荷里活女星奧瑪花曼，早年憑《標殺令》為港人熟悉。講緊嘅早年，已經係2003嘅事。至於近年，sorry，真係冇乜搞作。今年最叻，咪就係大肚囉。 須知道大肚並不容易，問下阿媽就知。難得奧瑪相當enjoy。早前佢挺巨肚到St. Barts游水度假，其間又跳水又拉筋，鬼咁唔錫身。 唔好唔記得，奧瑪芳齡已經四十有一，佗仔佗到好似佢咁，不得不俾佢十個「得」。
41歲的奧瑪花曼（Uma Thurman），愈老愈多桃花。佢先後經歷過兩段婚姻。第一段同老戲骨加里奧文（Gary Oldman），不過維持兩年後結束；第二段跟美國演員伊凡鶴基（Ethan Hawke）。1998年，奧瑪挺住7個月巨肚跟伊凡註冊，兩人先育有一女，4年後再育有一子。可惜男方因第三者介入，2003年正式離婚。
那些年追過的男孩
雖然帶住一對仔女，但無阻奧瑪嘅溝仔歷程。離婚翌年，佢跟《標殺令》導演昆頓塔倫天奴 （Quentin Tarentino）傳出緋聞。兩人自1994年《危險人物》開始合作，大導仲人前人後稱讚奧瑪做「靈感女神」，相當寃氣。不過當年奧瑪已經同酒店大亨 Andre Balazs拍緊拖。究竟緋聞孰真孰假，who knows？事實只係證明一樣嘢，就係兩子之母嘅奧瑪，依然有市有價。
幸福大肚婆
奧瑪最新男友：金融家Arpad Busson。其實話新唔算新， 兩人於2007年邂逅，2009年分手。點知緣份就係咁巧妙，兩年後嘅2011年復合，今年更宣布有喜。 就上周五（3月23日），奧瑪帶住一對仔女到旅遊勝地St. Barts度假。現場所見，未婚夫Arpad未有同行。不過奧瑪洋溢住孕婦嘅喜悅，除咗急不及待着上比堅尼晒巨肚之外，之後一日佢更租船出海。只見大肚臨 dum嘅奧瑪又跳水又擘腿拉筋，其動作之敏捷，體格之柔軟，同常人差唔多。邊個話大肚婆一定論論盡盡，睇奧瑪嘅狀態，分分鐘拍多套《標殺令》都仲得。
奧瑪成名作《標殺令》（左圖）叫好叫座，可惜無以為繼。新作《Bel Ami》（右圖）將會同《吸血新世紀》嘅羅拔柏迪臣發生姐弟戀，算係有啲睇頭。
荷里活高齡產婦
有人話女人四十爛茶渣，查實荷里活女明星四十打後先生仔，愈生仲愈容光煥發。 Kelly Preston 48歲 尊特拉華特大仔Jett於2009意外喪生。兩夫婦為彌補傷痛，決意追多個B。結果老婆Kelly於2010成功追仔，母子平安。
荷爾芭莉 41歲 2008年，41歲嘅荷爾跟模特兒男友生下一女。佢自言生女令佢精力充沛，感覺似superwoman咁有力量。
妮歌潔曼 40歲 妮歌40歲先懷有第一胎，不過懷孕始終都係辛苦。第二胎搵代母幫手。如今妮歌已係兩女之母。 ####
奧瑪未有公布懷孕幾多個月， 依size睇，估計5個月左右。講時講，奧瑪肥得幾均勻，41歲人大肚大得幾緊緻。
佗B跳水 可能奧瑪都自覺佗得輕鬆，跳水呢類高危動作竟然大膽照做。上船更毋須攙扶，身手矯健。
幫仔沖身 雖然粗身大細，但奧瑪對仔女仍照顧有加。佢換上便服就幫囝囝Levon沖身，Levon親吻媽媽手背多謝，場面溫馨。
母女情深 湊完囝囝，轉頭湊埋囡囡Maya（中）。奧瑪仲招待囡囡同學仔上船玩，一人侍候三個細路。
忽然拉筋 危險動作一波接一波，換上長裙嘅奧瑪忽然喺船杆擘腳拉筋。孕婦做少少拉筋唔係唔得，不過要喺適當場合。假使一個大浪冚過嚟而佢又馬步不穩，咁就弊啦。
偷雞飲酒 運動完一輪，奧瑪竟然偷飲酒。好彩份量唔多，飲只係過口癮。
奧瑪同前夫伊凡鶴基合拍《變種異煞》而撻着，兩人育有一子一女。伊凡其後於2008年再婚，跟現任妻子育有兩女。
現任男友Arpad Busson曾跟澳洲名模Elle Macpherson拍拖，育有兩子。如今佢搞大奧瑪個肚，但暫時未有計劃結婚，唔知係咪等生完BB 再大搞。
刊於870期《忽然1周》
沒有留言:
張貼留言