新聞耳目
雙非嬰湧港潮持續，人大要求釋法解決，公立醫院產科兒科大叫救命。這些跨境嬰兒部分更有癌症、嚴重地中海貧血等奇難雜症，但本港初生嬰兒的 夭折率不斷下降，根據衞生署資料，去年每一千名嬰兒中只有一點七個死亡，比五年前一點八還低，皆因本港有一班24小時on call的初生嬰兒深切治療部（NICU），把握每個最後關頭，把一個個瀕死的嬰孩搶救過來。
週日深夜十一時，外 面一片黑暗，但觀塘聯合醫院3A初生嬰兒深切治療部卻充滿了光。這裡是嬰兒「出生入死」的重要地方。兒科部門主管醫生陳衍標早已在場，因為一名患了急性腸 炎的早產嬰送入病房，需要緊急治療，陳醫生替嬰兒照了X光片後，認為情況危急，馬上急call小兒外科醫生到場會診，決定立即進行手術，把腐爛壞死的腸臟 切除，整個病房氣氛進入最高作戰狀態，陳衍標即時分配工作，大家就忙着準備手術用的藥物及儀器，「我哋個腦要好冷靜，因為每一個決定對BB都好重要，大家 有默契，各自埋位就做嘢，唔使多講。」他說。
全港公立醫院有一百張NICU病床，聯合醫院有十張，佔總數一成，另外還有三十五張嬰兒特別護理病床，供情況好轉的嬰兒轉床入住。四十五張病床每 天的使用率達百分之一百，即使去年兒科醫護流失達一成，聯合仍是九龍東最重要的「嬰兒拯救隊」。陳衍標還身兼香港新生兒關注組召集人、醫管局兒科中央統籌 委員會副主席等職位，是公立醫院初生嬰兒服務的先鋒。
不再皺眉
雖然人手緊張，但希望仍然天天出現，陳衍標說：「3A 呢度日日都有奇跡！好多BB來嘅時候病好重，佢哋雖然好細粒，但辛苦嘅時候都識得皺埋眉頭，好似話緊俾你知我好軟弱好唔舒服，但係佢哋意志同生命力好強， 當你輕輕握住佢哋嘅手指頭，感受一下微暖嘅體溫，就會明白。我哋班醫護其實好緊張，因為入得來嘅BB情況一定差，但係當見到BB做完手術，或者落完藥瞓醒 覺睜開眼仔，睇住佢哋好轉，『升班』（即轉病房）轉去特別護理部，之後由媽媽抱出院，之後大個仔識得回來探你，或者去鼓勵其他病友，幅圖畫真係好靚。」陳 醫生一邊說，一邊給記者看一本本相簿，裡面全是一個個BB「重生」的經過，從第一張滿身插滿喉管，到最後充滿笑容，他都說得出一個個故事。
他 指着其中一個BB「早兒」說：「早兒出世時得六百克（約1.3磅），因為係早產，媽咪叫佢做早兒（早產兒），早兒好番後，媽咪寫咗本書，講述佢喺醫院嘅心 路歷程，書名就叫早兒，仲請我寫序，勸勉其他早產嬰媽咪唔使咁擔心。其實早兒未出世，我已經識佢，因為媽咪佗住佢時血壓高，問我點算好，我叫佢唔好擔心， 早兒好strong，而家已經十四歲啦，佢有個契媽，係以前照顧佢嘅護士，早兒仲送咗學校貼堂功課俾我，上面貼咗好多佢喺醫院嘅相添。」他又帶記者參觀一 個病房內牆上貼着的「父母心聲」和嬰兒成長照片，又說渴望在病房內做一幅「希望之牆」，「掛一部LCD電視喺牆上，將BB媽咪心聲播出來，俾更多人睇到聽 到，當做一個鼓勵！」 陳衍標更成立「3A寶寶同學會」，由BB家長擔任會長，每年邀請已出院的「會員」到醫院聚會分享重生喜悅。在NICU做了十年的資深護士陳嬋華說：「每次 見面都發現佢哋唔同晒，高又高過我，有啲仲識彈古箏同唱歌，發現自己做嘅嘢幫到人，好有使命感。我初初分派來NICU做都好驚㗎，因為所有學生喺護士學校 實習時，都冇得去NICU實習，因為呢度個個嬰兒病情都好危急。有次有個BB好差，醫咗好耐都未好，返到屋企我好擔心，點知放完假返去，佢已經換咗機（呼 吸機），又瘦咗（即表示身體冇再腫），覺得好神奇。」
重現生趣
