登機證
大 峇里
2013年01月24日 ~~ 第1194期 香港《壹周刊》
我們都愛大。講豪講靚講好，都是觀點與角度，只有最大，才有客觀事實。在峇里，新 resort陸續開， Sheraton Bali Kuta有全城最大的商場，二百幾個國際名牌，滿足購物慾望；最大泳池位於 The Stones內，三千平方米，遊一圈都未必夠氣；如皇宮般宏偉的 The Mulia Bali更誇張，佔地三十公頃，即一個半維園咁大，總共七百多間房及 villa。大，不論放在任何事物上，都是優勢。
市中心都有海景
開發多年的遊客區 Kuta，是平價住宿及手信市集的集中地，爛笪笪又殘舊。今年卻來個大翻新，多間高級酒店，包括 Sheraton及後頁的 The Stones，聯手為這區打造全新形象。位於 Kuta Beach旁的 Sheraton，進佔區內中心位置，離機場及大街都近，唔使塞車塞到發𤷪𤺧。酒店連接旗下商場 Beachwalk，全峇里最大，約有二百間店鋪。商場只開業了半年左右，唔少鋪頭仍未開幕，但已有不少型格餐廳、本地設計師時裝店 SATU、國際品牌 Topshop等，甚至首間數碼戲院，即使你未必會幫襯。
酒店坐擁無敵印度洋海景，意大利餐廳 Bene、大堂酒吧及全部套房都對正沙灘，見住唔少滑浪人表演身手，真正海灘酒店 feel。 Infinity pool都向海，但頗細，好難想像人多時可以點游，勝在可以邊游邊欣賞日落晚霞。一般 Deluxe房間足五百多呎，全部設露台，算寬敞。唔係所有房都有靚海景，部分面向商場及庭園，景觀較輸蝕，入住當晚，甚至聽到商場 live band演唱，私隱度不夠高。唔怕啦，住得呢頭，大部分時間都衝落沙灘玩。酒店房間設計偏向簡約，不奢華造作，用上大量柔和的暖色系如淺木色及啡色，舒服自然，更貼心地有免費單車借俾客人踩出街。坐擁向海靚景，又夠方便，係要接受不及獨立別墅咁豪華了。
不規則形的 Infinity pool位於 Bene旁，得 26平方米，只夠游兩步，勝在有海景睇。
部分房間對住內園景，至少比商場景清靜。
Ocean Front Suite最靚 view， L形大露台對正 Kuta Beach，雖然相隔一條馬路但無損景觀。
Beachwalk商場採用開放式設計，非常通風，有大量植物及水池，感覺比密室般的商場開揚得多。
Shine spa只有四間單人房，用西班牙品牌護理品，招牌 Shine一小時按摩$316。
番茄意大利飯$38（ Bene）
意大利飯釀入番茄內焗，飯粒都充滿酸香，伴碟的芝士蓉亦相當香滑。
酒店旁的 Kuta Beach是滑浪勝地，有不少攤檔租板，價錢約$79一天，可以安排導師。
入口前的荷花池裝飾，是傳統峇里象徵，簡約清雅。
意大利餐廳 Bene像間三層玻璃屋，設有小量室外座位及天台酒吧，享受陽光。
酒店有一架綿羊仔，可容納三人，租$47/小時。
大堂酒廊仿照傳統木屋設計，天花吊起多架仿峇里漁船的船頭。
酒店旁已經有小街售賣衣服，想出市中心都只是步行十五至二十分鐘。
Sheraton Bali Kuta
地址： Jalan Pantai Kuta, Kuta, Bali 80361
電話：（ 62） 361-8465555
房價：開業優惠$1,744包早餐、單程機場接送及每日$194消費額
網址： http://www.sheraton.com/balikuta
三萬呎游不停
有些人偏向揀大路的酒店品牌，我就認為型格較緊要。 The Stones是全亞洲首間 Autograph Collection，由 Marriott集團管理，高級得來有獨特個性，唔算怪雞，但隱約富設計味。用上不少石頭作素材，大堂牆身是一層層的石牆、地上是罕見的藍色雲石，枱腳都是石頭，好 raw。
沒有定位成海旁酒店，反而着眼打造最大泳池，足足三千平方米，位於酒店正中央，所以大部分房間只有泳池景。睇落淺水，其實都深一米二，身在池內似在海中央，游極都未到池邊，好爽！玩到攰，可以游到 pool bar飲杯酒，或者去攤攤吊床，餐廳都在池畔。晚上五時後泳池邊就是舞台，有色士風表演、傳統舞蹈或結他演唱，人人站在露台欣賞。
