電台版盛女明開咪 Winnie升級做主持博鬧 | 陳志雲盛男打造新媒體

電台版盛女明開咪 Winnie升級做主持博鬧

【盛女大追捕之踩入電台】無綫節目《盛女愛作戰》前晚播映完畢，當年構思該節目的陳志雲，明日在商台炮製名為《大龍鳳》的《盛女》電台版，邀請盛女Bonnie、人生教練Winnie和Eva任主持，志雲更歡迎聽眾致電節目鬧Winnie，因為這樣才夠爭議性。

盛女Bonnie、 Mandy聯同導師Eva和Mei Ling等，前晚接受商台節目《光明頂》訪問。Mandy在節目中再否認曾鬧爆無綫：「希望節目完結後，大家可以關注其他事，呢排我都唔敢見父母，唔想佢哋受牽連。」
Bonnie唔吼嘉樂
深 得網民讚賞的Mei Ling則說：「我喺節目度失敗咗，無辦法滿足到Florence。」林曉峰（阿Lo）在節目尾聲現身直播室，原來他明日深夜12時30分起，將與 Bonnie、人生教練Winnie和Eva主持《大龍鳳》。 阿Lo說新節目主題是圍繞兩性問題，每星期會邀請不同嘉賓出席，首周將邀請錢嘉樂，阿Lo笑指Bonnie將與哥哥相認，問Bonnie有否想過想結識嘉 樂？她說：「有，其實我想同佢一齊上《千奇百趣》。」阿Lo追問Bonnie會否mark實嘉樂、又視他為筍盤？她說：「咁又唔好，阿哥又點可以呀？如果 係咁我另外有對象。」 陳志雲則對Bonnie說，男友最好是余文樂，丈夫最好是陳志雲，Bonnie聞言後本再想發表偉論，但卻被寸「有乜嘢男人係唔鍾意？」最後Bonnie 只說：「對女性唔尊重嘅男人咪唔鍾意。」 問志雲會否擔心有人致電節目鬧Winnie？他說：「最好啦，因為有話題有爭議性，最緊要理性討論，和諧唔係700萬人講同一句說話。」 採訪：王崇穎　攝影：仇志德

人生導師Winnie將與林曉峰等主持新節目，看來會激發新一輪討論。資料圖片

陳志雲搞《盛女》電台版，找來Bonnie、Eva及林曉峰等做主持，首集嘉賓為錢嘉樂（小圖）。

《盛女》的參加者與導師前晚在節目中分享拍攝時的苦與樂。

有話兒：陳志雲盛男打造新媒體

不只盛女，盛男陳志雲一樣愛作戰。只是，他的戰場並非在感情，而在事業。由當無綫總經理披甲上陣兼任主持，到今日當上商台 CEO，志雲無時無刻也擺出一副戰鬥格。未來日子，志雲要帶領商台跳出電台傳統框框，與新媒體結合推出飲食、旅遊節目，甚至舉行電視或電影頒獎禮，誓將商 台打造成「睇得到嘅電台」。　撰文：戴彩煥
新官上任的陳志雲，日前在商台總部接受專訪時說：「我哋今日唔係做電台，係做新媒體，係一個睇得到嘅電台。」

陳志雲認為電台與新媒體結合是大勢所趨。　攝影：林德雄

回 歸商台前，陳志雲先後到美國拉斯維加斯、矽谷和三藩市等地參觀大型科技展及拜會新媒體公司學習高科技。原以為只是增廣見聞，但現在已變成即學即用。志雲短 短幾個月吸收的新知識，已通通用在商台之上，志雲說：「將來世界流動電話、智能電話及平板電腦同傳統媒體結合，一定係大勢所趨。尤其電台同新媒體結合，最 強優勢係即時性比其他傳統媒體更強，因為制作時間短，如果係影像你都仲要拍同剪，聲音行先一定係最快，然後仲可以再加入影像或者圖片。」

陳志雲笑言自己既非「盛男」，也非「剩男」。

上月俞琤（左）力邀陳志雲重返商台任 CEO。

有聲有影增加互動

志雲希望將商台打造成一個睇得到嘅電台。
上月特首選舉，商台進行了不少視像直播，讓市民透過手機收看，結果刺激到商台手機瀏覽量激增，由 2月份平均每星期 300萬瀏覽人次跳升到 3月份每星期的 600萬。
志 雲說：「智能手機喺香港嘅滲透率係全世界第三位，增長率仲係全球之冠，所以呢個一定係數碼廣播嘅年代。智能手機普及化，電台佔一個好重要席位，睇一個電視 影片，耗電量同數據係需要好多，但相反聽電台節目或者聽一段片係好就手，即時性扣得更加緊，所以新媒體我哋係好着重。」
志雲續說：「我哋做 緊一個新程式，喺商台 Hong Kong Toolbar加多一個功能叫『視電台』，有埋影像，可以聽可以睇，仲會喺 881同 903開發多兩個程式增加聽眾即時性互動，隨時都可以打電話嚟發聲，到第三階段仲可以即時同主持對話。如果係真人騷，仲會更加緊湊同刺激。」
莫 非志雲想將商台打造成電視台？志雲說：「絕對唔係，電視同電台特質太唔同。我哋係要加強電台即時性，例如我哋通常唔會睇住個節目表去聽節目，唔會限住某一 個時段就係由某一位主持由頭做到尾，中間可以有即時新聞加插落去，呢個做法同電視台好唔同，電視要有晒 schedule，靈活性自然細好多。」

