執平 Tablet

近日收音機狂賣廣告，兩千蚊有找就買到 7吋 tablet，仲要是 Lenovo一線大牌子，好吸引。


無辦法，市場流傳 iPad 3下月推出，上月底 ASUS又搶先推出四核心 tablet（ http://hk.asus.com/Eee/Eee_Pad/Eee_Pad_Transformer_Prime_TF201），不少雙核心及單核心機款焗住減價迎戰，結果當然是用家得益。
以為減價貨是倉底貨，錯！其實大部分開售時間只有半年，規格夠應付上網打機聽歌睇戲，瓣瓣掂，執平貨是時候。

規格緊要

講減價，照常理應以價錢行先，不過一味掛住睇有幾平，未算精明消費者，買機時，無論處理器、屏幕，甚至連電池都要留意清楚。

單雙分別

就算減價，單核心與雙核心型號開價依然差成千蚊，坦白 講，單核心一定不夠快，但收發電郵、睇網頁、聽歌、睇電子書， 1GHz單核心處理器其實運作得好流暢，不過，串流睇劇集、打機、開 Flash網頁等「大食」用途，單核心就肯定窒，所以若非機迷，可以考慮平買入門單核心機，但一日到黑要睇實 myTV的，無得慳，雙核心先夠用。

山寨難用

山寨機屏幕感應好差， icon太細要 㩒多幾次先得。

另外，可能有人問，兩千蚊買部牌子機雖然抵玩，但國產山寨機一千蚊已有交易，點揀？好簡單，因為 山寨機屏幕用電阻設計，無得玩 Multi-touch，仲要觸感好弱，要多兩分耐性 㩒多幾次先 sense到，用得耐一定㷫爆。話雖如此，又並非所有國產機都有此情況，例如 Huawei（ http://www.huawei.com/tc）的 tablet質素就十分好，但最平單核心型號都要$2,700，一分錢一分貨。

屏幕解像

解像度不夠，睇中文網頁時文字會出現「狗牙」。

Steve Jobs生前狠插 7吋屏幕 tablet太細，睇網頁睇片不夠用……同時間卻有用家嫌 iPad 2太大部，拎得耐手都軟，所以話，吋數是否適合，純粹個人喜好。反而睇解像度最實際，如果 10吋機得 800× 480，影像起格又難睇，甚至睇網頁時，中文字會出現「狗牙」，認真肉酸。建議買大吋數 tablet，最少要有 1024× 600解像度，再高一級（ 1280× 800）就更好，夠睇 720p高清片。