又到賞花季節，以往身邊朋友個個搶住飛去日本睇櫻花，不過最近港人最愛的日本突然出現暴風雨，超過百幾人傷亡，加上輻射陰影籠罩，甚至有科學家言之 鑿鑿話日本將會有九級地震，嚇到人人卻步。想睇花，其實唔一定搵命博，多得Google街景服務最近推出「櫻花季導覽」功能，安坐家中都可欣賞日本26個 櫻花盛放靚景，唔只以360度全景拍攝迷人櫻花，仲可以好似平時玩街景服務咁，行前行後多角度賞櫻，睇完咪當飛咗轉囉！
Google做導遊教你賞櫻
香 港最近搞花展，網友影到有龍友定同胞向靚花噴水，好恐怖！喺網上睇花就肯定唔會嚇親。一打開個「Google街景旅遊導覽——日本櫻花季」專頁，大大幅櫻 花相自動360度轉轉轉，click開埋個「全熒幕」功能，十足去咗個高塔觀景台睇花咁。唔只有花睇，呢個專頁仲有賞櫻熱點介紹：京都醍醐寺，原來係戰國 名將豐臣秀吉於此舉辦過賞櫻活動而聞名、平野神社原來係日本各地櫻樹品種的來源地‥‥‥學王祖藍話齋：「今次真係學到好多嘢呀！」
穿崩笑位
實時賞櫻
Google 之所以快過日本今年開花進度，四月就有呢個新服務，全因呢個櫻花專頁籌備咗成年 (全年成果免費任玩，多謝晒！)，所以實景圖未必update。想知即時賞櫻熱點開花情況，開咗花未、開成點，可以上下面呢個由日本熱心人日日幫手 update即日開花進度嘅Yahoo賞花網，趕尾班車睇花必check！（網址：http://sakura.yahoo.co.jp）
奴COMMENT
科技好偉大呀！喺家中也可以欣賞日本的櫻花，Google真好！還可zoom近櫻花，很感動。當然親眼觀賞更好啦，但你想放假就放咩？睇完當輕鬆一下吧！如果可以有埋夜景、錄埋人聲同環境雜聲就更逼真，冇就自己開iTune加配樂啦！ ####
1. 打開專頁，大大張櫻花360度全景相自動播放，轉動相片左上角的座標就可以切換視角，而右上角的正方形icon，就可以變成全熒幕睇櫻花。Click一下相片右邊的地名，即可跳去其他地方睇花，勁過多啦A夢道隨意門。
2. 睇花當然唔只360度轉的玩法，click相片下面條黃色線就可以好似平時用Google街景服務咁，一步步喺公園行來行去，一路行仲可以睇埋寺入面的佛像同神舍建築，好開心。
3. 睇完virtual tour，想出年去個真實tour？相片下面除咗有地方介紹，click一下地名，就有詳細地址同Google Map你睇，資料齊過旅遊書。
4. 部分地方可能街景車駛唔到入去，只得Panorama班龍友放上網的櫻花靚相頂檔，連東京賞花熱點上野公園都係咁，有少少失望。
爛屋駁位 影親全景相，難免係接駁位有少少瑕疵， Google都唔例外，你睇屋頂冇咗條木嘅！
用2003舊圖 喺東京上野恩賜公園，可能Google未做得切，street view圖只得公園入口，而且仲未開花。Click入去睇Panorama相又見到有櫻花，點知資料顯示張圖係2003年舊相，究竟實地開咗花未㗎？
好彩本刊編輯近日實地考察，影過張最update的櫻花靚相，對比番街景圖棵巨樹，的確係開滿花花，Google果然冇老點。
打開網址，日本地區名跟住幅地圖排列，易睇易明。細心留意，地名的方格有唔同色，其實地圖右下角有講明顏色代表住開花情況，雖然係日文，不過最緊要知「滿開」係乜就得啦。
阿奴話想睇嘅夜櫻相，喺呢個網就有得睇啦！
沒有留言:
張貼留言