這裡三間餐廳各具特色， Stones Kitchen主打大路西菜及小食，戶外的 Big Fish Bar& Grill是海鮮燒烤吧，午餐較 casual，晚上則走 fine dining路線。 The Long Rice Table則是傳統印尼菜，二人套餐將菜式變成細細碟，共十道菜，可以試勻所有地道菜式。酒店預咗你足不出戶，露台設有浴缸，可以浸個戶外泡泡浴，拉埋簾就除晒衫都得。位於地下的房間，浴缸更變成小型按摩池，可以鴛鴦嬉水。另有 spa及活動室，可以免費借用 iPod及 iPad一個鐘，房內的 iPod Dock是名牌 BOSE， Wi-Fi免費任用，唔怕與世隔絕。
每間房露台都有浴缸，地下那層更是按摩浴池，勝在有私隱。
大堂用上多種石頭設計，地上的藍色雲石相當罕有。
酒店大樓垂直綠化視覺效果，空間感大，令人放鬆心情。
Big Fish餐廳在午市的擺位較 casual，以室外位為主。
每晚約五時至七時都有人在泳池旁表演，很有氣氛。
共有 330間房，設計簡約，露台夠大。
Rice Table二人套餐$459/兩位
共有 12道傳統菜式，如加多加多、烤魚等，風味地道。
烤黑鱈魚$190（ Big Fish）
主廚曾於香港、新加坡等 Marriott酒店工作，擅長炮製海鮮，魚肉烤得鮮嫩 juicy。
The Stones Hotel, Legian Bali
地址： Jalan Raya Pantai Kuta, Banjar Legian Kelod, Legian Bali
電話：（ 62） 361-3005888
房價：$1,395起包早餐
網址： http://www.stoneshotelbali.com
海旁巨無霸宮殿
The Mulia是印尼土炮 resort品牌，位於度假區 Nusadua，鄰居都是五星級大型 resort如 St. Regis、 Grand Hyatt等， The Mulia不甘示弱，起碼要做最大。一進入如玻璃屋般的大堂，居高臨下可以眺望整個 resort，好有氣勢！中央庭園內主要是泳池、沙灘椅等，設計到成豪華皇宮般，整體感覺似澳門銀河，到處流露貴族奢華感覺，但嫌俗氣咗少少。
全酒店分成 Mulia Resort、 The Mulia及 Villa三個部分，兩棟 Mulia Resort內共有五百多個最基本的房間及套房，不算特色。尚在趕工的 The Mulia是套房大樓，設獨立泳池，房間全部向海，每間房內有按摩浴池，是度蜜月首選。 Villa則是位於山頭的獨立屋，共 108間一房、兩房甚至六房小屋，全部有私家泳池，設有獨立入口及大堂，擺明為名人富豪度身訂造。地方大，酒店設施相當齊全，泳池都有四個，另有公眾沙灘，但人流不多，游到悶可以轉轉環境。怕你食厭，共有地中海、日本及自助餐廳、四間酒吧及一間餅店，臨海的地中海餐廳 Soliel最值得推介。配合來結婚的客人，設兩間教堂及一間傳統峇里寺廟給新人行禮，又有大型宴會廳，結婚揀呢度，排場贏晒。
位於海邊的 Soliel地中海餐廳走 fine dining路線，分成兩邊用餐區，兩邊均設天台吧。
面向酒店的 Geger Beach沙粒幼細，風平浪靜很適合游泳。
酒店地方大，有不少酒吧讓客人食嘢飲嘢，如位於湖畔的 The Bar，主打 high tea set，每位$131。
酒店有這個雕花教堂面海，另有一個較大型玻璃教堂在湖畔，新人可以自行選擇。
Villa主要佔據山頭位置，不近海，勝在有私家泳池。
The Cafe是自助餐廳，有多國菜式，大部分食物都是即叫即煮，夠新鮮。
Mulia Resort內的房間有露台，對着庭園景，房間四正舒適，係娘啲。
The Mulia, Mulia Resort& Villas
地址： Jalan Raya Nusa Dua Selatan, Kawasan Sawangan, Nusa Dua 80363, Bali
電話：（ 62） 361-3027777
房價：$2,946起
網址： http://www.themulia.com
有用資料
簽證：持特區護照毋須簽證，持 BNO可於機場辦理落地簽證，費用 US$25。
機票︰嘉魯達印尼航空每天有直航往峇里 Denpasar機場，機程約 4.5小時，票價$3,900起。離境時要預留 Rp150,000現金付機場稅。
（電話： 2840 0000/網址： http://www.garuda-indonesia.com）
貨幣︰$1港元約兌印尼盾 Rupiah（ Rp） 1,268。
天氣︰ 1月至 4月都是雨季，每天只有局部陽光，不時下雨，平均氣溫約 25度。
撰文：張頌婷
攝影：胡春輝
Model： Cupid Pang
攝影：胡春輝
Model： Cupid Pang
沒有留言:
張貼留言