雙色窩

兩年前，電影導演雲翔（Scud）為了拍攝電影《永久居留》，斥資三千萬購入位於銅鑼灣的逾千呎海景豪宅，揼本搞藝術。

電影拍罷，Scud已把單位轉售，賺了數百萬。不過，他本人對維港景色並沒熱情減退，於是去年Scud再豪擲約二千萬元，於同區購買了另一海景單位。這次除了飽覽維港美景外，還可把維園的園林景致盡收眼底，安坐安樂窩便可有雙重享受。

在Scud的安樂窩，客廳和飯廳都可欣賞到維園景色。

愛園景

由於曾在澳洲居住，Scud對田園景色情有獨鍾，「喺澳洲住嘅時候，屋企嘅周圍都係青草地，喺香港我都唔渴望有相同嘅景觀，但係咁啱又畀我睇到呢個 單位，有一邊可以望到維園景，綠色一片同我以前喺澳洲嘅屋企有啲相似，有時我都會緬懷一下喺嗰度嘅悠閒生活，同香港嘅急促，啱啱相反。」
Scud愛在銅鑼灣區置業，因為他鍾愛維港景致，而跟他品味相近者，還有名漫畫家馬榮成，「之前因為拍攝《永久居留》買嘅單位，喺我放嘅時候，馬榮成就差啲啲做到我下一任業主，佢同太太嚟睇過樓，都話好鍾意。
「但係喺佢哋落訂前一晚，有個大陸買家唔肯走，係都要我收佢張支票，卒之我就賣咗畀嗰個買家，馬榮成只可以歎句無緣嘞。」

飯廳旁是落地玻璃，翠綠的觀景確實令人有心曠神怡的感覺。

除了人可飽覽怡人園景，Scud的寵物「獲利回（兔）」享有跟主人一樣的享受。