬達：365 volt 交流電動馬達 電池：6,831組鋰離子電池 馬力：288ps/4,400-6,000rpm 扭力：41.3kgm/0-5,100rpm 傳動：單速自動波 0-100km/h：3.7秒 車重：1,238kg 車身：3,940×1,852 × 1,127mm 100%充電：30小時（15A） 持航距離：394km 車價：$1,235,000 查詢： Tesla Motors HK （9842 8960）
相比MTB又前後避震、又油壓碟迫力，road bike科技看似簡單得多，主要集中用料同角度上嘅分別，所以每一架road bike嘅分別可能非常細微，要試出每架嘅特性，當然要高手出馬先至有能力！今次就邀請咗踩road bike超過17年、曾經喺01年全運會場地記分賽奪冠，嵋家喺匯豐單車隊同自己創立精英體育發展有限公司中教單車嘅何Sir試車就最fit嘞！事關跟何 Sir學踩車嘅學生無數咁多，唔少學生都會問佢買咩road bike好，搵佢試車、揀車一定夠晒經驗
「每架車都有唔同特性，揀架適合自己發揮先叫好車！」
跑 車除咗馬力、扭力夠大，輕量化都好緊要，好似最環保嘅Tesla Roadster，就用上大量碳纖部件偷輕，令動力負擔更少，做到一定節能效果。喺road bike上亦都用同一理論，大部分車架已經好似Tesla Roadster用碳纖維減磅，目的都係令單車手以有限嘅人力，爆發出更快速度。 不過當家road bike架架都用碳纖，何Sir話對一般車友嚟講，重量再唔係首要問題：「其實家啲road bike都造得好好，中低level車已經用碳纖車架，成架車都只係8、9kg樓下，再貴成倍嘅比賽級頂多零件靚啲輕多2、3kg，所以一般人揀2萬左右 嘅中低價車就已經可以有排玩，就算用嚟參加本地比賽都冇問題。不過買架單車成幾萬蚊，除咗要靚之外，亦都要啱自己踩車style，因為唔同牌子都有唔同性 格，有啲著重爬山、有啲著重直路，如果你天生適合爬山，但踩咗架直路車就未必好match，揀架平均型亦未必100%可以發揮到個人潛能，所以幾靚嘅車都 要啱自己先係好車。」筆者再問何Sir屬於邊類型，何Sir則笑言自己已少咗操車，所以屬於平均型！
何 Sir醒你揀車 tips
市面road bike有平有貴又多款式，但架架都一樣樣，唔係玩開road bike嘅新手真係唔識揀車，所以筆者就請何Sir醒大家揀road bike要留意嘅部分，等大家明白一架平、貴road bike嘅分別同用途，起碼可以基本明白架單車值唔值，唔使俾單車鋪劏到一頸血！
Alan Ho's Profile
名稱：何兆麟 年齡：32 加入港隊年份：1996 全職年份：1999至2003 最佳比賽成績： 2000年環南中國海單車賽大中華區總冠軍 2001年全運會場地記分賽金牌 2002年亞運會麥迪遜賽銅牌 其他榮譽： 2002年獲特區政府頒發榮譽勳章
車架粗幼分強項
大部分過$20,000嘅車已經用碳纖架，不過除咗睇用料，車架管材粗幼都緊要，即使冇做型號research，睇車架粗幼都已可以分辨到車架強項，好似車架比較幼同少骨位，就代表車架比較軟身，屬於爬山力強嘅車架，相反則專攻平路多啲，非常簡單。
留意車件知級數
雖然車架係一架單車嘅心臟，但更靚嘅車架都要有好嘅配件如迫力、傳動等配合，如果買成車，跟車配中級數如Shimano 105、Campagnolo Veloce或者Sram Rival已經夠用，當然再高一級會更好，但車價隨時會貴多一半以上㗎！
車軨倍價跳級難
除 咗車架，車軨就係單車另一生命，一般中價車跟嘅都係約$3,000款式，有好似Mavic、Fulcrum等大廠出品已唔錯，唔係專業車手根本唔需要玩到 咁pro.，但如果真係要upgrade，就建議一步到位換過萬一對嘅pro.軨，因為啲貴比賽road bike，主要都係貴喺隻軨上面！
Round 1 鬥衝線直路
「Dreamon車架比較硬身，直路發力變形少。」
跑車以速度為先，Tesla Roadster Sport有299匹，0-100km/h加速只需3.7秒，何Sir話road bike當然冇得追！不過road bike直路衝線除咗車手本身夠爆炸力外，車架嘅剛性都好緊要，尤其直路衝線最能feel到車架剛性足唔足夠。「我哋踩比賽通常都係會喺終點前用full power衝線，嗰刻車架會最受力同容易變形，所以著重直路嘅車都會造得比較硬身，雖然會犧牲吸震嘅舒適性，但就可以減少動力流失，好似Dreamon車 架用比較硬身嘅3k碳纖織法材料製作，同時亦加上唔少骨位加硬，管身亦造得較粗壯，加上傾前坐姿，絕對係天生直路好手。」
至於Route同Sempre直路表現又如何？何Sir明白Sempre尾後叉雖然用咗Ultra Thin Seat Stay加硬技術，但原來鋁車架嘅Route都好少少。「Sempre個車架係3架之中最幼，所以最易變形卸力，反而Route鋁架缺少彈性變形較少，所 以比較下Route排第二！」而現時road車架都強調破風力幫助直路加速，3架車之中以Dreamon最流線，所以Dreamon喺3架車中成為直路 王！
Definitive Gitane Dreamon 105 Spec.
