《壹週刊》 1151期 菜式渣 安排差 諸葛世紀婚禮搵笨

挾住諸葛後人牌頭，當正自己「藍血人」的諸葛紫岐，為了一圓公主變王妃心願，聲稱豪花800萬，上週二（三月二十日）於灣仔會展筵開138席，打造 世紀婚宴。但事後有份出席俾面派對的賓客卻指婚宴零安排，十時開席，慶功宴貨色餸菜，娛賓節目居然係國產管弦樂團表演，即使臨時拉伕，安排Neway旗下 歌手上台獻唱，都阻截不了賓客中途離場，回禮是一張老公旗下卡拉OK免人頭贈券，朱古力都冇粒！ 薛諸葛紫岐，失禮晒！
閂水喉
睇準老公薛嘉麟掌控卡拉OK王國，諸葛紫岐一早搵定wedding planner，預算豪花八百萬打造世紀婚宴，風風光光做薛太。豈料掌握財權的薛老爺薛濟傑，知道準新抱使錢無分寸，決定閂水喉，令婚宴預算一減再減，加 上幫手策劃婚宴的wedding planner公司規模蚊型，準王妃只好將貨就價，世紀婚宴有架勢冇實際。 「主人家好堅持要用麵包超人做decoration，間wedding planner公司規模又細，無呢方面資源同經驗，但為咗個殼好睇，所以用咗好多budget喺布置方面，其他嘢自然差。」知情人士透露。 難怪王妃婚宴回禮只得張老公公司旗下的卡拉OK免人頭禮券，仲要限時限刻，同真正的豪門婚宴相比，有專屬擺設或者名牌朱古力作回禮，相差甚遠。
魚毛翅
世紀婚禮得個樣，婚宴餸菜更成為賓客眾矢之的。 在環保大前提下，酒席大多數以湯羮取代魚翅，但諸葛紫岐唱反調，堅持魚翅宴客。礙於價錢問題，翅湯只得幾條翅毛唔在講，其餘菜式，水準只能與電視台、電影的慶功宴水準睇齊。 「又話世紀婚禮，冇諗過啲食物咁冇水準，極其量只可以話擺得落口，電影慶功宴分分鐘好食過佢！」有份出席的賓客說。
悶走人
要睇餸食飯，但諸葛紫岐堅持要擺夠一百三十八圍好意頭有體面，無奈新娘人緣一般，老公薛嘉麟唯有發功，廣發喜帖撐場，請晒全港唱片公司，甚至完全唔熟的，一律無放過。 冇啖好食，婚宴的表演節目是中、西樂演奏，高音獻唱，十足祖國春節晚會；即使有人醒目「做嘢」，安排Neway旗下到場飲喜酒的歌手包括鄭融、張智霖、關心妍、hot cha上台撐，亦難解悶局，飲到半場，至少有三分一人提早閃。
急call陪嫁
新郎薛嘉麟有玩具大王蔡志明兒子蔡加讚、前民政事務局常任秘書長李麗娟兒子劉堃作為兄弟成員，有頭有面，相對諸葛紫岐的姊妹陣容，零模界代表，唯一熟悉面孔，是合作過旅遊特輯的亞姐冠軍呂晶晶。
據知，諸葛在大婚前三日，才急call對方幫手。而原定婚宴後在CEO Neway舉行的after party，薛嘉麟旗下唱片公司歌星不單全部唔到，圈中人更加冇影！ ####

弊！俾人發現咗！（設計對白） 我係公主，唔用cheap嘢！（設計對白）

同諸葛一向面左左的陳法拉，孖住「老公」薛世恒俾面出席婚宴，在主家席坐足整晚。

為氹老婆開心，薛嘉麟跟足傳統孭住諸葛上大紅花轎，其頭上的新娘頭飾，在淘寶網百三元就有交易。

平價頭飾

慳皮回禮 諸葛婚宴以老公旗下的卡拉OK公司免人頭費禮券作回禮，慳皮至極。

諸葛人緣紙咁薄，姊妹團中僅呂晶晶（箭嘴）一個圈中人。

A貨布置

諸葛紫歧世紀婚禮最大花費，大部分用於布置場地的麵包超人公仔。

廣邀「星娛樂」旗下的藝人如張智霖、關心妍等出席婚宴，全部被臨時拉伕上台做表演嘉賓。