兩個轆專區
百萬富貴單車隊 E-Team
2013年02月27日 ~~ 第1101期 交易通．搵車快線
家陣香港幾乎全民單車，咩階層、咩身份、咩收入嘅都有大量單車迷！不過大家踩街踩單車徑，見來見去都係踩幾百至幾千蚊車嘅普通人，咁究竟有錢人係點玩車法嘅呢？今期就請嚟可能係全港最富貴嘅單車隊 E-Team，求其 8個隊員出嚟晒車，都已經值成百萬！
有錢人玩超跑、玩遊艇下下一千幾百萬都面不改容，玩起單車嚟，貴極都係十零廿萬，真係猶如垃圾！不過部車幾威都好，一條友踩車點都唔及成隊勁車出巡咁有氣勢！所以 2010年就有人喺網上 gather勁車同志，至今已經多達三十幾人，隊中最平嗰部 鈦架 Lynskey Helix都要$75,000，一齊出車就好似 supercar morning dirve咁嚇鬼！隊員來頭更加唔小嘢，有啲百萬年薪、有啲係專業人士，仲有啲係企業老闆，真係唔講得笑！
有錢人玩超跑、玩遊艇下下一千幾百萬都面不改容，玩起單車嚟，貴極都係十零廿萬，真係猶如垃圾！不過部車幾威都好，一條友踩車點都唔及成隊勁車出巡咁有氣勢！所以 2010年就有人喺網上 gather勁車同志，至今已經多達三十幾人，隊中最平嗰部 鈦架 Lynskey Helix都要$75,000，一齊出車就好似 supercar morning dirve咁嚇鬼！隊員來頭更加唔小嘢，有啲百萬年薪、有啲係專業人士，仲有啲係企業老闆，真係唔講得笑！
玩齊頂級車
銀行副總裁 X BMC Time Machine TMR01
Albert Poon現職中國建設銀行副總裁，玩咗單車十幾年，不過正式主攻 RB項目，都係近呢幾年嘅事。佢𠵱家踩緊呢部 Time Machine TMR01係 2013年 BMC最頂級嘅 RB車架， Cadel Evans都係用佢跑贏環法單車賽嘅個人總冠軍，車價達$117,000！「喺 BMC Time Machine TMR01之前，都玩過其他牌子嘅單車，好似 Colnago、 Specialized等，直到𠵱家 BMC，用嘅都係最頂級嘅車款。我都知自己唔係話踩得好專，所以另一方面都好想藉着科技革新去感受一下玩單車嘅樂趣，撇除虛榮，都希望上到另一個層次。我都知近 3年已經放咗成 35萬落單車呢個運動，不過到底都係一樣正經健康嘅運動，所以屋企人都冇特別反對。同埋做銀行工作，周不時都會面對唔同嘅壓力，單車可以話係我減壓嘅工具，所以其實都係值得。」
Albert
Albert呢對 SiDi lock踏鞋係 2013年新款，現價都要差唔多$3,200。
尾轆 brake設於車底部分，同樣係為破風而設嘅嶄新設計。
4個月就換車
化工原料世家 X Trek Madone 7.9
阿文都係 E-Team車隊嘅核心成員，從事家族生意嘅化工原料銷售工作。佢同 Albert喺香港討論區嘅單車區度互相認識，之後仲約出嚟踩車。雖然佢踩 RB嘅經驗同 Albert相若，但換車速度可謂全隊最快最密，平均 4-5個月換一部，近 3年已經買過超過 10部單車！佢仲直言，有次行過單車鋪諗都冇諗就買咗部十幾萬嘅 Trek Madone 7.9，呢啲咪玩家囉！「其實全隊嚟講我換車係換得最快，差唔多所有頂級牌子最頂級嗰啲 RB都玩過，好似中咗毒咁，原因係想感受晒唔同牌子 RB嘅路感。嚟到呢部 Trek 7.9，可以講係我最滿意嘅車。最好笑係我買完部車先開始同部車做 research，先知佢係咁勁！不過以同一段路嚟講， Trek嘅加速力的確係最強，最高速可以去到 70幾 km。」
阿文
Madone 7.9係 Trek最頂級嘅碳纖車款，車身柱管成淚滴形設計。
Corima MCC採用 12軨支設計，明顯係一款偷輕專用軨。
呢對 Polar腳踏可透過軸心探測腳力輸出，街價$22,000。
新丁大贊助
老字號事頭 X Pinarello Dogma 65.1 Think 2