車架：Dreamon Carbon 3K 制動：前後Shimano 105 Dual Pivot卡鉗式 輪組：前後Mavic Aksium 傳動：Shimano 105 2×10速 重量：8.35kg 售價：$36,000 查詢：祥記單車 （2474 6794）
身世迂迴曲折 Gitane
Definitive Gitane起源自法國一間農業工具維修廠，1930年開始造單車，1963首次環法封王，80年代曾經易手至法國車廠Renault同Peugeot旗 下，不過喺90年代尾開始走下坡，最後更曾經失去蹤影。不過喺2010年開始Gitane終於捲土重來，以Definitive Gitane車系重返單車界，雖然仍未再次踏足環法舞台，不過車隊已經喺歐洲其他賽事奪得多次分站冠軍。
Round 2 鬥爬山角度
「Bianchi Sempre角度較後有利爬山」 Tesla Roadster用電動摩打推動，起步已經可以輸出最大扭力，上斜坡一定話咁易！不過單車用人力推動，所以上斜除咗轉波外，何Sir話車架個角度、車架粗 幼同用料都會對爬山有直接影響：「今次3架車之中，以Bianchi嘅 Sempre最傾向爬山類型，除咗牌子一向注重爬山性能外，亦因為喺同size嘅情況下，車架個坐姿角度最傾後，實際數字比另外兩架多出1度，加上top tube亦比較長，非常有利上斜，加上Sempre個碳纖維車架造得比較幼身，爬山會feel到車架有一股彈力用嚟幫手。」 至於另外兩架如再作比較，何Sir會覺得Wheeler Route比較有優勢：「雖然呢架Route仲用緊鋁合金車架，上斜會少咗Sempre有嘅車架彈性，不過偏後角度佢介乎喺兩架車之間，令到上斜始終會比 偏前嘅Definitive Gitane Dreamon好。」
Bianchi Sempre Veloce Spec.
車架：Sempre Carbon 制動：前後FSA Gossamer Dual Pivot卡鉗式 輪組：前後Maddux RX 5.1 LITE 傳動：Campagnolo Veloce 2×10速 重量：7.7kg 售價：$20,500 查詢：祥記單車 （2474 6794）
百年世界老牌 Bianchi
來自意大利嘅Bianchi，由1885年成 立至今已有127年歷史，係現今最古老單車廠之一、亦係首用前後大小相同兼用氣壓車胎嘅單車廠，最早喺1951年已聯同車手Fausto Coppi奪得環法冠軍，除造單車外亦分別喺1900至1939及1897至1967年中生產過汽車同電單車，屬於身經百戰嘅單車公司。
Round 3 鬥平均實力
「講 角度Route最適中，新手就最易習慣。」 鬥咗2個round，Sempre同Dreamon都有各自性能強項，若果仲未知自己強喺邊一面，何Sir話揀中性Route就比較穩陣：「揀架偏中性嘅 車可以慢慢搵吓自己嘅強項，好似Route咁雖然車架仲用鋁合金，不過講角度佢最適合新手就最易習慣，用埋碳纖前叉令鋁架都有近似碳架feel嘅行車感， 加上擁有最長head tube長度，令爆直路都一樣穩定，而且價錢係3架之中最平，配fullset Shimano Ultegra件比貴$16,000 Dreamon嘅Shimano 105仲要高一個grade，最啱入門初哥。」
Definitive Gitane Dreamon 105
車架：Route 6061 Aluminum Tubes 制動：前後Shimano Ultegra 6700 Dual Pivot卡鉗式 輪組：前後Fulcrum Racing 7 傳動：Shimano Ultegra 2×10速 重量：8kg 售價：$19,500 查詢：新合單車（2396 2578）
台灣road bike初哥 Wheeler
相對Bianchi同 Gitane，台灣Wheeler知名度同歷史都比較弱，但係現存台灣歷史最悠久單車廠之一，1975年開始造單車MTB為主，1992年更奪得 Downhill World Champion冠軍，不過2000年之後先開始造road bike算係比較初哥，不過勝在售價親民，即使碳纖pro.車都比同級對手平20%以上，屬新手入門恩物。
何Sir評分
總結 「$20,500 Bianchi最抵玩！」
經 過何Sir一輪試踩，三架車評分已塵埃落定，Sempre著重爬山、Dreamon著重直路、Route表現平均，所以如果要比較同排次序都比較困難： 「其實3架車雖然各有特色，不過分別都唔算太大，但因為我本身冇特別偏好，理論上Wheeler會比較啱我，不過呢個價錢加多$1,000又有碳纖架同 Campagnolo件，咁Sempre真係抵好多，所以畀我會揀Sempre！」 ####
Tesla Roadster嘅頭冚同尾翼等都用上碳纖維部件，同road bike車架一樣要最輕量化。
現時何Sir踩緊嘅戰車係由做衫嘅牌子Champion Systerm贊助，車價約3萬，何Sir覺得架車屬於平均型。
3架車之中以Dreamon車價最貴，連坐位都係用出名貴嘅意大利Fizik出品，仲要夾埋車身黑白、紅拉花。
粗大下管唔係最pro.型號先至有，Dreamon下管一樣造至水滴形，夠晒破風。
細心留意Dreamon上管有微小起骨位，作用就係加強車架強度。
傳動只配Shimano 105套件，3架車之中最低階。
傳動用意大利Campagnolno Veloce套件，級數雖屬牌子入門級，但已可跟中級Shimano比較。
較少起角嘅車架富有彈性，而上管較長車架令坐姿向後，有助增加爬山力量。
3架車中唯一採用BB30嘅新五通中軸規格，最入流！
一支過的尾後叉採用UTSS設計，雖然話可以增加車架剛性，其實作用不大。
跟車配Fulcrum Racing 7廠軨，即使去比賽已經夠晒用唔使再upgrade。
傳動用Shimano Ultegra套件，3部車之中屬最高級。
沒有留言:
張貼留言