楊思琦撇 B返港搵水 李泳豪急除洪天明舊鞋 Miki

 



探熱針


去年與空心老倌吳帥珠胎暗結，搞到要匿去美國安胎避風頭的楊思琦，上週終承認當未婚媽媽，誕下六磅九安士的 B女 Krystal。未趕及同女兒老豆補番張婚書，楊思琦已決定跳船，速撇空心吳帥當單親媽咪。背住養女重責，有傳她會將 B女留低美國由阿哥照顧，獨自返港搵奶粉錢。
楊思琦做了未婚媽媽，舊愛李泳豪亦被揭有新歡 Miki，據知她原來是即將結婚的洪天明舊菜。對曾與 Miki拍拖一事，準新郎洪天明唔想受牽連，扮失憶說：「唔記得囉！」

新歡係蒲精

新歡係蒲精
楊思琦日前宣布在L.A為男友吳帥誕下女嬰Krystal後，舊愛李泳豪亦被踢爆有中韓混血新歡Miki Yu，樣貌身材都不輸俾楊思琦的Miki，隨即被起底。現年廿五歲的她，家住沙田屋苑，早年兼職模特兒，現於中環律師行任職文員。外表清純，在李泳豪眼中是乖乖女的Miki，查實是夜場老手，縱使出身小康之家，卻能一身名牌打扮。大學時期已是蒲精，憑住清純面孔及嬌嗲性格，在夜場吸仔力極強，李泳豪也並非她第一個圈中男友。據了解，早於七年前，十八歲的Miki就被口甜舌滑的洪天明氹掂，二人地下情半年。「Miki雖然蒲，但佢唔鍾意化妝，個樣好純，性格又溫柔，真係好多人追。嗰陣洪天明同徐子淇分咗手，喺夜場識咗Miki，兩個拍拖半年，但男嘅花弗，女嘅亦大把選擇，各有各搵食，所以好快玩完。」知情者說。

上週楊思琦在微博自爆已為人母，及放上愛女相，為月底返港復工鋪定路。

愛跟圈中男交往的Miki，除跟李泳豪拍拖，與BoyZ 的Steven亦是好友。上週五（九日），泳豪還是笑到四萬咁口認新戀情，但數日後記者致電求證他是否與Miki火速分手，及對方是洪天明舊愛時，他無心機的說：「唔會回應！」
洪天明扮失憶
洪天明被問及Miki是舊情人一事，大耍太極。「Miki Yu……唔……唔係好記得！佢同李泳豪嘅嘢唔關我事，我唔會回應。」說罷匆匆掛線。去年十二月，本刊影到避居LA的楊思琦佗住七個月肚，痴情的李泳豪終於心死。為免再睹物思人，他將一直存放在家的思琦舊物，交給朋友保管，再轉交月底返港的楊思琦。送走過去，李泳豪更決心搵新對象。終於今年一月，在朋友的K局認識索女Miki，李泳豪鎖定目標展開追求。楊思琦未公開生女消息前，本刊曾發現蜜運中的李泳豪，偕父親李家鼎到西貢睇樓。舊愛嫌自己無錢走人，李泳豪便將原本儲好準備跟楊思琦結婚的老婆本，用作買磚頭首期，主攻三百多萬的三樓連天台村屋。上週還開心承認有新戀情的李泳豪，料不及新戀情會見光死。怕舊史被揭的Miki，驚到將原本在微博名字Sor傻妹妹改為玫瑰Kitty，之後更索性剷走微博及blog的相片，消失網上。「Miki同豪仔講，話怕承受唔到傳媒壓力，所以想同豪仔由戀人做番朋友，而豪仔亦唔想喺感情上再有差池，所以都寧願放棄。」知情者說。
思琦愛女留美
李泳豪煞停新戀情，舊愛楊思琦亦對空心男友吳帥死心，決定做單親媽咪。據可靠消息稱，楊思琦決定將B女留在美國，月底將單拖返港搵奶粉錢，又計劃將手上其中一個放租物業售出，作為養女彈藥。
至於陪住飛美待產的楊母，亦會留低美國，與思琦兄嫂一起照顧Krystal。
「由飛去美國等生到一切生活安排，吳帥都不聞不問，亦冇俾一毫仔，上年十二月，你哋（壹週刊）影到吳帥去美國探佢嗰時思琦已經心灰意冷，決定同吳帥攤牌。吳帥亦好絕情無任何挽救行動，仲玩埋失蹤。思琦媽咪都怪自己睇錯人，個女決定同吳帥斬纜，佢都唔敢俾意見。」楊思琦身邊人說。
劈腿硬食
楊思琦和李泳豪拍拖九年，去年卻殺出程咬金吳帥，楊思琦劈腿兼大肚，兩家人互相指摘，再見不是朋友。 暗溝去年五月，仍是李泳豪女友的思琦，在男友生日會上亮相，並宣布打算結婚，但原來思琦已暗中搭上前跳水隊員吳帥。 分手一個月後，楊思琦單方面宣布與李泳豪早已分手，又否認吳帥是新歡及否認有孕，堅稱是想前度死心才講大話。 現形吳帥被踢爆是空心老倌，兩人於七月一度傳分手；堅稱冇孕的思琦，積極平價接騷搵銀，兩個月後，她突然人間蒸發，秘密飛美匿居兄長家。 大話一直唔認有咗的思琦，去年十二月終被本刊拍到腹大便便在美國待產，大話現形。 產女今年三月，思琦微博宣布誕下女兒，並打算重投工作，做單親媽咪；BB老豆吳帥，繼續冇影。 ####

樣靚身材正的中韓混血妹Miki，唔單只冧到李泳豪，十八歲時更接徐子淇棒，做洪天明女友。

微博調情月初新戀情未爆出前，李泳豪跟Miki常在微博調情。好識冧仔的Miki一句：「等着你呀！」再加個錫錫公仔，將泳豪冧爆，回敬番個抱抱公仔俾女方。

月底跟周家蔚拉埋天窗的洪天明，在婚前被爆與Miki的舊情史。

純情包裝一把劉海髮型，令現年25歲的Miki看來還年輕且一臉清純。加上學整甜品，入得廚房出得廳堂，殺仔高手。


來個眯眼啜嘴表情，加埋攞住個LV手袋，賣開純情的Miki，忽然跟時下模一樣，有啲俗氣。

去年十二月，本刊在美國拍得懷孕七個月的楊思琦，令一直否認與吳帥珠胎暗結，才跟泳豪分手的她大話現形。

從胞兄家離開，拖住行李行到街口會合吳帥的楊思琦，無論男友點樣細心呵護，她仍是黑面對待。原來有指當時楊思琦已準備跟空心吳帥攤牌。

早前本刊發現李泳豪偕父鼎爺及地產經紀，到西貢北巷及濠涌新村睇樓。事後問他是否買樓箍實新女，他否認說：「唔關事！上年計劃結婚時已經諗住買樓。依家見又係入市時機，咪睇吓囉！」

現場所見，李泳豪揀睇的單位，全是三樓連天台，市價約三百多萬的單位。