兩派齊追擊中聯辦阻唔住 振英哥手尾長

特首選戰峰迴路轉，近幾日形勢又出現微妙轉變，諗過落場嘅曾鈺成最後勒韁，決定唔玩，葉劉「吸濕」成功，日日上鏡，但阿曾嘅提名票唔會過畀佢，入到閘嘅機會極微，一輪大龍鳳之後，結果回歸基本步，維持唐、梁、何三人對陣格局。此亦係阿爺所想，個局已夠亂，無謂煩中添煩，最好暫時保持現狀再謀後着！

唐梁對決（仁哥只係陪跑，唔使計）邊個會勝出，會唔會「流選」，仍然有好多變數（詳見本期「頭條新聞」），其中之一係振英哥單「西九門」如何發展。 政圈線人回報，政府上星期再掟出一批資料，披露振英哥一路力捧同佢公司有關連嘅作品，更加令人懷疑「有嘢」，立法會內幾幫人馬雖然各有盤算，但都等機會追 擊佢，如今既有大條理由，自然不約而同齊齊祭出「尚方寶劍」（《特權法》）誓要查究到底。至周一為止，地區直選議員已肯定過半數同意，功能組別方面，泛民 加建制派（未計工聯會）估計有十七票支持，應該可過到，大會周三決定後，就即刻成立專責調查委員會，排期「開庭」審訊。

建制派同泛民都同意出「尚方寶劍」審梁振英，周三應會通過，如果「開庭」聆訊，可能搵出更多內幕，佢老哥都有排煩。

線人話，中聯辦上星期約六個建制派議員會面，包括石禮謙、林健鋒等，會上直言希望各人從大局着眼，唔好拔出「尚方寶劍」劈振英哥，但班友點會聽吖， 一來佢單嘢的確疑點重重，公眾都要求揭出真相，無理由放佢一馬；二來梁營出手狠辣，招招攞命，呢一邊如果自綁手腳，步步忍讓，咪好唔公平？一位建制派議員 就同小弟講：「兩個人打交，中聯辦出嚟勸交，攬住一個叫唔好打，另一個就衝埋嚟出拳兜心口擂，呢一邊梗係掙開，奮力還擊啦！」
所以班建制派議員去完西環後，繼續四處奔走推動「開庭」，相信周三通過嘅機會極大。如果立法會展開聆訊，必定召振英哥幾個高級夥計「出庭」，盤問佢 哋當時有冇同老細講，以及同楊經文團隊有乜關係，chok得幾chok，可能會供出內幕，再加上立法會有權要求戴德梁行提供內部文件，咁查落去，振英哥都 一身痕！依照程序，立法會成立專責委員會之後，仲要安排聆訊時間，起碼要幾個月時間至有結論，到時唔知邊個做咗特首，如果有乜大鑊嘢，必然亂到七彩，阿爺 都唔想見到咁嘅環境。

仁哥同泛民人馬正兵分兩路，一路攻煲呔，一路攻振英哥。

至於泛民方面，線人話班友最近傾過，決定兵分幾路，一路攻煲呔，目的係打擊政府威信，藉此累積政治籌碼，幫九月立法會選舉造勁個勢；另一路攻振英哥 單「西九門」，實行對佢窮追猛打，藉此挫低佢嘅競選勝算，因為泛民多數人對佢所為怕怕，如果二揀一，寧願接受唐唐，都唔想佢贏，擔心佢上台之後有仇必報， 泛民一定冇好日子過，所以班友將全力支持出「尚方寶劍」。

講番選戰形勢，由於建制派好多人已唔受阿爺指揮，泛民又唔會歸邊，唐梁勝負要睇中間遊離票，最後好可能兩人得票都唔過半數，成個牌局要推倒重來，場show延長多幾個月，觀眾仲有連場好戲睇！