上月 24日下午五時半，戴住黑超 嘅楊思琦大嫂駕車外出回家，記者透過車內的黑玻璃，看見思琦與思琦媽都在車內，相信是帶完 B女去醫院檢查。駕車中的大嫂，不時四周張望，警覺性甚高。
L.A.直擊 阿媽陪坐月吳帥冇影 楊思琦誕 6.5磅女嬰
去年娛樂圈唔少女藝人輪住大肚，陳慧琳、楊千女華、郭羨妮等都等住生龍 B，但最先跑出 嘅，竟然係遠赴美國 L.A.匿埋待產 嘅未婚大話媽媽楊思琦。
美國時間周一（ 5日）黃昏，楊思琦大嫂親口向本刊記者透露：「思琦十幾日前生 咗喇！ BB好健康，係女仔。」據知思琦於二月中入住當地的私家醫院，為男友吳帥誕下 6磅半女嬰，出院後她待在胞兄家中專心坐月，食媽咪煲的薑醋補身。
記者在她胞兄家採訪兩星期，被指空心老倌的 BB經手人吳帥全程冇影，照顧思琦的責任落在思琦媽及大嫂身上。
產前曾致電樂易玲，話要請多兩個月 no pay leave的楊思琦，已訂定三月尾的機票，帶 B女返香港開工，開始母兼父職的生活。
我生 咗喇！母女平安。（設計對白）
去年 12月楊思琦被雜誌影到佗住巨肚在 L.A.等生仔，當時仲有男友吳帥陪伴在側，依家生完女，男友竟然冇影。
自去年 6月楊思琦單方面宣布與李永豪分手後，思琦即被踢爆與前香港運動員吳帥劈腿半年，當時有傳她珠胎暗結，不過她多次否認，離港赴美安胎前更中港兩邊走，不停登台出騷搵銀，試圖掩飾大肚傳言。
胞兄平房坐月
楊思琦胞兄位於美國洛杉磯郊區的千三呎平房，有前後大花園，環境清靜空氣清新，係安胎同坐月 嘅好地方。
車房落車
大嫂一直望實記者的採訪車，見記者離開，她才把車駛入家中車房。楊思琦與母親在車房內落車可直接返入屋內，避免見光。
笑住報喜
思琦大嫂初時表現抗拒，後來與記者大談家中收養回來的幾隻混種狗，傾多幾句才肯透露思琦於二月中誕下女嬰。
一心去超市掃貨的大嫂，發現記者即時速逃，只買了一小排朱古力。
出入非常小心
可惜紙包唔住火，去年底楊思琦被雜誌影到於美國洛杉磯其胞兄的郊區平房出現，雖然身穿長身羽絨褸，但難掩 7個月巨肚，大話即時被揭破。
屈指一算二月是楊思琦的預產期，本刊於美國洛杉磯時間 2月 24日下午 5時半，看見思琦大嫂駕駛七人車，載住面容憔悴的思琦、思琦媽和 BB返家，相信是剛從醫院檢查完畢。當日思琦大嫂相當警覺，每當發現有陌生車輛駛過，都會細心打量，眼見記者把車駛走，她才極速把車駛入家中車房，看來楊家上下都對思琦十分保護。
28/2思琦媽後花園玩狗
上月 28日早上十時半，思琦媽走出後花園散步兼餵狗。照顧坐月的思琦與初生 B女都幾辛苦，難怪要出花園 唞吓氣。
惡狗看門口
平房的後花園養了三隻混種大狗，陌生人行近少少即吠到飛起，看門口一流。
記者在楊家的垃圾桶內，唔止見到一大樽用來煲薑醋的八珍甜醋，仲有一個初生嬰兒奶粉罐，唔通思琦唔夠人奶餵 BB？
去年 9月吳帥來港，除了食同住都係思琦照起，仲要女友做埋司機接送。依家思琦生完又唔見人，佢係咪好男人？大家有眼睇。《壹週刊》圖片
吳帥繼續冇影