喺 E-Team車隊之中，除咗有大量打工皇帝，亦有唔少老闆級數人馬。就好似 Jerry咁，唔講真係唔知佢原來係東方紅官字參嘅話事人！雖然拍攝時 Jerry身在韓國傾緊參茸生意，但亦借出新買嘅戰駒出嚟拍攝，就係 2013 Pinarello Dogma 65.1 Think 2。雖然 Jerry可以話係 E-Team中踩單車年資最淺嘅一名，但 Albert就話佢為車隊提供咗好大助力，除咗係車隊贊助之一， E-Team平時响上環開會嘅集散地，都係由佢借出嚟。「 Jerry工作繁忙，開頭都唔算係熱血分子。佢入隊可以話係我感染佢啦，二來 Jerry都想有一啲正式訓練，去學習踩 RB。起初幾個月喺接受訓練時， Jerry係完全跟唔上，但佢嗰種唔會放棄嘅精神令自己不斷進步，到𠵱家已經可以完成晒整項訓練，同 E-Team嘅口號一樣，要不斷超越自己。」
Jerry
前叉同尾擔沿用 Pinarello標誌性嘅蛇形設計，可吸收路面震動。
車架後擔以鴛鴦色焗漆，代表車架左右重量不一，係 Pinarello嘅嶄新設計。
車隊講 team spirit
其實 2010年 E-Team成立開頭都係一班車友出嚟兜吓風吹吓水咁，後來 Albert同阿文發起搞大， E-Team𠵱家除咗勁到有個會址可以畀會員聚腳，仲會定時操車同參加 RB、 MTB等比賽。就喺採訪當日， Albert佢哋圍內先喺元朗玩完工業邨繞圈賽。「 E-Team除咗 RB之外，其實都有 MTB team，兩者都會逢星期三同星期日集合出嚟練習。𠵱家加埋前港隊成員梁文軒入隊，練習過程都比之前有規模，通常會由科學園出發入鹿頸，或者有時踩吓東涌。同埋我哋會定時參加比賽觀察吓人哋嘅長處，雖然成績唔算太好，喺 2012全港公路單車賽第 2名、 2012飛鵝山計時賽第 2名，不過比賽對 E-Team成長， build up車隊 team spirit都好有幫助，最終目標當然係想隊車每次出征都有獎拎啦！」
既然隊中個個都咁有米，如果有窮單車友埋身又會唔會唔啱 channel唔受佢哋玩呢？「收會員我哋多數都係車友一個介紹一個，當然我哋唔係一啲睇靚車先可以入隊嘅車隊，其實只要對單車有熱誠，想搵個伴一齊操吓車，交流心得，隨時都歡迎。」
每星期定時都會 call齊隊員勤於練習。
E-Team成員正商討 5月份為香港導盲犬協會籌款嘅關西之旅。
定期練習唔係白費，換嚟嘅係一堆獎盃獎牌。
不扣成本 自發籌款
唔好睇佢哋個個都係上流人士，就覺得淨係識得使錢買車豪玩，查實 E-Team不知幾有心，幾忙都好，都堅持每年參加單車百萬行籌款。今年仲突破地自己計劃單車籌款，佢哋開會就係傾緊 5月份去日本關西，幫「香港導盲犬協會」進行籌款活動，目標係籌得 5-6位數字款項。
「車隊成立初期我哋已經不斷參加博愛單車百萬行、新世界單車慈善錦標賽等，希望幫到社區。不過有啲款項都係要扣除必要開資，實質幫到人可能得好少。所以今年我哋 E-Team就自發性舉辦香港導盲犬協會單車籌款計劃，所有旅費都需要自資，而所得嘅善款我哋會全數撥畀香港導盲犬協會。可以踩單車、亦可以幫到人，仲當去埋旅行，其實一舉三得。」
查詢： mailto:eteam.cycling@gmail.com
上年為東華三院籌款嘅單車錦標賽。
部分香港導盲犬都係由關西總部訓練， 5月個 tour仲會參觀埋狗隻訓練過程。
香港導盲犬協會頒贈獎狀。
車隊多元化
單車 hit咗幾年，其實坊間嘅單車隊已多不勝數。除咗 E-Team之外，香港都有唔少頗有規模嘅單車會。
買嘢有折 廈溪單車會
由元朗廈村居民組成，車會宗旨係致力推行單車運動，提高大眾對單車運動之認識，會定期搞啲大小休閒單車活動，一樣會推薦技術好嘅隊友參加比賽。入會後更會有一張會員證，可享有一些單車用品店鋪折扣。
車會網址： http://www.doerflercycling.com
比賽目標 縱橫單車會
由 MTB前港隊鄭澤誠策劃，縱橫單車會致力推廣香港山地單車、公路單車活動，係一個積極參與國內外，同香港單車比賽嘅單車會。而且佢哋仲會定時邀請教練到場，為嘅係提高隊員質素。
車會專頁： http://www.facebook.com/axiscycling
沒有留言:
張貼留言