《壹週刊》 1153期 唐唐全家 美國覓至愛

CY當選後日日見報，反觀唐英年，上月底離開傷心地到底去咗邊？本刊讀者就响洛杉磯豪宅區比華利山巧遇唐唐。當日唐同太太郭妤淺、四名仔女齊齊在名 店Salvatore Ferragamo睇衫，只見大女唐嘉敏坐低，應該是試鞋，一副慈父模樣嘅唐唐和身邊三女唐嘉慧，則幫手睇是否合襯，唐太郭妤淺同大仔唐嘉盛就去咗睇衫。 其實呢個香港人俗稱「飛甩雞毛」嘅牌子係唐太至愛，唐唐遊比華利山都要幫老婆搵番至愛喇。（蔡傳威）
奧美定男人都中招
上 期刊出「內地隆胸 十年浩劫」，揭示國內至少三十萬女人，因注射奧美定隆胸，搞到大細胸兼發炎含膿，甚至生癌死亡。位於廣州嘅廣美整形美容機構同記者爆料，話除咗女人中招， 國內唔少男人都注射奧美定，目的係隆鼻、隆下巴，最多係打喺太陽穴，令自己鼻大額闊，整個富貴相吸引女人。 廣美坦言現時八成客人係嚟抽走奧美定，其負責人劉院長自己也估唔到：「女人就從胸部抽走奧美定，男人因為奧美定搞到臉腫，我們唯有割開面皮，把奧美定清 除。」（艾馬）
特首辯論平到你唔信
特首選舉經費就快公開，梁辦競選主任張震遠誇口話千三萬都唔夠，到底點使？自有分 曉，不過記者八到行會成員陳智思發起嘅選委辯論，只使咗四十萬，平過五年前煲呔戰袋巾（梁家傑）嗰場嘅百幾萬。 點解咁平？原來五年前嗰場由建制派選委余國春、李家祥搞，樣樣收正價，好似計時系統就八至十萬元；但今次整個show由公共專業聯盟嘅莫乃光統籌，好多人 只收友情價，好似計時器就搵拍過網上惡搞片《福佳始終有你》嘅導演Freeman負責。 Freeman做咗IT十幾年，識寫程式，佢話計時器點只timer咁簡單，個程式仲要同步俾所有候選人同主持人睇到；每次講完，用剩幾多時間，又可撥落 下次發言，都唔易搞。佢由程式至硬件一腳踢，只收八千蚊，即使搵多三個受薪計時員喺度按掣，兩萬蚊有找。（簡淑明） ####

讀者喺四月一日見到唐唐（左一）同三女唐嘉慧（左二）現身比華利山「飛甩雞毛」，望住𠌥低身嘅大女唐嘉敏（黃衣）試鞋，一副慈父模樣。（讀者提供圖片）

奧美定令國內男女痛不慾生，現在全國醫院都在做手術抽走它。（韋平攝）


Freeman（上）做過IT，識寫程式，今次設計大會計時器（下），只收友情價八千蚊。

三月十九日特首選舉第二場辯論在九龍灣展貿舉行，發起人是陳智思，但訂場、器材和人手則由公共專業聯盟的莫乃光統籌。