記者在思琦胞兄家門外留守兩星期，發現大嫂只外出過兩次。其中有一次是刻意駕車外出兜圈，試探有沒有可疑車輛在附近；而另一次則於本周一（ 5日）下午三時，前往附近超級市場，估計兩星期未有外出的她會大量入貨，但當她發現記者後即馬上走人。
記者把握時間上前追問有關思琦生 B一事。大嫂最初表現極度抗拒，記者再三追問下，她才肯開腔：「係生 咗喇，十幾日前生 嘅！（ BB易唔易湊？） OK， BB好健康，全家人都好開心。（吳帥有冇返嚟照顧思琦？）……有媽咪（楊母）睇住我 哋好放心。（龍仔定龍女呀？）女嚟嘅。」大嫂說罷即急急腳上車，並叮囑記者不要再跟她。翌日（ 6日）記者再到思琦家拜訪，按門鐘後只聽到不斷的狗吠聲和 BB喊聲， 20分鐘都未有人前來應門。
思琦是在二月中入院，為空殼男友吳帥誕下 6磅半女嬰，思琦密友向本刊透露：「思琦一路都打算自然分娩，佢好緊張呀，一早執定袋做晒準備，預產期係二月中。佢一到二月已經成日同個肚講，叫 BB快 啲出 嚟，俾媽咪見吓！」據知思琦生女過程唔算辛苦，而且思琦媽和大嫂都經驗老到，思琦住院四天便可抱 B一齊返家。
據鄰近街坊透露，思琦胞兄楊思豪已出埠公幹，家中剩下思琦、思琦媽、大嫂和大嫂的三個子女。加上剛出世的 B女，屋內有 4個小朋友實在熱鬧得很，而思琦媽似乎是照顧小朋友的重要人物。上周一連兩日，記者都在早上十時許，看見思琦媽一臉倦容走出後花園休息，和養在花園內的三隻混種狗玩耍。
全家反吳帥
思琦坐月期間，除了思琦媽和大嫂幫手照顧外， BB父親吳帥理應有份參與，不過記者兩星期都無見過吳帥蹤影。去年尾吳帥遠赴洛杉磯搵大肚思琦，雜誌拍到他被楊家拒諸門外。
據知情者說：「思琦有 咗先知吳帥個底，咁樣俾個男人糟蹋，思琦全家都好唔開心，仲勸佢同呢個男人斬纜。思琦好鍾意小朋友，佢去阿哥度住，有三個姪仔姪女同佢玩，都開心 咗好多。屋企人為咗佢好，都冇再講起吳帥。吳帥近呢兩個月冇再蒲頭。」
吳帥被指空心老倌，在港住 劏房又欠屋租，又被踢爆向跳水隊員及家長借錢唔還。據知他曾留在洛杉磯一段時間博思琦家人接受，妄想搬埋入屋一家親，但思琦胞兄斷然拒絕。吳帥早前已潛水返大陸，等思琦三月尾返港時再出招女友。
此情不再
剛爆出與李永豪情變時，微博即出現一張思琦與母親及吳帥的合照，三人樂也融融。事過境遷，思琦媽同吳帥會唔會仲有傾有講呢？
樂小姐雖然未獲思琦親口通知已生女，但她都非常戥佢開心，仲話要即時打長途俾思琦八吓 㖭！《壹週刊》圖片
四月復工
本周三（ 7日），記者致電樂易玲，她表示最近沒有與思琦聯絡。當記者透露思琦已產女時，樂小姐興奮說：「係呀！係咪真 㗎？邊個講 㗎？（佢屋企人講。）上星期佢經理人話搵過佢，不過思琦無覆。我要打電話恭喜吓佢先！（咁佢幾時返？）上次思琦同我請假請到三月底，總之佢冇再同我講要再請假啦！拍劇 嗰 啲等佢返 嚟至安排。不過早排已經有人搵佢出席活動，傾緊囉，都應該要 4月後。」