搞電視電影頒獎禮

未 來日子，志雲準備帶領商台跳出傳統電台框框，製作飲食和旅遊節目，連小生花旦每年爭崩頭的電視頒獎禮和電影頒獎禮，商台也有興趣。志雲說：「你所講一切， 都係我哋積極研究緊嘅新節目方針，唔排除任何可能性。我哋有個 CR Production，搞講座、話劇同舞台劇，遲吓會成立經理人管理部門，四出搵人才，培育新人才，聲色藝俱全，都係以聲行先。最後我想強調，我哋唔係同 其他傳媒競爭，我哋訓練出嚟嘅人，好歡迎大家一齊用。」
最關注的問題──志雲會否開咪？他故作神秘說：「我唔排除呢個可能，因為我哋信念係『台前幕後，冇大冇細，無分崗位，做應該做嘅事，講應該要講嘅說話。』甚至俞琤都唔排除開咪，如果有需要嘅話。」

繼續揚聲唔怕打壓

志 雲未坐穩便惹來是非，指他連 DJ播歌都要管，以及一上場便開刀裁員，但志雲高呼寃枉：「梗係冇啦，我都未有時間參與二台策劃。唔可以咁講話裁員，商台互動係商台一個姊妹機構，裏面有 好多唔同版位，我想我哋廣播內容緊緊相扣，如果兩者唔呼應就唔做啫。嗰度一共四位同事，兩個係做娛樂版，一個冇興趣留低，另一個下個月會返嚟，同時我哋都 請緊人㗎。」
有人擔心梁振英上任特首後打壓商台，但志雲未驚過：「過去 50幾年，商台唔係冇經過動盪，無論出面壓力有幾大，商台依然係處變不驚，繼續揚聲。呢個係商台宗旨，只要有大眾市民認同，都唔需要憂慮。」

盛女熱潮意料中事

《盛女愛作戰》掀起全城熱話，反應之熱烈，陳志雲坦言是意料之內。　資料圖片

陳 志雲去年為無綫策劃的《盛女愛作戰》，掀起全城熱話，志雲坦言是意料中事，他說：「呢個係好 universal嘅題目，男女相處問題一定係共同話題。」有人認為節目做媒作假，但志雲力撐：「以我所認知冇任何作假做媒，因為岑應係新聞出身，唔會做 媒。但從純粹一個新聞片製作，係有個爭議性喺度，你拍一個紀錄片，純粹係嗰件事發生，唔係你令到件事發生，佢哋參加聚會係你安排，但今次唔係新聞公共事務 節目，亦冇隱瞞大家，所以係個幾有趣嘅論點。」

「我唔擺上市場」

有人認為節目一味鼓勵女性包裝自己來結識異性，似乎流於表面，忽略真正愛情，志雲說：「有呢啲睇法絕對好，大家可以拎出嚟討論，係咪鼓吹見仁見智，所以《光明頂》都有邀請聲討呢個節目嘅朋友嚟，討論越廣泛，大家得益越多。」
原 來《盛女》名字曾多次改動，本曾考慮過用《剩女》，但節目編導岑應認為應尊重參賽者，故最終改為盛放的盛。近日有網民將節目名改為《盛女愛作賤》，志雲哈 哈大笑說：「網民好有創意，其實我同班參賽者飯敍當日，我有提佢哋要心理上武裝起嚟，要有心理準備會有好多報道同網民講嘅嘢，你鍾意同唔鍾意都會有。我就 真係天真咗少少，冇諗過狗仔隊會跟佢哋，亦冇提過社交網絡係咁起佢哋個底。」
話說回來，志雲其實也是盛男，對此志雲哈哈笑說：「如果你話盛放個盛就絕對唔係，因為自己冇乜優越嘅地方，賣剩嘅意思就絕對係。不過，我又唔覺自己係剩，因為我根本唔想賣，我都唔擺上市場，又何來剩呢？」

讚王維基勇於冒險

王維基（右）瞓身投資電視王國，志雲甚欣賞其冒險精神。　資料圖片

有 人辭官歸故里，有人漏夜趕科場。無綫賣盤後，六嬸方逸華也於上月退任副主席及董事總經理，偏偏王維基卻賣掉城市電訊瞓身搞免費電視台。會否覺得王維基孤注 一擲太冒險？志雲說：「我欣賞佢有冒險精神、有破斧沉舟嘅決心。但我對政府有少少睇法，其實我哋應該開放市場抑或開拓市場呢？兩者其實係有分別。」

應開拓市場

志 雲慨嘆許多人投訴香港電視質素低，其實是可以理解。「以前台灣同內地電視製作比香港落後，家佢哋迎頭趕上，除咗係技術上增長，佢哋市場空間大好多。香港 得 700幾萬人，要質素提升，係要開放市場畀咁多人去爭吖，定係開拓市場好啲？唔好話去到內地好遠，就算去到珠江三角洲都已經好好。」
志 雲續說：「政府咁耐都冇做培育人才工夫，創作人員得十個，你開放多個電視台，就會喺我已有十個人度攞走四個，可能節目多咗，但質素係咪一定好？家政府係 開放冇開拓，希望佢哋做多啲開拓同培育人才嘅工作。每個電視台都喺 TVB度攞人，喺打工仔角度一定係好事，但質素係咪好咗，我哋真係要靜觀其變。」