《忽然1周》873期 盛女駕到 甩拖廖碧兒整餅等運到

近日熱爆真人騷《盛女愛作戰》引發全城熱話，雖然五個主角同導師遭網友圍剿，但同時亦響起中女搵老公警號。 咪以為淨係得相貌平平中女難搵對象，查實娛圈唔少樣靚身材正嘅盛女尋尋覓覓依然得個吉。正如拜金女廖碧兒自從同筍盤陳豪甩拖，遭富二代林忠豪狠飛後，日日 無所事事整餅過日辰。 不過套用《盛女》金句「機會係留俾有準備嘅人」，家陣廖碧兒勤練一手好廚藝，等時來運到，再釣金龜都未遲！
33歲廖碧兒勤練廚藝
感情冇着落，又成TVB棄將，仲要俾人話同宮阿姨十足姊妹花，廖碧兒認真黑開有條路。雖然暫時冇仔吼，好在廖小姐都識喺屋企自我增值，閒時整餅炒粉包餃子，仲每隔兩、三日就擺上微博自製賢妻良母形象。好彩，製成品賣相唔錯，廖碧兒想搵頭好住家應該仲有機。
44歲陳法蓉靜待白馬王子
圈 中過四張女星，近幾年趕結婚趕生B，唯獨陳法蓉身邊仲未有Mr.Right出現。佢一直靜待白馬王子出現，莫講話搵個膊頭挨吓都冇，就連食餐飯，佢都大嘆 搵唔到飯腳，要自己一個人食。唉！你揀人人揀你，陳小姐呢個時候仲想搵白馬王子，咁咪同盛女Florence一樣，俾人鬧不切實際囉！
46歲梅小惠攞命舊相
梅小惠早前俾人傳同上海仔拍拖，小惠好大反應話冇咁嘅事。佢咁緊張，無非係想話俾人知自己available。之但係咁，佢早幾日失驚無神掟咗幾張陳年娘相上微博，仲慘俾阿佘同曹永廉笑佢似賓賓，唔驚趕客咩！
46歲鄧萃雯返老還童
多年嚟喺感情路上兜轉嘅鄧萃雯，一直對愛情執着，可惜仍未擺脫剩女行列。冇拖拍惟有寄情工作，雯女拍劇之餘，仲識得扮鬼扮馬自娛，童真一番！
30歲胡定欣無聊自拍
胡定欣自從同馬國明分手後，成日俾人話借故想復合，可惜馬明斬釘截鐵話機會唔大。當眾餵食檸檬，唔酸就假，胡定欣等入廠嗰陣，百無聊賴玩自拍。素顏樣唔差，應該大把人追㗎，唔一定要翻撻馬明啫！
32歲周麗淇打波出汗
同鄭嘉穎甩拖，早排又慘被有米紗廠太子Eric飛甩，已屆32歲嘅中女周麗淇，經歷情傷索性閉關做剩女，得閒同朋友打羽毛球，流汗水好過流眼淚！ ####

宅女睡衣look 曾經係性感icon嘅廖碧兒，自從冇拖拍後，就連着睡衣都着宅女摯愛嘅Paul Frank馬騮頭。

自製情人cake 廖碧兒整嘅cup cake，個個餅面都有心心圖案，再加愛人呀情人呀等等字句，唔知係咪講緊自己恨拍拖嘅心聲呢？

騎呢扮蟹 難得廖碧兒唔介意扮蟹博網友笑，誠意搭夠。

即使美食當前，陳法蓉依然無胃口食。咁梗係啦，餐餐一個人食飯咁dry，食龍肉都冇味啦！



健美娘look 梅小惠輯相，其實係84年參加健美小姐時影，難得梅小惠夠膽公開，果然膽識過人。


做義工加分 娘相雖然笑爆嘴，不過梅小惠閒時會做義工幫人，內在美加晒分啦！