黑氣來襲 流選機會增 熊出沒 成致命元素

近排黑霧罩政壇，江湖人物疑介入特首選戰掀起滿城風雨，據政圈老友講，最頭痕嗰個係振英哥，皆因佢最近正搏晒老命四出游說選委，趁唐唐弱勢力搶中間票，但劉夢熊搞出呢單黑色疑雲，可能令形勢逆轉，要攞過六百票難咗好多。
老友指，振英哥計過條數，佢目前揸住三百張鐵票，而未表態嘅選委約三百個，如果有一半投畀佢，都只係四百五十票，佢要贏出必須爭取另外嘅一百五十票 支持，加上小部分唐營及泛民嘅「倒戈票」（假如有嘅話），就有機會夠票當選。所以佢最近親自逐個打電話畀未揸定主意嘅選委，甚至深入敵陣，聯絡唐營中堅支 持者，希望說服對方「跳船」，話提名唔一定要投唐唐票啫，可以投畀我吖！佢嘅手下悍將則四圍放風，話唐營已有人「帶槍投誠」，掉轉槍頭幫CY啦，藉此動搖 唐營軍心，撬得一個得一個。

劉夢熊（右）忽然瞓身做振英哥頭號打手，勇字當頭甘當馬前卒，但今次牽涉「黑色疑雲」，鬧得滿城風雨，對振英哥選情有微妙影響，流選機會大咗。

如果冇嘢發生，振英哥個如意算盤好可能打得響，可惜人算不如天算，「熊出沒」終於累事，神經刀劉夢熊被本刊跟到同江湖大佬來往，呢位大佬又在選舉飯局現身，搞到「黑雲」陣陣，連O記都話跟進，好多中間選委擔心黑氣滲入選戰，都話hold住睇定啲先，對梁營多咗保留。
阿爺方面，因為出現新變數，亦要摸清楚件事有乜底蘊，唔想太早拍板，起碼等到兩會完咗，收齊料睇晒「快勞」，喺呢個星期尾至開會決定意向。由於中間選委同阿爺都要再諗吓，選戰仍然充滿變數，未到最後都唔知開大定開細。

梁營大將羅太急忙止蝕，與劉夢熊劃清界線。

最慘係，事件曝光後，劉夢熊把口仍然唔收，為咗解釋同「上海仔」關係，一時話佢係北京軍方人士介紹，講到佢好似「零零漆」咁有國家秘密任務，一時又 話佢揸住唐唐嘅官商勾結黑材料，所以同佢攞料，令單嘢牽涉埋唐唐同阿爺，愈搞愈複雜詭異，唔知背後有乜不可告人嘅內情，該批選委愈聽愈心慌，可能入埋梁營 數，若然佢哋唔投振英哥，兩邊都唔過半數，咁流選機會勢必大增。
睇嚟振英哥亦知情況不妙，早幾日已高調同劉夢熊劃清界線，話佢唔係競選辦成員，只代表佢自己，希望即刻築起防火牆，避免火勢燒上身。
政圈老友以前曾被劉夢熊請過食阿一鮑魚，對此人略有了解，知道佢鍾意自誇人脈關係，樂意幫人牽線，然後攞番啲好處，所以早前見佢忽然加入梁營，落力 幫振英哥做「馬前卒」，亦唔覺得奇怪，但當時已預言，呢位仁兄作風出位，好可能成為梁營嘅「致命元素」，呢個預測已不幸而言中，振英哥雖然快刀斬纜，可能 已太遲。