名氣生活
小時候我們玩煮飯仔，用的都是膠或瓷造的杯碟、食物，原來鄺美雲都有這種玩家家酒的情意結，今日再玩這些玩意，「道具」都是由珍貴的翡翠所造，一枱迷你玉製點心，動輒半百萬，仲要唔係有錢就買到，鄺美雲笑笑口說：「我用嘅全部係天然玉嘅顏色，冇染色，所以要慢慢儲到啱用嘅玉，再搵師傅雕刻。」問她這些擺設會否割愛？她笑住說：「我間鋪咁多嘢賣，揀第二啲嘢買啦！」
公諸同好
鄺美雲（Cally）位於中環的三千呎珠寶店上週開幕，新店除了有過億的鑽石首飾，當中有兩個大飾櫃擺放了她的私人翡翠、玉石玩意，好似有翡翠月餅、黃玉製的燒賣、鹹水角點心、黑玉瓜子，黃玉鮑魚、元貝等擺件，都是只供觀賞的非賣品。「呢啲擺件都係要慢慢儲番嚟，有啲係喺行家、朋友度見到，叫人讓俾我，而大部分係我搵到啱嘅玉再搵師傅做。」
Cally笑言儲這些小玩意，令她回想起小時候玩的家家酒，「個個細時都有玩過賣點心、飲茶，以前玩嗰啲係用膠造，依家就用玉造，當擺設放喺鋪頭，睇見都開心，好過擺水晶啦！」說罷，Cally細心地將各種迷你點心放在特製的紫檀木枱上拍照，又拿着那隻小小黃玉鹹水角，笑瞇瞇說：「你叫我開價我都唔知點開，我知有行家造咗幾籠點心喺拍賣行賣咗八十萬。」Cally又有個叫「大豐收」的全盒，裡面有翡翠蓮子、合桃、紅棗、腰果、開心果、花生、瓜子等，「由於全部都係天然色，唔係染色，所以要搵啱顏色嘅玉先做到。呢盤『大豐收』我都係啱啱先儲齊，新年嗰陣可以擺出嚟做裝飾。」單是造價，這盤「大豐收」已近百萬，「搵人做得神似最緊要，香港其實好多雕刻師傅嘅手工好好，唔使返大陸做。」遲些Cally還打算用翡翠做一些貢品、壽包放在家中的佛堂。
一見鍾情
Cally決定搬新鋪，皆因她看中這幢干諾道中五十號新大樓有紐約feel，保安亦十分嚴謹。「七月我經過呢度，感覺好似Manhattan 49th Street，我即刻走入去管業處問，可惜呢度只租唔賣。」做了十一年的珠寶生意，Cally一直只做樓上鋪，甚少接街客，「我唔做地鋪有原因，因為唔安全。」Cally還笑說：「我依家隔籬賣飛機，男人去買嘢嗰陣，佢嘅女伴可以嚟睇珠寶。」
貴精不貴多
雖然新店有三千呎，但Cally沒有用盡所有地方去陳設珠寶出售，反而劃了不少地方做客廳招呼客人，千萬豪裝的傢俬、裝飾，甚至為客人奉茶的一杯一碟，都是由Cally親自挑選，「有啲行家鍾意擺晒啲首飾出嚟俾客揀，一隻戒指類似款都有十隻、八隻，叫啲客點揀？做設計師就係要為客人揀適合嘅首飾，要知道有啲客有選擇困難，太多俾佢揀，反而乜都揀唔到，況且我對做mass嘅嘢冇興趣，個個都想獨一無二啦。」
Cally亦有為客人特別訂造首飾，不過就並非人人有這種「優待」，「因為好花時間同精神，如果唔係咁熟，我會叫佢揀現成。」至於街客，Cally會請他們留低電話先預約，「咁樣會安全啲，依家我冇必要take呢個風險吖。」
大豐收 這個「大豐收」果仁盤，鄺美雲花了大半年時間才儲齊，她手上捧着的黑玉瓜子，黃玉果仁幾可亂真，而Cally最喜歡就是黃玉製的芝士餅（小圖上）。
迷你點心桌 童心未泯的Cally一面拍照，一面把玩迷你點心，猛話：「好得意……幾好玩呀！」她手上那粒三十卡、四百八十萬的星光藍寶鑽戒，比桌上的點心還大。
翡翠玉蒸籠內，放了啡黃玉碟盛着的冰玉腸粉，桌面上擺着的是翡翠煎餅（下）和黃玉鹹水角（上） 。
黃玉燒賣不但每粒也可以拿出來，就連籠底也細緻地雕了竹織紋。
翡翠月餅是Cally的收藏之一，「呢個月餅係我多年前叫朋友讓俾我，已經升晒值。」
黃玉腰果的顏色、紋理、大小、與真的腰果無異。
師傅根據黃玉和白玉的不同顏色分布，雕成栩栩如生的蓮子（右）、開心果（中）和花生。
食物拼盤 無論黑玉冬菇、白玉米粒、黃玉元貝和鮑魚等，都雕得極為神似，而擺放這些玉海味的翡翠白玉盤，是Cally高價從行家處收來。
這個過百萬的白玉翡翠碗，碗身有由白和藍鑽鑲成的荷花圖案，「你諗吓隻碗咁大，嚿原玉要幾大先得。」
迷你算盤用32.23卡紅寶石和珍珠做算盤子，仲有約兩卡鑽石圍邊。
店鋪左右兩邊做了兩個大飾櫃，擺放Cally的收藏，又有客廳讓客人慢慢坐着試戴。
由紅、綠寶和鑽石鑲製的迷你十倍放大鏡，是她的私人珍藏。
除了擺件，Cally亦設計了不少鑲鑽的富貴日用品，包括她手上這個鑲了16.21卡紅寶石和5.67卡鑽石的香水瓶。
沒有留言:
張貼留言