至於差點成為思琦老爺的鼎爺李家鼎，對於思琦已順利產女，終於不再火爆回應：「我完全唔知喎！都斷晒聯絡啦！但都恭喜佢，仔又好女又好啦，希望佢可以從新開始，過 啲舒舒服服 嘅好日子啦！（思琦生 咗，吳帥冇出現過喎！）唉！佢 哋 啲私人 嘢唔理喇，各有各又好，後生仔 嘅 嘢由得佢 哋啦，依家咪幾好囉！生 咗叫做有個交代，個傻女當初都係受佢阿媽影響 啫！」思琦撇李永豪黐吳帥，被千夫所指，依家女都生埋，希望佢冇選擇錯啦！
Ｂ女父母感情多波折
楊思琦的愛女在二月中出世，是小龍女。據麥玲玲師傅表示，Ｂ女命格屬土，邏輯性較強，做事有條理，創作力強，不過容易胡思亂想。至於父母運方面，麥玲玲說：「Ｂ女 嘅父母緣比較薄，父母關係會較緊張，感情亦會有波折。」
五星級醫院分娩
楊思琦選擇在離家只有五分鐘車程的 METHODIST HOSPITAL(美以美醫院)分娩，醫院位於美國西岸洛杉磯 Arcadia的華人高級住宅區，由護理出身的台灣老闆娘開設，是當地一間五星級私家醫院。
近年醫院的待產及坐月服務愈來愈出名，產婦可享獨立病房，嬰兒房的保母全部都有護理背景，醫院環境優美清靜，設備完善，故吸引不少華人前往產子。醫院內不少指示牌及水牌都中、英對照，而宣傳單張及收費表都有中文版。
據收費表顯示，自然分娩住一晚收 2,300元美金（折算約港幣 18,000元），未計醫生費，收費絕對唔便宜，拍得住香港的養和醫院。
去年 8月思琦單方面宣布與李永豪分手後，雖然唔認有 咗，但已剪短頭髮為生仔做好準備。其母一直陪伴左右，更跟去美國照顧愛女，三月尾便會與思琦一齊返港，繼續湊孫。《蘋果日報》圖片
Methodist Hospital面積大過香港的養和醫院五倍，是當地華人生仔的熱門醫院。
醫院的收費單張列明產婦入院收費，預繳仲有折扣，慳妹思琦都係預繳居多。
據詢問處職員表示，二月中曾有一位 Shirley Yeung的女病人入院，但拒絕透露入院原因。而楊思琦的英文名就是 Shirley。
醫院分門極仔細，婦產科在另一邊，出入都要過保安關，私隱度非常高。
醫院大堂有大量梳化任坐，仲有一座鋼琴，間中有醫護人員演奏，環境優美，暫時未見有雙非孕婦霸 牀位。
李永豪斬情絲
與思琦相愛 9年最終被飛的李永豪，近日已改電話避記者。其孖生大佬李泳漢日前爆細佬已覺悟，唔會再迷戀思琦。睇 嚟李永豪今次真係的起心肝斬情絲。
鼎爺收火祝福
曾經鬧爆思琦的鼎爺，得知思琦已產女竟收火恭喜佢，仲話：「個傻女都係受佢阿媽影響。」《蘋果日報》圖片
施明勸阿仔放低
曾經錫到思琦 燶的施明都同阿仔李永豪講：「最緊要係唔好執迷不悟，依家淨係想介紹女仔俾佢識 啫！」
產前狂食生冷 嘢
孕婦懷孕初期最忌食生冷 嘢，不過臨盆前一個月就可以盡情食，醫生話咁樣可以幫孕婦同 BB清熱毒。但楊思琦就唔多聽話喇！記者發現佢懷孕中期已經不停食生冷 嘢，十月食雪糕、長腳蟹，非常為食。二月初臨生前，佢食 咗一大盤壽司，仲將照片 post上微博。不過思琦入院生 B後就再冇上微博 update近況，睇 嚟佢要照顧 B女好唔得閒。
剪頭髮等生
擦長腳蟹
消滅雪糕
入院前食壽司
汪阿姐留言慰問
思琦最後一次上微博係 2月 16日，當日佢回覆汪阿姐 嘅問候，生女後再冇時間上網喇！
撰文：娛樂組
攝影：攝影組
沒有留言:
張貼留言