張智霖在《衝上雲霄II》飾演的風流機師Captain
Cool，令他人氣再度急彈，得「Cool魔」帶挈，盛傳他以天價5千萬簽約蕭定一旗下，中港兩地的廣告接唔停手，內地劇集酬勞更由25萬一集，叫價加至
35萬，之不過佢老婆就冇咁好彩，由袁詠儀擔大旗，在亞視與內地同期播出的劇集《龍門鏢局》，自播出以來，遭網民勁插，狠批阿靚加插「黐線」、「頂你個
肺」、「仆街」等廣東俗語，會教壞細路，阿靚要在微博解釋兼耍冧，認真失威，「吸金王」Chilam即勸老婆長休養身，為魔童追番個細妹。
(第819期《東方新地》)
近日靚靚主演的新劇被網民狂插，令心情唔多靚，老公Chilam即抽空陪shopping兼散心！
靚靚自加粗口捱罵
42歲張智霖今年行運行到落腳趾尾，首次做馬主，已經拉了幾次頭馬之外，近來更因劇集掀起全城「Cool魔」熱，成為無綫近來劇集收視之冠，在內地 點擊率更衝破1.5憶，令Chilam在中港兩地人氣急升，身價上漲，盛傳他以5千萬三年，簽約蕭定一旗下，首個合作計劃是拍攝《衝上雲霄》電影版，無綫 高層梁家樹亦透露有意拍電影版，Chilam成為兩邊力爭之主角。Chilam的劇集勁收、人氣極旺，但老婆靚靚就相反，由她擔演、上月30日在內地播出 古裝劇《龍門鏢局》，卻遭網民狂踩低俗、不倫不類，該劇由央視、湖北衛視及亞視等電視台播映，靚靚在劇中飾演鏢局少奶奶「盛秋月」，性格剛烈有義氣，劇中 交代她來自廣東順德，故對白不時夾雜着廣東話，靚靚更加入自度對白，如「頂你個肺」、「仆街」、「X家剷」、「痴線」等廣東俗語，被網民狠批對白粗鄙，有 教壞細路之嫌，靚靚慘被網民群插，連日來在微博安撫兼認衰，Chilam又幫拖話日日追看該劇，可惜仍然未能撲熄網民的怒火。
轉軚試做人工受孕
近日Chilam忙於為《衝II》宣傳，但也抽空陪靚靚行街散心，日前， Chilam和靚靚到銅鑼灣拍拖，期間靚靚一直表現得悶悶不樂，Chilam識做地拖實老婆又氹又呵，後來又陪老婆到利園名店，但並無收穫，之後二人入了 老友沈嘉偉旗下的I.T揀衫入貨，靚靚才稍為笑開顏，之後便返回寓所，近日靚靚為了安排魔童入讀小學，暫停接工作，據知Chilam游說同齡的靚靚以後全 職湊仔，以及瞓身追女，知情人士爆料：「靚靚生咗魔童之後無拍劇，呢套係佢復出之作，所以好大期望，點知出嚟反應差，佢梗係唔開心啦，Chilam除咗買 嘢氹佢，仲勸佢不如唔好撈，全力追個女，其實靚靚一直好想生多個陪吓囝囝，但反對用人工方法，依家年紀唔細，佢開始改變咗諗法，亦想試人工受孕，最近周圍 問人意見㖭。」
Chilam成吸金王
Chilam與澤東九月約滿，屆時才可公布加盟新公司一事，Chilam不但以天價5千萬轉會，加上「Cool魔」效應，令廣告收入亦大增，近日和 劇集一起熱播的美心、Fancl廣告之外，近來亦接了不少內地廣告和商演騷，不少內地劇爭相指定要他做男主角，據知每集酬金已由25萬人仔加升至35萬， 另外年底，他將會接拍葉念琛的愛情片，片酬由2百萬加至3百萬，除了正財大有進賬，連橫財運亦佳，他跟好友郭富城共同擁有的愛駒出征四次，已有三次拉頭馬 的紀錄，老公名利雙收，靚靚坦認唔使撈，佢話：「我唔使做喇！我老公都話等佢衝喎，我鍾意做唔做都得，我以後只會揀嘢做，遠同辛苦都唔接！」睇嚟，魔童好 快有個細妹！
QR code this page
免責聲明. 本網站所載資料只供一般參考之用。我們會竭力提供一個方便、實用而且資料豐富的網站，並確保一般的資料準確無誤。但並不對該等資料的準確性作出任何明示或隱含的保證。
沒有留言:
張貼留言