陪上 playgroup
淡出幕前的歐倩怡事事跟到足，連阿仔上英文班，她都小心跟到實。
娛聞樂
為仔入名校狂谷雞精班 郭晉安夫婦拗出火
2013年01月25日 ~~ 第913期 忽然１周
為人父母當然望子成龍， 48歲郭晉安亦唔例外，對 4歲半讀 K-2的兒子郭令山非常着緊。為催谷愛兒入讀名牌小學，安仔夫婦「怪獸父母」上身，安排兒子學英文、溜冰、畫畫、溝通及拼音等，單單報興趣班，每月花費近一萬。
據知安仔已鎖定港九十間心水直資及私校，如培正、聖保羅男女、英皇書院等男女校，但歐倩怡則屬意全男校如男拔、英華、聖保羅書院等，近日兩公婆亦因意見分歧而嗌過交。為此安仔亦直認：「我哋係有鬧過意見。」睇嚟總要有一方讓步至收到科。
郭晉安與細 15載的老婆歐倩怡先後誕下快將 5歲的兒子令山，及歲半細女以雅。雖然家有菲傭，但郭氏夫婦凡事親力親為，歐倩怡更寧願做全職媽媽，安仔則肩負搵奶粉錢重任。惟小朋友漸漸長大，兩公婆開始煩讀書問題。
每星期 5堂 playgroup
曾堅決反對兒子入名校的安仔，前年把愛兒送入較平民化的九龍城靈糧堂幼稚園。但兩年過去，安仔夫婦的想法卻一百八十度轉變。據知他們對還有兩年便升小一的令山十分着緊，安仔更鎖定了十間遍布港九的直資及私校，打算為兒子報考。包括聖保羅男女中學附屬小學、何文田培正小學、英皇書院同學會小學、九龍塘宣道小學等男女校。但歐倩怡則屬意傳統名牌男校如英華小學、聖類斯小學、男拔萃、聖保羅書院等。歐倩怡曾說：「大仔較內向，男校有較多訓練意志同體力嘅課外活動，對佢好有幫助。我俾自己好大壓力，做學生簡歷表已經緊張到咩咁，幾乎所有入學講座都聽晒。」
安仔夫婦為催谷兒子讀名校，半年前開始安排令山上「雞精班」 playgroup，每星期都會上貴族英文班，又讓兒子學溜冰、畫畫、溝通及拼音等，遲些還會參加小提琴班，希望訓練兒子成文武雙全的資優兒。據安仔身邊人透露：「令山自小性格內向，唔多出聲， Cindy（歐倩怡）專程同佢報啲溝通同畫畫班，訓練吓佢嘅表達能力同專注力，安仔就話個仔有運動天份，所以俾佢學溜冰。」
老公心水聖保羅男女
位於黃竹坑的聖保羅男女中學附屬小學，在區內較貴及出名，很多富豪家庭爭崩頭。
老婆心水男拔萃
男拔萃書院附屬小學是傳統名牌男校，校風良好，學生們不時在學界奪獎。
面燶燶湊仔
不過本刊收到消息，平日恩愛的安仔夫婦近日出現意見分歧，為了選校，在家不止一次閂埋房門拗出真火。
知情人士透露：「淨係一個揀男女校，一個揀男校，已經拗咗好多日。安仔以前喺長洲唔係讀名校，知道條路難行啲。佢鍾情男女校，幫個女諗埋，個女第日都有分數，齋男校對個女冇着數。」
昔日讀何文田培正男女校的歐倩怡，明明知道如果子女能入讀培正小學，便能直升中學一條龍，但她覺得男女校難訓練出男仔學術上的潛質，亦怕兒子升中後會因拍拖而分心。
本月 2日（周三）本刊拍到安仔與老婆一齊到九龍城接令山放學，然後到何文田窩打老道著名 playgroup學英文，一上便兩小時。至 9日，歐倩怡又獨自到學校湊仔，其間眉頭緊鎖，似乎心事重重。接過兒子後她即回復笑容，與兒子有講有笑，並陪着令山上英文班。
2 Jan放假湊仔
本月 2日安仔夫婦一齊湊令山放學，甫踏出學校，遠處便發現爸爸的令山，顯得特別開心。
幼稚園放學已達四點，安仔隨即做司機車老婆同阿仔到何文田再上英文班。
有心事
與老婆因選校問題煩爆的安仔，趁老婆同阿仔上 playgroup，到附近買咖啡提神，一臉倦容。
表面 happy
在兒子面前扮開心的安仔夫婦，上完 playgroup友善跟阿仔的同學 say goodbye才驅車返家。
9 Jan攰到七彩
本月 9日，着同一套衫的歐倩怡獨自湊仔放學後再上英文班，只見小令山疲累得擘大口放蚊。
安仔：有拗撬好正常！
日前安仔返電視城拍新劇《法網囂雄》時，直認與老婆為兒子學業一事曾有爭拗：「我哋係有鬧過意見，兩夫妻總會有想法唔一樣嘅時候，盡量去磨合。（依家磨合到未？傾掂揀邊間學校未？）我突然發覺，唔係我想邊間就邊間。佢喺面試嗰刻唔鍾意，都冇符㗎！講到尾都係阿仔主導件事。幼稚園面試嗰日，佢好開心，仲錫咗老師一啖。我哋會照報十間，得唔得就控制唔到，如果到第九間都唔收，咁都要等攪珠㗎啦！」
現居西貢匡湖居的安仔，深知西貢校網一般，為了兒子入名校，他坦言已作好搬屋打算，「好多藝人都為咗仔女，由九龍搬去香港，我都唔例外，因為香港區嘅學校選擇真係多好多。」為了兒子的前途，安仔絕對仆心仆命。
前年 6月 7.7磅的細女郭以雅出世，與哥哥令山湊成一個好字，安仔夫婦均表示可以收工。
大家想法總有唔同！（真實對白）
明星家長各有各谷
藝人為谷仔女入名校，個個都出盡九牛二虎之力，過五關斬六將，不自覺變成「怪獸父母」，俾子女無形壓力。
吳君如
君如愛女陳是知已六歲，去年成功考入傳統名校瑪利曼小學。緊張媽媽君如在愛女歲半時便開始催谷，返每月學費一萬的貴族英文 playgroup，又學畫畫、彈琴、普通話、手掌畫，在家只可看有質素的電視節目，如澳洲頻道歌舞節目《 Hi-5》。
徐濠縈
表面貪玩愛蒲的徐濠縈，催谷愛女亦絕不手軟。今年 9歲的康堤， 8個月大便開始上 playgroup， 3歲開始學盡瑜伽、游水、溜冰、鋼琴、芭蕾舞，單是課外活動每月已花逾萬元。在女拔讀小三的康堤更是校內田徑高手，不時在運動會上獲獎，能文能武。
彭羚
退出幕前的彭羚近年專心相夫教女，自小便訓練今年分別 12歲的林泳及 8歲的林清文武雙全。二人先後入讀學費全城最貴的北角寶山幼稚園接受優質教育。就讀幼稚園時已懂流利中、英語及普通話，再讓兩女去學結他、芭蕾舞、游水等，順利考入拔萃女小學。
關詠荷
出名緊張 7歲女兒 Brittany的關詠荷，安排女兒入讀學費達每年 14萬的德瑞國際學校，保證由幼稚園升上中學一條龍。另外女兒又學英語、德文、公文數、體操、溜冰等，更誇張到請了七名大學碩士任補習老師，一星期七天進行軍訓式補習。
採訪、撰文：娛樂組
攝影：攝影組
攝影：攝影組
沒有留言:
張貼留言