Scroll Page | Stop Scrolling

Tweet

Pin it

Widgets

Keyword:美容,生活,购物

企理光猛、通道寬敞冇雜物、地上冇積水零污漬、空氣流通冇腥味，可以推住手推車從容買餸，背後代價是？ 

試食王

玩死樂富

領匯翻新商場逼走小商戶出晒名，最新話題輪到翻新街市再瘋狂加租，舊檔主捱唔住被迫撤走。耗資過億，花了半年裝修，全新的樂富街市，你去到唔會覺得身處街市。首先，近入口有生蠔吧、即握壽司吧、西式食材店，甚至放幾張枱俾你試酒，仲要係少見的格魯吉亞酒，唔講以為去了半山。客人推着車仔 shopping，全場有冷氣、冇腥味，地下唔濕、又冇阻住條路的大籮大筲箕，比超市更高檔。

舊有檔口集中在中央，仍然係賣菜賣生果賣豆腐，不過全部用膠盤一盤盤整齊 display，大家突然間井井有條，老實講，作為客人行得好舒服，但係可以想像檔主有幾多掣肘要守幾多規矩。場內設八達通交易，買幾蚊菜都可以嘟一嘟，唔使擔心要將啲找續返嚟濕𣲷𣲷嘅銀紙放入 BV或 LV，太太們應該幾高興。用八達通消費滿$50仲有抽獎，小便宜益街坊，即刻諗起《每當變幻時》魚佬 Eason在將被清拆的富貴墟街市搞送禮垂死掙扎橋段。之不過，有好幾檔的八達通機故意被遮住，究竟呢啲優化設備對阿婆阿叔檔主有幾方便？

要升呢，當然引入不少高檔商戶，紅酒、生蠔之外，仲有賣芝士、風乾火腿等貴價食材店 Gusto Del Mondo，有幾多樂富公屋街坊讀得出睇得明佢個名？入口處的生蠔店 Oyster Station，直頭係靚裝西餐廳，食物賣相也精緻，連碟海鮮意粉的蜆也要整齊排列。可惜平日晚市七八點也不夠十個客，$39至$59一隻的生蠔在街市的吸引力成疑。員工再落力招呼、食物擺得再靚，定位也非常怪，你總不會帶女伴坐喺街市入口撐枱腳吧？
如果要去超市，行上樓上樂富廣場已經有間 UNY，街坊真係需要多間一田、吉之島？當舊商戶慢慢被淘汰，只剩下集團式連鎖店時，才懷念以往的濕濕街市，太遲了。我想有得揀。

入口是紅酒店及壽司吧，高檔超市格局。 


買滿$50抽獎，送罐頭、豉油等，算着數，不過一個攤位兩個職員，條數點計？我信羊毛出自羊身上。

焗蠔$45/隻煙肉洋葱芝士焗或黑椒香蒜焗，以新鮮生蠔即叫即焗，香口惹味。 

海鮮拼盤$428任選八隻生蠔、甜蝦、翡翠螺、扇貝及赤貝，職員亦主動介紹每款生蠔，不過堂食散叫$39，中環價錢，吸引力一般，難怪食滿一千元有八折，入會下次幫襯七折谷生意。 

番茄海鮮燴墨魚汁意粉$128意粉炒得乾身，幾乎沒汁，微辣但不覺海鮮味。 

設備升呢，八達通、手推車、客戶服務部之外，連手機充電都有。 

 

Oyster Station
地址︰樂富聯合道 198號樂富街市 401-402號鋪
電話︰ 2549 0132

評分

食物：★★★
服務：★★★ 1/2
環境：★★★
抵食：★★ 1/2

試食王

喜歡外出用膳，也喜歡誠實，不相信飲食網站的所謂評分，也怕了所謂食家獲得優待後的意見，情願隱姓埋名，真金白銀，測試飲食雜誌飲食網頁捕捉不到的真實一面。

美容包裝　英式下午茶

英式下午茶$290/位、$530/兩位 

奕居不時跟高檔品牌合作，今次和時尚購物網站 NET-A-PORTER.COM推出兩款下午茶︰ Aurelia Probiotic Skincare英式下午茶（即日至 2月 26日供應）及 Dr. Jackson's Natural Product英式下午茶（ 2月 27日至 3月 26日供應）。前者是天然護膚品牌，下午茶食物取其純正植物配方理念，以薰衣草、玫瑰等入饌，加上有機食材炮製出番茄香草包、玫瑰馬卡龍等。 Dr. Jackson's以藥學原理為主，下午茶也取材自天然配方。

Cafe Gray Deluxe
供應時間︰每日 3:30pm-5:30pm
地址︰金鐘道 88號太古廣場奕居 49樓
電話︰ 3968 1106
注：客人更可獲贈品牌禮品包及美容購物禮券，先到先得。

免費飲紅酒食朱古力

The Chocolate Experience$288/位 

想品嘗朱古力蛋糕的香濃，又想減去甜膩飽滯感，飲紅酒一樣得。富豪東方酒店餅店 Regal Supreme於 2月 15及 22日，聯同朱古力紅酒品牌 ChocolatRouge推出 The Chocolate Experience，$288便可品嘗兩款紅酒及四款蛋糕。想免費參加，可於 2月 13日（ 15/2名額）及 20日（ 22/2名額） 9:00am起，鬥快寄電郵至餅店，頭四名幸運兒可獲兩張入場券！

Regal Supreme
供應時間： 2月 15日及 22日 3pm-4:30pm
地址：九龍城沙浦道 30至 38號香港富豪東方酒店
電話： 2716 1661
注：將姓名電話發送至 mailto:regal.supreme@yahoo.com.hk

撰文、攝影：試食王

QR code this page

 免責聲明. 本網站所載資料只供一般參考之用。我們會竭力提供一個方便、實用而且資料豐富的網站，並確保一般的資料準確無誤。但並不對該等資料的準確性作出任何明示或隱含的保證。