名牌經理人文狄 開冰室教女

文狄（原名：簡文滌），前華星唱片高層，現為潮藝娛樂（Snazz）的行政總監，他管理的藝人包括EO2、狄易達、賈 曉晨等，事無大小，均有他出頭代言，在傳媒面前，字字鏗鏘，喜怒皆不形於色。不過，即使他在工作上如何強悍，對着歲半的女兒簡妙霏（Sofia）卻忽變綿 羊，浪子變了深閨好爸爸。

文狄還有一個身份——「華星冰室」的股東之一，他言詞直率，「我個女唔使讀書好叻，讀得書多咁又點？出到嚟搵萬零兩萬蚊，叻冇用o架，叻嘅人好多都變態嘅。倒不如帶多啲佢落冰室，見多啲人，學吓點樣同人相處，點樣尊重人，唔讀書都唔緊要o架，咪落嚟收錢囉！」

「萬般皆下品，唯有讀書高」的觀念不適合套用在四分一巴基斯坦血統的文狄身上，因為他相信，「命裏有時終須有，命裏無時莫強求！」

文狄經常與太太Chrisly，帶着女兒Sofia到華星冰室巡舖，歲半的Sofia更有專用的冰室制服。

隨遇而安

擔任唱片公司高層達十五年之久的文狄（原名：簡文滌），擁有四分一的巴基斯坦血統，為回教徒，他深信，每個人都有自己的命運。
對於個人事業，他從不一步登天，但求平穩過渡。兩年前，他投資「華星冰室」，第三間分店轉瞬已在上月於旺角開幕，他依然堅信，「要慢慢一級級上，錢唔需要搵得多！」在年半前榮升人父後，他更明白到享受人生的哲理，認為多忙都好，仍要有自己的生活，「冇咗自己就會好慘！」

當了人父後的文狄，除了變得深閨顧家外，更親力親為照顧女兒，餵奶、掃風手勢純熟。

對於教育女兒Sofia（簡妙霏），他採用不強逼、不強求的態度，希望女兒在毫無壓力下成長，國際學校因而成為首選，「自由啲、開心啲吖嘛，呢點我 同太太（Chrisly，現職空姐）嘅心態好唔同，點解要讀書咁叻呢？識得尊重人、有禮貌先係最重要，之後嘅嘢喺社會度可以慢慢學吖。我成日帶佢落嚟冰 室，就係想佢見多啲人，學吓點樣同人相處。讀得書多咁又點？叻冇用o架，叻嘅人好多都變態嘅。讀完大學出到嚟都係搵萬零兩萬蚊，所以個女唔讀書都唔緊要o 架，落嚟呢度收錢囉。」
文狄說，他只求女兒將來長大後能「顧掂自己，開心就得喇」，「我哋細個都唔知點解會大o架啦，不如我試吓放手啦，等佢自己去跌吓碰吓。當然我都會心 痛，但我唔想激死自己呀，個女第時係曳嘅話，如果我愈嬲佢，咪盞逼到自己愈忟憎？其實每個人一出世都有佢自己嘅命運，有佢自己條路要行，好多嘢冇得逼、冇 得強求。」

去年八月，華星冰室於筲箕灣開分店時，圈中明星好友齊來撐場，楊千嬅更抱住Sofia愛不釋手。