記者在病房逗留多天，發現媽咪吳太最開心。吳太在病房陪了兒子半年，看見兒子不再皺眉頭，可以抱住他在病房 與護士傾偈，令緊張的氣氛得以緩解，已有一子的吳太，在三十九歲時再懷第二胎時，出現子宮瘤，曾多次出血，一直都擔心胎兒安全，結果嬰兒早產，出世時肚子 嚴重腫脹，「大到好像一個吹脹咗嘅氣球」，立即送去深切治療部搶救。 吳太說：「佢出世時，塊面青晒，個肚又脹，我差唔多暈低喺地下，醫生話佢肚入面好多腸扭曲壞死，要立即做手術切除，手術後以為穩定，點知佢又因為食奶時唔 適應屙血，又要再做多次手術，心情真係大上大落，最後切咗七成嘅腸先救番條命。」陳衍標說只要BB進食再穩定就可以出院。這天吳太抱着他，喜孜孜的和陳醫 生及護士合照，BB眼仔碌碌，更懂得定睛望住鏡頭，「我唔知點感激佢哋好！」吳太說。
護士保母
醫院部門運作經理馬寶 琼就說，明白嬰兒入院後，家長都會感到無助及徬徨，為了令他們安心及了解嬰兒的情況，每個嬰兒都會有專責護士（primary nurse）主理照顧，她們就像嬰兒的保母，「BB由入院到出院，專責護士都會睇住佢進展，個牌就掛喺床邊，媽咪一望就知道係邊個。」 做過專責護士的陳嬋華就說：「父母好需要人支持，有時拍吓佢哋膊頭，唔使講太多嘢，就已經係一種support；佢哋有咩想知，我哋都可以幫忙。我哋會鼓 勵佢哋多啲抱BB，就算BB插住喉管都可以抱㗎，BB伏喺媽咪胸前，心跳會穩定番好多，好多媽咪一抱就一兩個鐘。」而醫院亦不會限制媽咪餵人奶的時間，有 問題可即時約見主診醫生。 陳衍標更是24小時on call，一名在病房陪了心臟有事的BB三個月的爸爸就說：「呢度啲醫生護士好忙，忙到你無法想像，佢哋一視同仁，唔會理BB係咪雙非都盡力去救。陳醫生 無休息，返來擺低件衫就巡房，每一個BB佢都識氹。我個仔係度醫咗三個月，做過心臟手術，又要醫兔唇，雖然辛苦，但我嘅感覺好實在。」
服務快爆煲
根 據政府文件，2010-11年度公立醫院NICU的經費為三億二百萬元，預計2011-12年度增至三億四千萬元。陳衍標表示，目前全港公立醫院的 NICU，使用率均高達百分之百，已高於英國衞生部的八成安全指標，近年雙非嬰湧港，佔NICU床位約一成，令緊絀情況更加嚴重。這些嬰兒部分更患上嚴重 疾病，包括癌症、心臟病、先天性新陳代謝異常，嚴重地中海貧血等，均須政府增加人手和資源配合，但去年公立醫院有三十二名兒科醫生流失，佔整體兒科醫生一 成，反映醫管局的人手預測與實際情況有偏差，「如果預備得好，每年收五萬收十萬雙非嬰都冇問題，如果而家唔規劃，好快服務就會爆煲。」 ####
嬰兒送到NICU病房後，身體十分虛弱，身上插了生命監測儀器，醫生正細心撿起小手做檢查。
陳衍標在聯合醫院NICU一直擔當總指揮工作，「香港人好graceful，有次我開完會好沮喪，有個媽媽行過來多謝我救番佢個BB，令我好感動。」
病房貼上很多嬰兒相片及父母分享文章，陳衍標希望未來做一幅「希望之牆」，鼓勵其他媽媽不要擔心。
醫護人員正聚精會神跟進BB的進展，床邊的儀器顯示BB的心跳，血液含氧量和體溫。
吳太的BB入院時肚仔腫得很厲害，做了兩次手術，現在已經穩定下來，可以抱住在病房周圍走，和人打招呼。
這天吳太母子和一班醫護齊齊合照，令緊張的氣氛稍稍得以放鬆。
陳嬋華說她們會為每個嬰兒用毛巾捲成「安樂巢」，讓他們恍似睡在媽咪的肚裡般安穩。
每個嬰兒床前都掛上專責護士的名牌，協助憂傷徬徨的父母了解病情進展，聯合NICU六年前率先開始這個制度，現已在全院推行。
沒有留言:
張貼留言